ULLOQ UNNUARLU NALUNAARUSIAQ
Angut aallaasersornissamik siorasaarisimasoq suli tigummigallarneqarpoq
Angut 56-nik ukiulik Qaarsuni aallaasersornissaminik siorasaarisimasoq Uummannap politeeqarfiani unnuisinneqarpoq. Killisiorneqareerluni iperagaaguni nunaqarfiminut angerlartinneqassaaq.
Qaarsuni angut 56-nik ukiulik, aallaasersornissaminik siorasaarisimasoq tigusariniarlugu Ilulissani politiit ikiuuttariaqarsimapput.
Assi: Oscar Scott Carl
Qaarsuni angut 56-nik ukiulik aallaasersornissaminik siorasaarisimasoq, Ilulissani politiit ikiorsiullugit tigusarineqarsimasoq politiit pigaartuisa pisortaata Poul Kreutzmannip oqaatigaa.
Angut tigusarineqarnermini aalakuungaatsiarsimavoq, tigusarinninnermili annerusumik perulluliortoqarsimanngilaq.
Angut 56-nik ukiulik Uummannap politeeqarfiani maanna tigummigallarneqarpoq, apersorneqareerlunilu iperagaaguni nunaqarfimminut Qaarsunut angerlartinneqarumaarpoq.
Ikuallattoornermi kalerrisaarut aallartinneqartoq
Nuummi meeqqat atuarfiisa ilaanni Atuarfik Hans Lyngemi (AHL) meeqqat pinnguartillutik piaaralutik ikuallattoornermut kalerrisaarummik toorsisimapput.
- Piaaraluni kalerrisaarummik aallartitsisimasoqartillugu pasilliisoqarsinnaasoq pinerluttulerinermi inatsimmiippoq. Aallartitsisoq meeraagaluarpalluunniit, naggataani angajoqqaajusut akisussaaffimmik tigusisinneqarsinnaallutillu akiligassinneqarsinnaapput, Poul Kreutzmann oqarpoq.
Uanilu suliami suli inerniliisoqanngitsoq, neriuutigalugulu taamaaliortoqaqqissanngitsoq, Poul Kreutzmann oqarpoq.
Ilulissani umiatsiaq ikuallattoq
Ilulissani umiatsiaq ullaassaq annikitsumik ikuallassimasoq politiinut nalunaarutigineqarsimavortaaq. Pisumi inunnik ajoqusertoqarsimananilu pigisanik annerusumik ajoqusertoqarsimanngilaq.
Nuummi Tusass Stafet
Nuummi Tusass Stafet inuppassuarnit peqataaffigineqarluni ullumi ingerlanneqalerpat aqqusinikkut angallattussat mianersoqquneqarput.
- Tusass Stafetsertoqarnera Aqqusinersuarmi, H.J. Rinkip aamma Kuussuup aqqutaanni aqqusinikkut angallannermut malunniuteqassaaq, Poul Kreutzmann oqarpoq.
Aqqusinermilu angallannermut aaqqissuisut namminneerlutik nakkutilliissasut, politiillu atorfissaqartinneqassagunik piareersimajumaartut pigaartut pisortaat ilisimatitsivoq.
