Albertami ukiup affaa ilisimatusartoq: Ilinniakkatigut inuttullu ilikkagaqangaatsiarpunga

Onu Didriksen Ilisimatusarfimmi sungiusimasaminut utersimalerpoq. Ilinniarnerminulli atatillugu 2025-mi upernaakkut University of Albertami oqaatsit pillugit semesteri ataaseq ilinniarpoq.

– Pingaartumik oqaatsit atorneqarnerinut oqaasertaliinernullu tunngasut, Ilisimatusarfimmi ilinniakkannut tulluarnerusut, atuagarsorfigaakka. Bachelorinngorniartut ilagalugit oqaasertaliinerit pillugit atuagarsorpunga, aamma ph.d-nngorniartut ”Atuarneq aamma allanneq” pillugit pikkorissaqatigalugit. Aallaqqaammut ajornakusoorsimavoq, kingusinnerusukkulli naleqqussarsinnaallungalu malinnaasinnaalerpunga, Onu Didriksen oqaluttuarpoq, taanna Ilisimatusarfimmi ilinniartuunermi saniatigut Oqaasileriffimmi ilinniartutut ikiortitut sulivoq.

Periarfissat killeqanngitsut

University of Alberta Canadap kitaani Edmontonimiittoq ilisimatusarfeqarfissuuvoq 46.000-init amerlanerusunik ilinniartulik najugaqarfiini immikkoortortani tallimani immikkoortiterneqarsimasuni. Ilinniakkanut tunngasuni inussinissamullu periarfissanik ulikkaarluni.

– Misigisaq nuannerluinnarpoq – pissanganarlunilu unammillernartuuvoq. Oqaatsit atorneqartut avatangiisillu nutaat sungiunniaqqaarsimavakka. Nerisartakkakka maqaasinerpaavakka - Canadami suut tamarmik allaanerulluinnarmata. Asiamiulli neriniartarfiinik pitsaasunik Nuummilu neriniartarfinnut nerialuttarfinnullu eqqaanarsinnaasunik nassaarpunga.

Ilikkagaqangaatsiartoq

Qasigiannguaneersup Onu Didriksenip atuarnermut allannermullu pikkorissarneq oqaloqatigiinnertut ittoq ilikkagaqarfigilluarpaa.

– Allaaserisat, teoriit periutsillu qanoq pitsaanerpaamik atuarneqarsinnaanerat aamma pitsaanerusumik allaatigisaqarsinnaaneq pillugit ilikkagaqarpugut. Atuartitsinermi tassani naammassiniagassaqaranilu allaatigisanik tunniussisoqartariaqanngilaq, oqalliffiuvorli nammineq ingerlariaatsitsinni atuallaqqissuuniarluta allallaqqissuuniarlutalu qanoq ililluta pikkorinnerulersinnaanerput pillugu oqalliffiusussaq. Tassani ilikkagaqaqaanga – eqqarsaatiginngitsoorsinnaanngilaralu aallaqqaammut Ilisimatusarfimmi taamatut pikkorissartitsisoqarsimagaluarpat immaqa ilinniakkatsinni teoriinik allaaserisanillu paasinnissinnaanissara ajornannginnerusimassagaluarpunga, Onu Didriksen oqarpoq, taannalu nammineq suliamini toqqaannartumik atorsinnaasaminik atuartitsissummut tunngasunik nutaanik isiginnittaaseqalerlunilu teorinik paasisaqarpoq.

- Ilinniartut nunanit tamalaaneersut, amerlanerit ph.d-nngorniarlutik ilinniagaqartut, naapippakka. Attaveqarfeqalerlungalu ikinngutitaartorpunga attaveqarfigiuarsinnaasannik.

Oqaatsinik atueriaatsit pillugit immikkut ilisimasaqarneq

Prosodi, tassa oqaatsit naqitsinerat, nipeqarnerat, erseqqissarnerat oqaatsillu taaneqarnerisa erinaat pillugit ilinniarneq, Onu Didriksenip suliaqarfiginerorusuppai.

– Tamanna aamma aappaagu ilisimatusarnitsinni specialitut sammissavara. Ukiaru paasissutissanik katersuilissaanga misissuinissannullu peqataasussarsiulissallunga. Canadamiinninni isumassarsivunga nunat tamalaat misilittagaat Kalaallit Nunaanni qanoq atorsinnaanerlugit. Neriuppungalu siunissami Ilisimatusarfimmi immikkoortortaqalerumaartoq kalaallisut oqaasilerinermik taamaallaat sammisaqartumik, taamaalilluta oqaatsivut itinerusumik misissornerusinnaaniassagatsigit.

Misigisaq peqqissimissutiginngisaq

Nunami allami semesterimi ataatsimi atuarnermut tunngatillugu Onu Didriksen kajumissaarivoq, naak aallarteqqaarnermi ajornakusoornartoqarsinnaagaluartoq misilinneqartariaqarsoraa.

– Aallaqqaammut imaannaanngitsuusinnaavoq immaqalu annilaanganarpallaarluni – ingammik oqaatsit nutaat atorlugit angerlarsimaffimmiillu ungasissumiilluni. Kisiannili ilikkagassarpassuaqarpoq, suliamut inuttullu atukkanut tunngatillugu. Sukkanerusumik namminersornarneruvoq, avatangiisinullu allanut naleqqussarsinnaaneq imminut tatiginerulersitsisarpoq. Ammasuunissaq, katerisimaarnernut peqataasarnissaq ilisimatusarfiullu ilinniarfigisap pisuussutaasa atorluarnissai kaammattuutigerusuppara, tassami ikiorneqarnissamut tapersersorneqarnissamullu periarfissarpassuaqarmat. Misigisassaq tamanna peqqissimissutigineqarsinnaanngilaq, misilittagaqalerneq ikinngutitaartornerlu taamaaliornikkut anguneqassapput, Onu Didriksen oqarpoq.