Kalaallit Nunaanni annertuumik amerlanerussuteqartut – 85 procentit – Kalaallit Nunaata naalagaaffeqatigiinnit aninilluni USA-mut ilanngunnissaa kissaatiginngilaat.
Taamaakkaluartoq affaasa missaasa Donald Trumpip Kalaallit Nunaanik soqutiginninnera periarfissatut isigaat, affaasalu kingulliit tamanna aarleqqutigaat.
Kalaallit Nunaanni annertuumik amerlanerussuteqartut – 85 procentit – Kalaallit Nunaata naalagaaffeqatigiinnit aninilluni USA-mut ilanngunnissaa kissaatiginngilaat.
Taamaakkaluartoq affaasa missaasa Donald Trumpip Kalaallit Nunaanik soqutiginninnera periarfissatut isigaat, affaasalu kingulliit tamanna aarleqqutigaat.
Sermitsiaq Berlingskelu sinnerlugit misissueqqissaartarfiup Verianip qinersisartunik isumasiuinerata tamanna takutippaa.
– Donald Trumpip erneratalu Trump Jr.-ip kalaallit amerikamiorusunnerat uteqattaartuarpaat, tamannalu isumasiuinermi akissutit qiviaraanni paasissutissanut piviusunut akerliuvoq, Danmarkimi nunanut allanut tunngasunut misissuisoqarfik (DIIS)-imi ilisimatusartuuneq Ulrik Pram Gad oqarpoq, amerikamiullu Kalaallit Nunaannik soqutiginninnerat assigiinngitsunik marlunnik nutaanik paasineqarsinnaasoq ilassutigalugu.
Innuttaasut 85 procentiisa USA-mut ilanngunniarluni Naalagaaffeqatigiinniit aninissaq kissaatiginngilaat.
Grafik: Verian for Berlingske aamma Sermitsiaq
– Kalaallit Nunaata tuniniagaannginnerani USA-p niueqatiginerunissaanut periarfissatut isigineqarsinnaavoq. Tamannalu aamma Danmarkimit eqqumaffigineqarnerulernissamik piumassuseqarfigineqarnerulernissamillu aamma periarfissiivoq, taanna oqarpoq.
Piviusoq Trumpip oqariartorneranit allaaneruvoq
Kalaallit USA-mut ilaalernissaannut apeqqummut tunngatillugu, qinersisarneq pillugu ilisimatusartoq Københavnillu Universitetiani statskundskabimi professori Kasper Møller Hansen ima Berlingskemut oqarpoq:
– Tamanna Trumpip upperivaa. Kalaallilli matumani taama oqariartuuteqanngillat. Tamanna ersarissorujussuuvoq. Donald Trumpip siusinnerusukkut oqaatigisaanut tunngatillugu uani piviusup allarluinnaaneranik ersarissorujussuarmik uppernarsaatissaqarpugut.
- Amerikamioorusunngillat. Kalaaliorusupput, tamannalu isumasiuinermi uani ersarissorujussuuvoq.
Isumasiuineq Verianip Sermitsiaq Berlingskelu sinnerlugit suliaraa, taannalu piffissami januaarip 22-27-anut 2025-mi Kalaallit Nunaanni innuttaasut 18-it sinnerlugit ukiullit 497-it apersorneqarnerisigut ingerlanneqarpoq.
