Tusagassiorfik Sermitsiaq immikkut nersornaasiuttamik tunineqartoq
Den Danske Publicistklubip tusagassiorfik Sermitsiaq, Kalaallit Nunaanni piffissami unammillernartorsiorfiusumi tusagassiortarnera pingaaruteqartoq pillugu, immikkut nersornaammik tunivaa.
Publicistklubbenimiit nersornaaserneqartut: Saamerlermiit Sermitsiaq sinnerlugu Trine Juncher Jørgensen, Rune Skyum-Nielsen, Rasmus Nielsen aamma Signe Westermann Kühn.
Assi: Den Danske Publicistklub
Tusagassiorfik Sermitsiaq tusagassiortut peqatigiiffiata Den Danske Publicistklubip pingasunngornermi unnukkut nersornaasiinerani nersornaaserneqarpoq.
Tassani Sermitsiaq immikkut nersonaammik "Kalaallit Nunaata oqaluttuarisaanermi aatsaat taama nunanit tamalaanit maluginiarneqartiginerani pingaarutilimmik tusagassiornera" pissutigalugu tunineqarpoq.
Tunngavilersuut ima nangippoq:
– Naapertuilluartumik tusagassioriaaseqarneq, aalajaalluni nutaarsiassiisarneq Kalaallit Nunaatalu ineriartorneranik malinnaalluartumik piffissami allanngorfioqisumi nunarsuullu sinneraniit aatsaat taama malinnaasoqartiginerup nalaani pingaarutilimmik inissisimaffeqarnera pillugu nersornaat tunniunneqarpoq.
Tusagassiortup Trine Juncher Jørgensenip Sermitsiaq sinnerlugu nersornaat tigullugulu naliliisartut peqatigiiffillu qujaffigai.
– Sulisut amerlanngilagut. Nutserisut, ilusilersuisut, allaffimmiut, tuniniaasut, tusagassiortut assiliisartorlu tusagassiortuutigisoq ataaseq immitsinnut pinngitsoorsinnaanngilagut. Suleqatigiinngikkut suliagut naammassisinnaanngilagut, piffissamilu ilungersunartumi tamatta oqimaaqatigiissaariniarsaraluta.
– Tusagassiorfipput maluginiarlugulu atuartarassiuk suliatta maluginiarneqarnerat uagutsinnut pingaaruteqartorujussuuvoq, Trine Juncher Jørgensen oqarpoq.
Immikkut nersornaat nersornaasiinernut sisamaasunut ilaavoq, Den Danske Publicistklubillu pingasunngornermi unnukkut taakku nersornaasiissutigai.
Ukioq manna Saqqummersitsisartumut nersornaat tusagassiorfimmut politikkilerisumik Altingetimik pilersitsisumut Rasmus Nielsenimut tunniunneqarpoq. Piviusulersaarummut nersornaat tusagassiortumut atuakkiortumullu Rune Skyum-Nielsenimut ukioq manna tunniunneqarpoq, piginnaasalimmut nersornaat Berlingskemeersumut Signe Westermann Kühnimut tunniunneqarpoq.
