Angut 34-nik ukiulik kokainimik eqqussisimasutut ukiut sisamat affarlu pineqaatissinneqarpoq

Angut 34-nik ukiulik ikiaroornartuutilik Kangerlussuarmi ilanngaaserisumit tigusarineqareernermi kingorna ukiuni sisamani qaammatinilu arfinilinni pineqaatissinneqarsimasunut ataasinngornermi juunip 17-ani inissiisarfimmiittussanngortinneqarpoq.

Kalaallit Nunaanni Politiit tusagassiuutinut taama nalunaaruteqarput.

Angut 34-nik ukiulik Kangerlussuarmi ilanngaaserisuniit ataasinngornermi juunip 17-ianni unitsinneqarpoq. Angutip timaa skannerneqarnerani timaaniittoqartoq takuneqarpoq, kingornalu kokainimik 167,5 grammimik timaaniittoqartoq paasineqarpoq.

Unnerluutigineqartoq Sermersuup Eqqartuussiviani eqqartuussisumut pingasunngornermi juunip 19-iani sassartinneqarpoq. Tassani pisimasoq nassuerutigaa ikiaroornartunik eqqussuisimasutullu pisuutinneqarluni ukiuni sisamani qaammatinilu arfinilinni pineqaatissinneqarsimasunut inissiisarfimmiittussassanngortinneqarluni.

- Kalaallit Nunaanni Politiit ilanngaaserisut qanimut suleqatigaat, taakkulu ikiaroornartunik nunamut anngiortumik eqqussisunik paasiniaanermik annertuumik suliaqarput, Kalaallit Nunaanni Politiini paasiniaanermut immikkoortortaqarfimmi pisortaq politikommissæri Malik Sandgreen oqarpoq.

Aanngajaarniutit sakkortuut pillugit suliat marluk

Aanngajaarniutinik sakkortuunik eqqusseriaraluarsimasutut qaammatip ataatsip ingerlanerani aappassaat ingerlaannaq pineqaatissiisoqarpoq.

Kalaallit Nunaanni Politiit pisoq ilungersunartutut isigaat:

- Kalaallit Nunaanni Politiit suliat ilungersunartutut isigaat, aanngajaarniutinik timimut anngiortumik eqqussisut inuunerat peqqissusaallu navianartorsiortinneqarsinnaammata. Taamaattumik ernumanarpoq aanngajaarniutinik sakkortunik Kalaallit Nunaannut anngiortumik eqqussinerit amerliartornerat, Malik Sandgreen oqarpoq.

Angut 34-nik ukiulik eqqartuunneqarami pillaatisiassaminik naammassinninnissaa tikillugu suli tigummineqassaaq.