Angallannermut pilersaarut: Ima iliorluta angallannermi unittoorneq pinngitsoortissavarput

Kommuneqarfik Sermersuumi Sanarfinermut Avatangiisinullu Ingerlatsiviup Nuussuarmi sullorsuup allilerneqarnissaa, aqqut pingasunik ingerlaarfeqalerlugu, kissaatigaa. Aqqut ataaseq sikkilertunut pisuinnarnullu ingerlaarfinngorlugu aamma bussit lastbiilillu sullorsuakkoorsinnaanngorlugit.

- Sullorsuaq pisuinnarnut qamutinullu motoorilinnut isumannaallisaaneq eqqarsaatigalugu annertuumik aarlerinartortaqarpoq. Tamatuma saniatigut bussit angallatillu allat angisuut sullorsuakkoorsinnaanngillat, taamaammat atorneqarsinnaanera killeqarpoq, angallannermut pilersaarummi nutaami naqissuserneqarpoq. Taanna  Illoqarfimmik Ineriartortitsinermut Sanaartornermullu Ataatsimiititaq septembarip aappaani saqqummiunneqarpoq.

Sullorsuarmilli alliliineq millionilikkaanik akeqartussaammat, suliniut politikkerit ukiorpassuarni unitsiinnartarsimavaat.

Illoqarfiup immikkoortuisa taakkua marluk akornanni angallannerup pitsaanerulersinnissaa qulakkeerniarlugu iliuuserineqartussat qulit pisariaqartinneqartut ingerlatsiviup suussusersivai, taakkualu ilaat aalajangerneqareersimapput suliarineqarlutillu.

- 2022-mi Qinngutsinni kaajallattariaq siullermiit Sipisaq Kangillermut agguaqatigiisillugu minutsinik tallimanik sivisussuseqartarpoq. Ulapaarfiup nalaani piffissaq agguaqatigiisillugu minutsinut 13-it missaannut sivisussuseqalersarpoq, Qinnguttalu alliartornerani tamanna suli sivisunerulernissaa, biilernermilu iluarusunnartuata apparnissaata periarfissanullu qanillinissaata tungaanut, naatsorsuutigineqassaaq, angallanneq pillugu pilersaarummi allassimavoq.

Aqqusinermi angallannerup annertusiartorneranut tunngatillugu iliuuserisassat qulit ingerlatsiviup saqqummiuppai:

1. Peter Thårupip ataani pisuinnaat aqqutaat pitsaanerusoq

Nuussuup Mannguata pisuinnarnut ataqatigiissitsiffittut atorneqarnerulerneratigut, kiisalu pinngortitap suli sukisaarsarfigiuminarnerulersinneratigut aqqutigiuminarnerulernera angallannermilu isumannaannerulerneq anguneqarsinnaasoq naatsorsuutigineqarpoq.

2. Eqalugalinnguani lydskrydsi nutaaq 

• Lyskrydsip suliaralugu aallartinneqarnissaa 2025-mi pissasoq naatsorsuutigineqarpoq.
• Viatrafikkimiit misilittaanerit naapertorlugit aaqqiissut atorlugu angallannermi isumannaatsuunermut aqqutiginissaanullu pitsanngorsaataassaaq. 
• Biilit sanioqqussinnaasut amerlanerulissapput.

3. Sarfaarsuit kaajallattariaata pitsanngorsarnera.

• Misissueqqaarnerit suli aallartinneqanngillat aamma pilersaarusiorneqanngillat.
• Iluarsiissuteqarnikkut immikkoortoq ingerlaffigiuminarnerulerlunilu angallannermi isumannaannerulissaaq.
• Biilit sanioqqussinnaasut amerlanerulissapput.

4. Sissaq sinerlugu aqqusineeraq immikkoortut pingajuat

• Sukisaarsarfimmut pilersaarummut atatillugu pilersaarut akuersissutigineqarpoq.
• Qernertunnguanut aamma Qernertunnguaniit tikeraanut innuttaasunullu aqqutigiuminarnerussasoq naatsorsuutigineqarpoq.
• Pisuinnaat biilinik angallattuniit ungasinnerulissapput.

5. Nuussuup Mannguaniit Nuussuarmut Industrivejimullu aqqut

• Industrivejimi aqqusineeqqakkut Nuussuarmiit Nuussuup Mannguanut aqqut maannakkut containerinik matoqqaneqarpoq.
• Nuussuup aqqusernata avannaata kitaata isuani inissiat ineriartortinneqarnerinut atatillugu, Nuussuarmiit Nuussuup Mannguanut aqquserniortoqarnissaa naatsorsuutigineqarpoq.
• Pisuinnaat pingaarnertut angallattut aqqutaanniit ungasinnerulersinneqassapput.

6. Talerpimmut sangunermut sillimmatigineqartoq (shunt)

• Pilersaarut Eqalugalinnguit eqqaanni lyskrydsimut atatillugu akuerisaavoq.
• 2024-mi lyskryds ilanngullugu pilersaarutitut immikkut neqeroortitsissutiginissaa naatsorsuutaavoq – sanaartorneq 2025-mi aallartissasoq naatsorsuutigineqarpoq.
• Biilit Sipisaq Kangillikkoorsinnaasut aqqutiginnerulersinneqassapput.

7. Kissarneqqortuunnguup Quassunnguullu akornanni krydsip pitsanngorsarnera

• Misissueqqaartoqarnikuuvoq taakkuli ullutsinnut naleqqutinngillat. Nutaamik misissueqqaartoqarnissaa innersuussutigineqarpoq.
• Pilersaarut nr. 7 shunt pilersinneqassasoq naatsorsuutaavoq, matumani kryds aqqusinerni angallattunut illoqarfiup tungaanukartut illoqarfimmiillu anillakaattunut tattoqisaatsitsiffiusussanngortussaavoq.

8. 400-rtallip eqqaani Nuussuarmilu sullorsuup eqqaani tummeqqat

• Tummeqqakkut inuit ajoqusertartut amerlassusaat ikilisinneqassasut naatsorsuutigineqarpoq.
• 2024-mi neqeroortitsissutigineqarnissaa naatsorsuutigineqarpoq.
• Pilersaarummut aningaasaqarneq eqqarsaatigalugu 5 millionit missaanniissasut missiliuutigineqarpoq.

9. Nuussuarmi sullorsuaq

• Sullorsuup pingasunik aqquteqarfiulersinnissaa, marluk biilit illuatungeriinnut aqqutillu pingajuat immikkoortoq cykelertunut pisuinnarnullu aqqutinngortinneqarluni.
• 400-rtalikkut illoqarfiup qeqqaniit qeqqanullu biilit ingerlaartartut amerleriarujussuarsinnaaneri naatsorsuutigineqarsinnaavoq. 
• Immikkoortumi angallannermi isumannaallisaanermut aqqutiginissaanullu malunnaatilimmik pitsanngorsaataasinnaavoq.

10. Mittarfiup tungaanut krydsip nutarterneqarnera

• Ulapaarfiup nalaani timmisartorsuullu mittarnerata nalaani angallattoqangaatsiartarsinnaanera naatsorsuutigineqarpoq.
• Misissueqqaartoqarnikuunngilaq, mittarfiup aqqutaata avannarliup ammarnerani suliarineqassasoq innersuussutigineqarpoq.
• Qinngutta tungaanut biilerpaaluit ingerlaarunnaarsinnaapput
  

Ingerlatsivik nalunaarusiami ima inerniliivoq:

- Allattorsimaffimmi suliniutigisassat tamaasa suliarineqarsimatillugit, biilit angallattuni ajalusoortoqartinnagu angallannerat pitsanngortinneqarsimassaaq. Suliniuterpaaluit naapertorlugit pisuinnaat biilit aqqutaanniit immikkoortinneqarneritigut ajornaannerusumik angallassinnaanngortinneqassapput. Biilit angallannerannut naatsorsuutigineqartumik sunniuteqartussanik annertuunik ingerlatsinernik sanaartornermilu aningaasartuutinik suliniutinut tamanut attuumassuteqartunik peqarpoq.

Sunniutai

Siunnersuummi erseqqissaatigineqarpoq, Qinngorput aamma illoqarfiup qeqqani aqqusineq immikkoortinneqarsimasoq, tassanilu iliuuseqartoqarnerani kinguneqartitsisoqassasoq.

Iliuusissatut pilersaarummit aqqut aaqqissuussinermi immikkoortutut isigineqarpoq. Periusissami matumani allannguinerit tamarmik angallannerup sinnerinut sunniuteqartarnissaat erseqqissaatigineqarluni.

- Assersuutigalugu aqqusinermi aalajangersimasumi biilertartut inissaqassusaat annertusigutsigu, immikkoortup eqqaani "angallattut ingerlariuseqarnerinut" allannguutitut malunniuteqartussaavoq. Biilertartut angallanneranniit cykelertunut pisuinnarnullu allannguutit pineqarsinnaapput. Taamaattumik suliaqarnivut tamaasa aqqusinerni aalajangersimasuni pissutsinik pitsanngorsaataaginnannginnissaat angallanneq ataatsimut isigalugu pitsanngorsaataanissaattaaq sunniutaasut malinnaaffigeqqissaarneqarnissaat aalajangiisuusussaavoq, ingerlatsivik allappoq.

Ataatsimut angallanneq pisuinnarnullu suliniutit soorlu ilinniartitsinerit, paasititsiniaanerit assigisaalu ukkatarineqassasut aamma innersuussutigineqarput.

Angallanneq peqataatitsinerusoq

- Suliniutit pineqartut aningaasatigut nammatarineqarsinnaapput malunnaatilimmillu pitsanngorsaanissamut periarfissaqarluarlutik. Suliniutit aningaasaliiffigineritigut angallanneq isumannaannerusoq peqataatitsinerusorlu angusinnaavarput, pilersaarummi kommunalpolitikerinut saqqummiussami allassimavoq.

Angallannermut pilersaarut ataatsimiititaliami politikerinit tusaatissatut tiguneqarpoq, taannalu kommunalbestyrelsip tamarmiusup angallannermut unammilligassat pillugit isummerfigitinnagit aningaasaqarnermut ataatsimiititaliap ataatsimiinnerani oqaluuserineqartussanngorput.