Inatsisitigut ataataqanngitsut 26-t Naalagaaffik eqqartuussivimmi naapippaat

Kalaallit inatsisitigut ataataqanngitsut 26-t danskit naalagaaffiannit 325.000.000 koruuninik taarsiiffigitinnissamik piumasaqarput.

Kalaallit inatsisitigut ataataqanngitsut 26-t danskit naalagaaffiat Østre Landsret-imi eqqartuussivimmut suliassanngortippaat. (Toqqorsivimmit assi)
Saqqummersinneqarpoq

Kalaallit inatsisitigut ataataqanngitsut 26-t danskillu naalagaaffiata akornanni suliaq Østre Landsret-imi marlunngornermi aallartinneqarpoq.

Kalaallit eqqartuussissuserisuata Mads Prammingip saniatigut unnerluutiginnittut pingasut eqqartuussivimmiipput.

- Unnerluutiginnittut 26-t kisimiinngillat. Amerlasuut assingusumik atugaqarput, Mads Pramming eqqartuussinermi oqarpoq.

Meeqqanut Isumaginninnermullu Ministereqarfiup 2016-imi nalunaarusiaani naatsorsuutigineqarpoq inuit 8.000-it missaat piffissami 1911-mit 1974-imut inatsisitigut ataataqanngitsutut inissisimalersimasut, 2016-imilu suli 5.000-ingajaat taamaalillutik inatsisitigut ataataqanngitsutut suli inissisimapput.

Kalaallit Nunaanni ataataasussaatitaaneq pillugu inatsisitoqaq suliami tunngaviuvoq.

Kalaallit Nunaata Kitaani meeqqat 1963 sioqqullugu uersakkat, 1974 sioqqullugu nunap sinneranilu inunngorsimasut, ataatartik ilisimasinnaatitaanagu, kingornussisussaatitaanatillu naggataat atorsinnaanngilaat.

Danskit naalagaaffiata kalaallit inatsisitigut ataataqanngitsut 26-it 2023-mi taarsiiffigiumanngilaat.

Mads Prammingip eqqartuussinermi suliaq pillugu siornatigut politikkikkut, arlaleriaq oqaaseqartoqartartoq erseqqissarpaa.

Ilaatigut maanna naalakkersuisut, tunngavilersuutaat allassimasoq erseqqissarpaa,: "Naalakkersuisut nassuerutigaat inatsisitigut ataataqanngitsut qitornavissartaarineqartulli ilisimatinneqartariaqarlutillu akuerineqartariaqartut, pisortatigoortumillu utoqqatsernissaq isumaliuutersuutigineqarpoq.“

- Eqqumiippoq akuerineqarnissaat sulissutigeriarlugu, eqqartuussivimmi ajortuliortoqarsimanera nassinerutigineqarumanngitsoq, Pramming oqarpoq.

Taassumattaaq innersuussutigai Inuit Pisinnaatitaaffii pillugit Ilisimatusarfiup 2012-imi inatsisissatut siunnersuut pillugu tusarniaanermut akissutaa. Meeqqallu katisimanerup avataatigut inunngorsimasut ataataqarsinnaatitaanerat matumani naqissuserneqaraluarpoq.

Tassani allassimavoq siunnersuisoqatigiit "inassutigisaraat pisortatigoortumik inatsisitigut ataataqanngitsut akuerineqassasut, Europamilu Inuit Pisinnaatitaaffiinik Isumaqatigiissut 1953-imi atuutilersinneqartoq unioqqutinneqartoq“.

Inatsisitigut ataataqanngitsutut eqqartuussivimmut suliassanngortitsisut ilaat tallimat ministeriaqarfiup akueriumanngilai.

Eqqartuussivimmut suliassanngortitsisut ilaat meeraanerminni qitornavissianngortinneqarsimaneri pissutigalugit, inatsisitigut ataataqanngitsutut taaneqarsinnaannginneri isumaqatigiinngissutigineqarpoq.

Suliani allani angajoqqaajusut aappaqarnerannut aappaqannginneranulluunniit tunngassuteqarpoq, aammattaaq suliamik ingerlatitseqqiisut ilaat 1963-ip kingorna Kitaani inunngorsimapput.

Eqqartuussivimmut suliassanngortitsisut 26-t tamarmik immikkut 100.000 koruuninik, katillugit 3.500.000 koruuninik, taarsiiffigitinnissamik piumasaqarput.

Suliap ingerlanerani eqqartuussivimmut suliassanngortitsisunit 26-usunit marluk toqukkut qimagussimalereerput, kingornussisuilu suliamut ilanngullutik.

Eqqartuussinerup ulluni pingasuni ingerlanneqarnissaa, naatsorsuutigineqarpoq. Eqqartuussullu qaqugu oqaatigineqassanersoq suli ilisimaneqanngilaq.

RITZAU

Powered by Labrador CMS