Upernavimmi Uummannamilu qaleralinniarneq inuussutissarsiutit pingaarnersaraat. Aalisarnermilli inuussutissarsiuteqarneq maannakkornit suli annertunerusumik inerisaaffigineqassappat, aalisakkat assigiinngitsut qaqinneqarsinnaasut sapinngisamik amerlanerpaartaat, aalisakkanik suliffissuarnut tulaanneqarsinnaasariaqartut, aalisartut isumaqarput.
Nipisat suaannik tunisinermi akigitinneqartoq ukioq manna aatsaat taamak qaffasitsigaaq. Taamaakkaluartoq taakku Upernavimmi, Uummannami, taakkulu nunaqarfiini suaat tunisaanngillat. Tamannali aappaagumiit allanngoratarsinnaavoq.
Upernavimmi Uummannamilu qaleralinniarneq inuussutissarsiutit pingaarnersaraat. Aalisarnermilli inuussutissarsiuteqarneq maannakkornit suli annertunerusumik inerisaaffigineqassappat, aalisakkat assigiinngitsut qaqinneqarsinnaasut sapinngisamik amerlanerpaartaat, aalisakkanik suliffissuarnut tulaanneqarsinnaasariaqartut, aalisartut isumaqarput.
Nipisat suaannik tunisinermi akigitinneqartoq ukioq manna aatsaat taamak qaffasitsigaaq. Taamaakkaluartoq taakku Upernavimmi, Uummannami, taakkulu nunaqarfiini suaat tunisaanngillat. Tamannali aappaagumiit allanngoratarsinnaavoq.
Periarfissat misissorneqassasut
Ukiut arlallit matuma siornatigut nipisat suaat, ukiup ataatsip iluani Upernavik Kujallermi misiligutitut tunisaapput. Tamannalu iluatsittumik ingerlasimasoq, Royal Greenlandip Upernavik Kujallermi aalisakkanut suliffissuaataani pisortaq, Magnus Grim oqarpoq. Taassuma oqarnera naapertorlugu, Upernavik Kujallermi nipisat suaasa aappaagumiit tunisaaqqilersinnaanerat pillugu periarfissat misissorneqassapput. Tassungalu atatillugu sapaatip akunnerata uuma ingerlanerani aalisartut ataatsimeeqatigineqassapput.
Silaannaap allanngoriartornerata kingunerisaanik avannaani sumiiffinni amerlasuuni sikuusarnera sivikinnerulerpoq. Tamannalu nipisat aalisarneqarsinnaalernissaannut periarfissanik ammaassisoq, Magnus Grim oqarpoq.
- Aalisartut kissaataat tusarnaartarpagut nalilersorlugillu. Upernavik Kujallermi nipisat suaasa tunisaalernissaat aalisartut kissaatigaat, tamannalu tunngavigalugu aappaagumiit suannik tigooraalernissarput siunniupparput, taanna oqarpoq.
Qalerallit 300 tonsit missaanniittut Upernavik Kujallermi aalisakkanik suliffissuarnut siorna tulaanneqarput.
- Aalisakkat assigiinngitsut sapinngisamik amerlanerpaat tunisassiarineqartarnissaat qullersama kissaatigaat, tamannalu piviusunngortinniarlugu sulineq ingerlavoq.
- Upernavik Kujallermi nipisat suaannik tunisineq iluatsissappat, Upernavimmi immaqalu nunaqarfinni allani aamma tunisaalernissaat eqqarsaataavoq, ukiorpassuarni aalisakkerivimmi pisortaasoq oqarpoq.
Upernavik Kujallermi qaleralinnik tunisinermi 30 koruunit kiilumut akigitinneqarpoq.
Nipisaqarluartoq
Upernaviup eqqaani sumiiffiit ilaanni nipisappassuaqartoq, Upernavik Kujallermi umiatsiaararsortoq, Paulus Karlsen oqarpoq.
- Tamaani aalisartut nipisanniarneq misilittagaqarfigereerpaat.
- Kalaallit Nunaata kitaanut nipisat suaat pisassiissutaasartut nunguttullu ukiut siuliini avannaa sikuertarpoq. Maannakkulli sikuusarnera sivikinnerulerpoq, suannillu tunisineq ammaanneqarpat, tamanna aalisartunut annertuumik iluaqutaassaaq, taanna oqarpoq.
Kalaallit Nunaata kitaanut nipisat suaat pisassiissutaasartut nunguttullu ukiut siuliini avannaa sikuertarpoq. Maannakkulli sikuusarnera sivikinnerulerpoq, suannillu tunisineq ammaanneqarpat, tamanna aalisartunut annertuumik iluaqutaassaaq, Upernavik Kujallermi umiatsiaararsortoq, Paulus Karlsen oqarpoq.
Asseq nammineq pigisaq.
Avannaata Kommuniani qassusersorluni qaleralinniarnermi ileqqoreqqusat naapertorlugu, aqutsiveqarfik Upernavimmi januar, marts, april, maj, november aamma decemberi qassusersorluni qaleralinniartoqarsinnaavoq. Tamannalu ilaatigut peqqutaalluni qaleraleqassuseq eqqugaasimasoq, tulaanneqartartullu ikinnerulersimasut, Paulus Karlsen oqarpoq.
Taamaattumik ukiup tullissaa aallarnerfigalugu nipisat suaat tunisaalertuuppata, tamanna aalisartut aningaasaqarnerannut annertuumik tapertaalluarsinnaasoq, taanna isumaqarpoq.
Atorluarneqartariaqartoq
Uummannami aalisartut piniartullu peqatigiiffianni siulittaasup Ole Møllerip oqarnera naapertorlugu, Uummannami eqqaanilu aamma nipisaqarluarpoq. Tamannalu atorluarneqartariaqartoq, taanna isumaqarpoq.
Uummannami pingasunik aalisakkanut suliffissuaqarpoq, taakkunanili nipisat suaat tunisaanngillat.
- Siusinnerusumut naleqqiullugu sikuusarnera qaammatip ataatsip missaannik sivikinnerulernikuuvoq. Taamaammat nipisat suaannik tunisineq ammaanneqartariaqartoq aalisartut isumaqarput.
- Nipisanniarneq qaleralinniarnermut tapertaalluarsinnaavoq, taamaattumik pineqartoq piffissami qanittumi aalisartut piniartullu peqatigiiffianni oqaluuserisassanngortinneqassaaq, taanna oqarpoq.
Ole Møller Avannaata Kommuniani kommunalbestyrelsimi Aalisarnermut Piniarnermullu Ataatsimiititaliami aamma siulittaasuuvoq. Taassuma oqaatigaa Avannaata Kommuniani aalisarnermik inuussutissarsiuteqarnerup inerisaaffigineqartuarnissaa ataatsimiititaliamit pingaartinneqartoq.
Taamaattumik Uummannami Upernavimmilu, taakkulu nunaqarfiini, nipisaat suaasa tunisaalernissaannut periarfissat qulaajarneqarnissaat siunertaralugu pineqartoq piffissami aggersumi ataatsimiititaliamut aamma oqaluuserisassanngortinneqarnissaa sulissutigissallugu, taassuma erseqqissaatigaa.
