Paasisavut 2026: Unammeqataarusuttunik qinnuteqartitsineq ammarpoq
Ilisimatusarlutik ph.d.-nngorniartut ilisimatusaatiminnik saqqummiillaqqinneqqusaannermik unammisitsinissamut, Paasisavut 2026-mut, peqataarusukkunik Arctic Hub-imut qinnuteqarsinnaalerput.
Regine Møllerip tunumi Isortumi inuiaqatigiinnik ilisimatusarnini saqqummiukkamiuk, 50.000 koruuninik akissarsilluni Paasisavut 2024-mi ajugaasuuvoq.
Assi: Emil Stach / Arctic Hub
Ph.d.nngorniutigalugu ilisimatusartut imaluunniit ukiut marluk iluanni naammassinnissimasut, unammisitsinermut peqataarusukkunik septemberip aallaqqaataat nallertinnagu qinnuteqarsinnaasut, Arctic Hub tusagassiutinut nalunaaruteqarluni allappoq.
- Paasissutissat amerlanerusut qinnuteqarnissamullu periarfissaq www.paasisavut.gl-imi nassassaapput, Arctic Hub allappoq.
Paasisavut 2026
Ilisimatusartut ilisimatusaatiminnik saqqummiillaqqinneqqusaatsinneqarnerat Katuami tallimanngornermi novemberip 13-ni ingerlanneqassaaq, KNR TV-kkut toqqaannartumik aallakaatinneqassalluni.
Ajugaasoq 50.000 koruuninik akissarsitinneqassasoq, Arctic Hub ilanngullugu allappoq.
Saqqummiillaqqinneqqusaatsitsinermi kikkut naliliisartuussanersut aggustip arfernani avammut nalunaarutigineqarumaartoq, Arctic Hub paasissutissiivoq.
Paasisavut 2024 ingerlanneqarmat naliliisartut tassaapput Nukâka Coster-Waldau, Minik Rosing
aamma Rosannguaq Rossen.
Assi: Emil Stach / Arctic Hub
Siornatigut ajugaasut
Paasisavut 2023-mi ingerlanneqaqqaarmat Nick Duelund, meeqqat isigiarsuttuunerat pillugu ilisimatusarnini saqqummiukkamiuk ajugaasuuvoq.
Kingullermik Paasisavut 2024 ingerlanneqarmat Regine Møller, tunumi Isortumi innuttaasut piujuartitsinermik ineriartortitsinermik isiginnittaasiat pillugu ilisimatusarnini ajugaassutigaaa.
