Siumumi siulittaasuusimasoq
2013-imiillu 2014-imut naalakkersuisuni siulittaasuusimasoq Aleqa Hammond
sapaatip akunnerani kingullermi Siumup Nuummi immikkut ittumik
ataatsimeersuarnerani Vivian Motzfeldt 19-nit taaneqartoq 23-nit taaneqarluni
siulittaasutut qinerneqarpoq.
Aleqa Hammond 2009-miit
2014-imut partiimi siulittaasuusimavoq, maannalu partiimut siuttuuleqqippoq,
nalunagu inuttut pissusini aningaasartuutinullu tunngasunik suliaqarsimanini
sakkortuumik qisuariarfigineqartarsimasoq.
Siumumi siulittaasuusimasoq
2013-imiillu 2014-imut naalakkersuisuni siulittaasuusimasoq Aleqa Hammond
sapaatip akunnerani kingullermi Siumup Nuummi immikkut ittumik
ataatsimeersuarnerani Vivian Motzfeldt 19-nit taaneqartoq 23-nit taaneqarluni
siulittaasutut qinerneqarpoq.
Aleqa Hammond 2009-miit
2014-imut partiimi siulittaasuusimavoq, maannalu partiimut siuttuuleqqippoq,
nalunagu inuttut pissusini aningaasartuutinullu tunngasunik suliaqarsimanini
sakkortuumik qisuariarfigineqartarsimasoq.
Maanna partii kiveqqillugulu, immikkoortortat
nakussassarlugillu suleriaatsimik nutaamik pilersitsissaaq.
- Isornartorsiorneqangaarsimavunga,
kukkussutigisimasakkalu inuiaqatigiinnut nassuerutigisarpakka. Utoqqatserpunga.
Akisussaaffillu tigummivara, Hammond oqarpoq siumullu isiginissamut
piffissanngortoq naqissuserlugu.
Politikkikkut suliniuteqarneq
inunnut tunngatinnagu Siumut ataatsimoorlutik nikuiseqqeqqullugu partiilu
qinersisartunut qanillinerulerseqqullugu ilaasortat kajumissaarpai.
Immikkoortortat
suleqatiginissaasa Siumullu pingaartitai anguniagaalu pillugit erseqqissumik
paasissutissiinissaq pingaaruteqartoq oqaatigaa – pingaartumik inuiaqatigiit
nukittunerulernissaat, sanngiinnerpaanik tapersersuineq namminiilivinnermullu
aqqut eqqarsaatigalugit.
Hammondip siulittaasutut
Inatsisartuni kommunalbestyrelsimiluunniit ilaasortaaffeqanngitsutut siullertut
partiimi qinigaasunik siulersuisuunernillu qanimut suleqateqarniarluni
neriorsuivoq. Suleriuseq nutaaq oqaluuserineqassaaq, Hammondillu nutaamik ingerlasoqassasoq
neriorsuutigaa:
- Kattuffik
nukittorsartariaqarparput, suna siunertarineripput qinersisartut
paasisariaqarpaat. Tamanna suliassanni pingaarnerpaavoq, oqarpoq Siumullu
naalakkersuisooqatigiinniiginnarnissaa siulersuisuunerit
immikkoortortaqarfiillu aalajangiiffigissagaat nassuiarlugu.
Partii
kinguariangaatsiartoq
Vivian Motzfeldt
ataatsimeersuartoqarnissaata tungaanut siulittaasuugallartoq
ataatsimeersuarnermi oqalugiarpoq. Pappiala oqalugiaatissaminik allassimasulik
isigalugu peqataasullu inersuarmiittut toqqaannartumik isiginagit atuaavoq:
- Immikkut
ittumik ataatsimeersuarnissatsinnut pissutaasutuaasoq tassaavoq Inatsisartunut
qinersinermi aatsaat taama ajorsartiginerput. Siumut 2025-mi marsip 11-ani 14,7
procentinit taaguunneqarluni Inatsisartuni sisamaannanik ilaasortaatitaqalerpoq
(qinigaaffimmi kingullermi quliusut, aaqq.). Tamatuma kingorna Erik Jensen
siulittaasutut tunuarpoq, uanga siulittaasup tulliatut siulittaasuugallarlunga,
oqarpoq, tuppallersaatigaali Kommunimut qinersinermi qinersisartut
tatiginninnerat attatiinnarsimagamikku, tassani 33,6 procentinit
taaguunneqarput.
Motzfeldt naapertorlugu
Siumup Inatsisartunut qinersisoqarneraniinnaanngitsoq aammali tamakkiisumik
tatiginnikkunnaarneq iliuuseqarfigisariaqarpaa:
– Ilaasortanik
isumaginninnermik sumiginnaaneq, immikkoortortaqarfiit
peqataatinneqannginnerat, ineqarnermut aaqqissuusseqqinnerup, innuttaasunut
nanertuutaasumik ajornartorsioreersunut suli nanertuutaanerulersitsisup,
akuersissutigineqarnera. Partiip soraarnerussutisiaqalernissamut
pisussaaffimmik aaqqissuussineq aamma iluarsinngitsoorpaa, taamatuttaarlu USA-p
præsidentianut erseqqissumik paatsuuillunilu attaveqatigiinnerit, innuttaasunut
aamma nalornilersitsipput. Partiip tamatuma saniatigut innuttaasut kaammattuutaat – ilinniartitaanermut, peqqissutsimut
isumaginninnermullu tunngasut politikkikkut aallunneqannginnerat, meeqqat
amerlasuut pinngitsaalillugit ilaquttaminnit peersinneqartarnerat, inuusuttullu
ilinniagaqarsimanngitsut suliffeqanngitsullu iliuuseqarfigisinnaasimanngilai,
Vivian Motzfeldt oqarpoq.
Peqataasut
isornartorsiuinerat
Ataatsimeersuarnermut
atatillugu sinerissamit peqataasut 43-innaanerat Siumup ajornartorsiorneranut
uppernarsaataavoq, peqataasullu aqutsisut immikkoortortaqarfiit
tusarnaarusunnginnerarlugit isornartorsiorpaat.
- Partiimi
siuttuusut ataatsimoorlutik angusamik oqaluttuarinissaat, imaluunniit inuit
attaveqaqatigiittarfii atorlugit angusat oqaluttuarinissaannut piginnaasat
amigaatigineqarnerat naammanngilaq. Isumaqarpunga suliassatta pingaarnersaat
tassaasoq sinerissami sorlatta nukittorsarnissaat, taakkununnga tusarnaarnikkut
iliuuseqarnikkullu. Sinerissami Siumumi ilaasortat allatut oqartut angusat
oqaluuserissallugit naammanngilaq, . Tusarnaarunnaarpagut, aqutsisullu
tusaannginnerarlugit isornartorsiortarpaat. Tamanna Inatsisartunut qinersinermi
angusani takuneqarsinnaavoq, tassanilu kinguariarujussuarpugut, Ineqi Kielsen
siulittaasup oqalugiaataanut oqaaseqaammini oqarpoq.
- Aalisarnermut
inatsit aamma pinngitsoorani soraarnerussutisiaqalernissamut aaqqissuussineq
inatsisit teknikkikkut imaqarluartut marluk innuttaasunut paasiuminaapput,
taakkualu erseqqissumik nassuiarsinnaanngilasi. Iluaqutissartai suullu
pitsanngorsarneqarsinnaanersut oqaluttuarissallugit
pikkorinnerusariaqaraluarpugut, Nuummit aallartitaq Peter Davidsen ilaatigut
oqarpoq.
- Sorlavut
suliarinngikutigit niviarsiaq naasinnaanngilaq. Inuusuttut uagutsinnik
kingoraartussat nukittorsartariaqarpavut. Ataatsimoortariaqarpugut partii
nukittorsarniarlugu. Avissaartuunneq ilisarnaatigigutsigu Siumut
suleqatigiinniarluta katersortariaqarparput, Sakio Fleischer Uummannameersoq
siulittaasup oqalugiaataa pillugu oqarpoq.
Partiip
nukittunerulersinnissaa anguniarlugu malittarisassat allanngortinneqartut
Siulersuisuunerit
siulittaasuat, siulittaasup tullia siulittaasullu tulliata aappaa qinigaaffimmi
kingullermi naalakkersuisuni pingaarutilinnik atorfittaarput, taamaammallu
Siumup partiitut aaqqissuussaaneranut tunngasunik suliaqarnissamut
piffissaqarpallaanngillat. Tassunga atatillugu partii nukittorsarniarlugu
sinniisut siulittaasup tulliatut siulittaasullu tulliata aappaatut atorfiit
tigusinnaagaat partiimit aallarniutigineqarpoq.
- Malittarisassat
allanngortinneqarnissaat tapersersorpara. Immikkoortortaqarfiit
attaveqarfigineqarnissartik oqariartuutimillu saqqummiussinissaat
pisariaqartippaat. Siunnersuut pitsaasuuvoq partiimilu nukiit
siammarterneqarsinnaallutillu partiip immikkoortortaqarfiillu suleqatigiinnerat
nukittorsarneqarsinnaavoq, Siumumi siulittaasuusimasoq Erik Jensen,
Inatsisartunut qinersinermi ajorsarnermi kingorna siulittaasutut tunuartoq,
misilittakkat tunngavigalugit oqarpoq, tamannalu ataatsimiinnermi peqataasunit
taperserneqarpoq.
Aamma siulersuisuunerit
partiip inuit attaveqaqatigiittarfiisigut saqqummiunnissaat
ajornannginneroqqullugu politikkikkut anguniagassatut allassimasut quppernerit
100-ngajaat affaannanngortinneqarnissaat politikkikkullu anguniagassatut
allassimasut 41-t naalisarneqarnissaat siunnersuutigaat.
Aleqa tatigineqartoq
Siumup Sisimiuni
immikkoortortaqarfiata Aleqa Hammond siulittaasussatut innersuussutigaa. Taakku
qinigaaffiup siuliani siulersuisuunerit naalakkersuisutut inissisimaffitsik
ulapputigivallaarsimagaat, taamaammallu aaqqissuussaanikkut
suliniuteqarpallaarsimanatik partiimi politikkimik suliaqarpallaarsimanngitsut
isumaqarput.
- Allannguisoqarnissaa pisariaqarmat Aleqa Hammond
siulittaasussatut innersuussutigaarput. Siumup siulittaasua
siulersuisuunerinilu ilaasortat naalakkersuisuni ilaasortaasimasut partiip
aaqqissuussaaneranut politikkimullu piffissaqarpiaratik naalakkersuisuni
suliassat ulapputigivallaarsimagaat Sisimiuni Siumumi maluginiarsimavarput.
Taamaammat Aleqa suliassamik kivitsilluarsinnaassasoq immikkoortortaqarfiillu
tusaaneqaratik misigisimasut suleqatigilluarsinnaagai naatsorsuutigaara, Siumut
Sisimiuniit Morten Siegstad oqarpoq.
