Ane Hansen mianersoqqusivoq: Innuttaasunut akisoorujussuanngussaaq
- Qaasuitsup Kommunia avinneqarmat kommunip aaqqissuussaanera allanngortittariaqarsimavarput naleqqussarlugulu. Kommunerpummi mikisunnguuvoq innuttaasukillunilu, tamannalu pissutigalugu pisortat allaffissornerat naleqqussanngikkutsigu, ukiumut 50 millionit koruuninik amigartooruteqartassagaluarpugut, tamannalu pisussanngussaaq, kommunalbestyrelsip nutaap Qeqertaliup maannakkut aaqqissuussaanera atorunnaarsissappagu, Ane Hansen mianersoqqusivoq.
Kommune Qeqertalimmi borgmesteriusimasoq mianersoqqusivoq kommunalbestyrelsimut nutaamut: - Kommune Qeqertalimmi innuttaasunut akisoorujussuanngussaaq, kommunalbestyrelsip toqqassappagu kommunip aaqqissuussaanitoqaanut utertitsinissaq.
Assi: Jensine Berthelsen
Qaasuitsup Kommunerisimasaa avinneqarmat, Kommune Qeqertalimmi kommunalbestyrelsip pisortat ingerlatsiviisa kommunip angissusianut naleqqussarpai.
- Tamanna ilaatigut isumaqarpoq, pisortat amerlasuut atorunnaarsillugit pisortat marluinnanngortikkatsigit, tassalu pisortaaneq taassumalu tullersortaanut ikilisillugit, taamatullu ataatsimiititaliat pingasuinnanngorlugit ikilillugit, aningaasaqarnermut ataatsimiititaliap saniatigut, tamannalu ingerlatsinermut aningaasartuutinut sipaarutaavoq, Ane Hansen borgmesteriusimasoq nassuiaavoq nangillunilu:
Naleqqussakkamik aaqqissuussineq kommunip amigartooruteqangaatsiarnissaraluanit annaappaa
- Pisortat aqutsisullu ikilisinnerisa ilutigisaanik, qularnaarparput illoqarfiit sisamat tamarmik namminneq missingersuutinik aqutsinissaannik periarfissaqarnissaat, taamaalillutik kommunalbestyrelsip missingersuusiai sumiiffinni aqunneqarsinnaalersillugit. Taamaaliornikkut ingerlatsinermut sipaaruteqaatigaluta, innuttaasunut qanittumik ingerlatsisoqarnissaanik qularnaarinnilluta.
Ane Hansen nassuiaavoq, aaqqissuussineq naleqqussarsimanngikkaluarunikku, kommunip aningaasaqarnikkut unammilligassai annertusimassagaluartut:
- Aaqqissuussaaneq allanngortinnagu ingerlaannarsimasuugutta ukiut tamaasa naatsorsuutinut 50 millionit koruuninik amigartooruteqarnissarput aarlerinartorsiutigigaluarparput, tassa kommunip annertussusaanut innuttaasullu amerlassusaanut naapertuunnerusumik aaqqissuussisimanngitsuugutta amigartooorujussuartassagaluarpugut.
Taamaattumik Ane Hansen kommunalbestyrelsimut nutaamut mianersoqqusivoq:
- Kommunimi suleqatigiinniarlutik isumaqatigiissuteqartut siusinnerusukkut aaqqissuussaanermut utertitsiniarnerminni qanoq piviusunngortitsinissaminnik pilersaarutaannik aammalu aningaasaqarnikkut tamanna qanoq kinguneqassanersoq pillugu missingersuutinik takunikuunngilanga.
- Kisianni aaqqissuussaanitoqqamut utertoqassappat, taava aqutsisut, fagchefit 12-it missaanniittut soraarsinneqartariaqassapput, taakkulu pisortaat marluk ilanngullugit, tamatumalu kingorna ingerlatsivinnut pisortassat taakkulu tullersortissaat amerlasuut suliassaqarfinnilu assigiinngitsuni aqutsisisussat atorfinitsinniarneqarnissaat suliassaalissalluni.
Atugarissaarnermut suliniutit peerneqassappata kingunerluutaasinnaasut ernumassutigai
Ane Hansen aamma mianersoqqussuteqarpoq atugarissaarnerup qaffassarneqarnissaanut kommunip suliniutigisimasai atorunnaarsinneqassappata kingunerluuteqarsinnaammat:
- Innuttaasut atugarissaarnerat qaffassarlugu suliniuteqarsimavugut, tassanilu pinaveersaartitsinissamut suliniutit aallartinnikuullutigit. Kulturikkut pikialaartitsisarnernut aningaasaliissutit qulakkeersimavagut. Tamakku tamarmik innuttaasunut ataasiakkaanut aammalu ataatsimoornermut nukittorsaataassasut siunertaralugu.
- Kisianni takusinnaavara suleqatigiissallutik isumaqatigiissuteqartut suliniutit tamakku piiarneqarnissaannik siunertaqartut, innuttaasut periarfissanut sungiussileruttorfianni. Pitsaanerusunik suliniuteqartoqanngippat, kommunimi atugarissaarnerup qaffassarneqarnissaanut suliniutit kingunerluuteqarsinnaanerat ernumassutigaara.
Taakkuninnga tunngavilersuuteqarluni Ane Hansen kaammattuivoq kommunimi suleqatigiilersunut kaammattuuteqarpoq iliuuseriniakkaminnik eqqarsaatiginneqqilaassasut:
- Pilersaarutit naapertorlugit 2029-imi aaqqissuussineq nalilersorneqareerluni kommunit aaqqissuussaanerat nutarterneqartussaavoq, maanna suliarinnittoqarpoq innersuusiortussanik kommunit aaqqissuussaanerat qanoq allanngortinneqassanersoq, innersuussutillu Inatsisartut aalajangersaaffigissavaat siunissami kommunit qanoq aaqqissuussaassanersut. Isumaqarpunga pitsaanerpaassasoq Inatsisartut suliakkiutaata taassuma utaqqineqarnissaa kommunip aaqqissuussaanera annertuumik allanngortitilerneqannginnerani, taamaaliortoqanngippammi innuttaasunut kommunimiittunut akisoorujussuanngussaaq.
