Lisbeth Valgreen ph.d.-nngornialerpoq

Lisbeth Valgreen, Kalaallit Nunaanni Issittumilu ilisimatusarnermi cand.mag.-iusoq, allamik taaguuteqalissaaq. Tassami ukiortaareerpat ph.d.-nngorniatut imminut taasinnaanngussaaq.

Lars-Martin Sørensen, Det Danske Filminstitutimi ilisimatusarnermut immikkoortortami pisortaq peqatigalugu ilisimatusarnermut suliniummut ’Propaganda, dagens lektie, digital kulturarv – den danske stats film om Grønland og Danmark’-imut (Sunniiniarneq, ullormut ilikkagassaq, qarasaariatigut kulturikkut kingornussat - danskit naalagaaffiata Kalaallit Nunaat Danmarkilu pillugit filmiutaat, aaqq.) aningaasaliiffigineqarpoq.

- Kalaallit Nunaat pillugu filmit danskit naalagaaffiata 1900-kkunni sanasimasaasa ilaat misissoqqissaarniarpakka, nunarsuarmilu nunat akornanni politikkimut tunngassuteqarnerat eqqarsaatigalugu paasiniaqqissaarlugit, Lisbeth Valgreen AG-mut oqarpoq.

Filmit 1920-miit 1990-imut filmiliarineqartut Danmarkimi filmertarfinni, peqatigiiffinni atuarfinnilu takutinneqarsimasut misissugassarai.

- Kalaallit Nunaat qanoq ittoq danskit naalagaaffianit takutinniarneqarsimanersoq misissussavara, oqarpoq erseqqissarlugulu inatsisit tunngaviusut 1953-imi allanngortinneqarnissaata tungaanut Kalaallit Nunaat danskerpassuarnit tikikkuminaatsuusimasoq.

- Kalaallit Nunaannut isernissamut akuersissuteqaqqaartariaqarpoq, takornariatullu feriaannarluni angalaaginnartoqarsinnaanngilaq, nassuiaavoq.

Taamaammat Kalaallit Nunaat pillugu aalasuliat danskerpassuarnit takusassatuaasimapput.

- Tamakku misissornissaat pingaaruteqarpoq, filmimi oqaluttuat kingunerisaanik ullumikkut oqaloqatigiinniarneq ajornarnerulersillugu sunnerneqarsimasinnaammat, Lisbeth Valgreen oqarpoq, taanna Kalaallit Nunaata Danmarkillu akornanni atassuqarneq pillugu saqqummiussuinermik ukiorpassuarni suliaqarpoq.

Lisbeth Valgreen ph.d-nngorniarnermi nalaani Det Danske Filminstitutimi atorfeqassaaq. Suliniut Det Danske Filminstitutip Københavns Universitetillu suleqatigiillutik aallartippaat, Ilisimatusarfik aamma Kalaallit Illuutaat avataaneersutut suleqatigalugit.

- Ukiorpassuarni misilittakkakka atorlugit itinerusumik misissuinissara nutaanillu ilikkagaqaqqinnissara qilanaaraara, taanna oqarpoq.