Naja Lyberth sølvimik Nersornaaserneqarpoq
Naja Lyberth spiralilersuinermut suliamut tunngatillugu ukiorpassuarni siuttuusoq, sølviusumik Nersornaaserneqarpoq.
Naja Lyberth sølviusumik Nersornaaserneqarpoq. Nersornaasiineq Hans Egedep iluani ingerlanneqarpoq.
Assi: Inatsisartut Allattoqarfiat / Bureau for Inatsisartut
Spiralilersuinermut tunngatillugu suliami siuttuusut ilaat, Naja Lyberth, Hans Egedep illuani nalliuttorsiorpalaartumik sølviusumik Nersornaaserneqarpoq.
Kalaallit Nunaanni ukiuni kingullerni niviarsiaqqanik, arnanik inuusuttunik arnanillu inersimasunik, aamma arnat ullumikkut utoqqalisut, pillugit annertuumik suliaqarsimanera pillugu Naja Lyberth nersornaaserneqarpoq.
Taama Inatsisartut siulittaasuat Kim Kielsen tusagassiutitigut nalunaarummi allappoq.
Kim Kielsenip Naja Lyberthimut oqalugiarnermini ilaatigut uku erseqqissarpai:
– Sapiissuseqarlutit, nukittullutit aalajangiusimallutillu Kalaallit Nunaanni oqaluttuarisaanitsinni pisimasoq alianartoq annertuumik oqallisigineqalersillugu saqqummerseqqinniarnerani aallarnisaavutit.
– Oqaluttuaq tamanna sivisuumik nipangiusimaneqarsimavoq, naak arnanut, taakku ilaqutaannut minnerunngitsumillu inuiaqatigiinni inunnut amerlasoorpassuarnut annertoorujussuarmik kinguneqarsimagaluartoq. Kingunerilu taakku ullutsinni suli atuupput, Kim Kielsen oqarpoq.
Naja Lyberthip iliuuseqarneratigut arnat eqqugaasut maanna tusaaniarneqalernerat, Kielsenip aamma erseqqissarpaa.
- Suliniuteqarnerit arnanut eqqugaasunuinnaq pingaaruteqanngilaq, aammali inuiaqatigiinnut tamanut kinguaariinnullu aggersunut pingaaruteqarpoq.
- Oqaluttuarisaanitsinni pisimasut toqqorterneqarsimasut qaqilerneqarnissaasa, eqqugaasimasut tusaaniarnissaasa siunissamillu pitsaanerusumik sulissutiginninnissap qanoq pingaaruteqartiginerat takutippat, Kim Kielsen Naja Lyberthimut oqarpoq.
Naja Lyberth aamma Inatsisartut siulittaasuat Kim Kielsen sølvimik Nersornaasiinermi.
Assi: Inatsisartut Allattoqarfiat / Bureau for Inatsisartut