Folketingimut ilaasortap avataarsuata ujaraata angarlaakkusunneranut tapersersuineq nuannaarutigaa

Inatsisartut Naleqqameersoq Mette Arqe-Hammekenip avataarsuata ujaraata Agpalilik maanna Danmarkimiittoq pillugu siunnersuutaa sisamanngornermi oqaluuseraat.

Politikerip Agpaliliup ujarattaalu allat Danmarkimiittut Kalaallit Nunaannut angerlaassinnaanissaannut teknikikkut assartuinermilu atugassarititaasunik misissueqqissaarnissaannik, Naalakkersuisut Danmarkip saaffiginnissutigissagaat kissaatigaa.

Siunnersuut Inatsisartuni Naalakkersuisunilu taperserneqarpoq.

- Danmarkip tusaasariaqarpaa

Tamanna Mette Arqe-Hammekenip parteeqataata, folketingimut ilaasortap Qarsoq Høegh-Damip nuannaarutigaa. Taassuma Danmarkimi naalakkersuisut tunngavissaanni nutaami saqqummiunneqaqqammersumi Kalaallit Nunaannit pisuussutinik utertitsisoqarnissaanut allaqqasoqarnera tikkuarpaa:

– Agpalillip utertinneqarnissaanik kissaaterput Inatsisartuni tamarmiusuni tapersersorneqarmat, danskillu naalakkersuisoriligaasa tunngavianni utertitsinissaq tapersersorneqarmat, utoqqatsissutissaaruppoq. Agpalilik Kalaallit Nunaannut utertinneqassaaq. Naleqqamit kisimi piumasaqartuujunnaarpoq. Inatsisartut tamarmik Agpaliliup angerlaannissaanut kissaaterput tapersersorpaat. Tamanna Danmarkip tusaasariaqarpaa, Qarsoq Høegh-Dam tusagassiuutitigut nalunaarummi oqarpoq.

Mette Arqe-Hammekenip siunnersuutaa Inatsisartuni Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliami suliarineqartussanngorlugu sisamanngornermi ingerlateqqinneqarpoq.

Aalajangiiffigisassatut siunnersuut ukiakkut ataatsimiinnermi aappassaaneerneqassaaq.

Danmark akiliissava

Avataarsuata ujaraata ilamernga Agpalilik 20 tonsit missaannik oqimaassusilik, Avanersuarmi Appaliliup eqqaani 1963-mi nassaarineqarsimasoq kingornalu Danmarkimut 1967-imi assartorneqarnikuusoq naalagaaffiup katersugaasivissuani, Statens Naturhistoriske Museumimi katersugaatinut maanna ilaasoq, Naalakkersuisut siunnersuutip suliarineqarnerani paasissutissiissutigaat.

Taassuma angerlaanniarnerani Danmarkimiit Kalaallit Nunaannut assartuinermik kiisalu toqqavissamik naleqquttumik pilersitsisoqarnissaa isumannaallisarnerlu pisariaqartinneqarsinnaasut, naatsorsuutigineqartariaqassaarlu avataarsuata ujaraata oqimaassusia passunneqarnissaanillu piumasaqaatit malitsigisaannik aningaasartuuteqarfiungaatsiassasoq.

Naalakkersuisut angerlaassinissamik suliap ingerlanneqarnerata aallartinnissaa siunertaralugu qallunaat naalakkersuisuinut toqqaannartumik attavigineqarsinnaakuttoortut nalilerneqarpoq.