Angajoqqaat erninermi sulinngiffeqarnerat sivitsorneqarpat ima akeqassaaq

Angajoqqaat erninermi sulinngiffeqarnerat sapaatit-akunnernik 16-inik sivitsorneqassappat, aningaasartuuteqarnerunissaq nalorninartoqartoq Isumaginninnermut Naalakkersuisup Jess Svanep Anna Wangenheimimut paragraf 37 atorlugu akissutaani allassimavoq.

Akissummi erseqqissarneqarpoq naatsorsuinerit missingersuusianik tunngaveqartut, siulittuutigineqarsinnaanngimmat angajoqqaanngortut qassit sulinngiffeqarsinnaatitaanertik tamakkiisumik atorumaaraat.

- Angajoqqaat sulinngiffeqartarnerannik sivitsuineq, maannakkut sulinngiffeqarnissamut periarfissat atorneqartarnerattuut annertussusilimmik, atorneqassappat, suliassaqarfimmi katillugit 11,9 mio.koruuninik annertunerusunik aningaasalersuinissamut pisariaqartitsineq qaffattussaasoq naatsorsuutigineqarpoq, Jess Svane allappoq.

Aningaasartuuteqarnerunerit 

Aningaasalersuinermut pisariaqartitsinerup qaffaatissat ukuupput:

• Ernereernermi sulinngiffeqartarnermut aningaasaateqarfimmut Amaat-mut, namminersortuni sulisunut ernereernermi sulinngiffeqarnermut matussusiisartumut, aammalu ullumikkut akitsuummit inuussutissarsiortut akilertagaannit aningaasalersorneqartumut, 5,3 mio. kr.-t.
• 6,6 mio. koruunit sinneruttut pisortani sulisunut, 2022-mi ernereernermi sulinngiffeqarnermi ullormusiaqarsinnaatitaasunut.
  

- Naatsorsuinerni taakkunani ullormusianik aamma aningaasarsianik utertitsilluni akiliutinik tigusisartut amerlassusaat siunissami taamaaginnassasoq tunngavissaatillugu, tunngavigineqarpoq. Sulisartut isumaqatigiissutaatigoortumik aningaasarsianik matussusiinissaq isumaqatiginninniutigineqassappat, inuit taakkua ikilisussaapput, paarlattuanik aningaasarsianut qaffattussaallutik, allassimavoq.

Ilanngullugu erseqqissaatigineqarpoq erninermi sulinngiffeqarneq sivitsorneqassappat akileraartarnermi isertitassat aamma annaaneqassasut. 

- Taamaattoq annaasassanut piffissami erninermut atatillugu sulinngiffeqarnerup nalaani aningaasarsisartut amerlassusaat apeqqutaasussaavoq. Agguaanermut tassunga nalunaarsuinermi paasissutissanik pioreersunik tamanna pillugu misissuisoqarsimanngimmat, lsumaginninnermut, llaqutariinnut, Suliffeqarnermut Nunamullu Namminermut Naalakkersuisoqarfik § 37 naapertorlugu apeqquteqaammut killissaliussat iluanni tamatuminnga misissuinissamik periarfissaqarsimanngilaq, allassimavoq.

Sunniutit ineriartortuartut

Angajoqqaat erninermi sulinngiffeqarnerisa sivitsorneqarneranni sunniutit ineriartortuartut uku aamma ilanngunneqarput:

• Meeqqat ulluunerani paaqqinnittarfiini utaqqisut ikinnerulernissaat.
• Inuiaqatigiit aningaasaqarneranni pilersitsisinnaassuseqarnermi annaasaqartitsisinnaavoq.
• Angajoqqaat ullumikkut paarsisussaqarnissamik periarfissaqannginneq pissutigalugu piffissami aalajangersimasumi suliffeqarnerup avataaniilertartut, pitsaanerusumik periarfissaqarpoq. suliffeqarnermiiginnartinneqarsinnaanissaat kiisalu isertitaqaannarnissaat.
• Nunatsinni ulluunerani paaqqinnittarfinni sulisunut perorsaanikkut aalajangersimasunik iluaqutissartaqarsinnaavoq.