KL

DK

Angut 61-inik ukiulik qulingiluanik ukiulimmut pinngitsaaliisimasutut piffissaligaanngitsumik tigummigallarneqartussatut pineqaatissinneqarpoq

Angut 61-inik ukiulik piffissaligaanngitsumik tigummigallagassanngorlugu Qaasuitsup Eqqartuussivianit pineqaatissinneqarpoq, ilaatigut niviarsiaqqamik taamani qulingiluanik ukiulimmik pinngitsaaliisimasutut eqqartuunneqarluni.

Fotograf Leiff JosefsenBox 7034,3905 Nuussuaq.Tlf.: +299552710 / +299383973
Dorthea Reimer-Johansen
Journalist
Offentliggjort

Qaasuitsup Eqqartuussiviani ullumi sisamanngornermi juulip 25-ani angut 61-inik ukiulik niviarsiaqqamik taamani qulingiluanik ukiulimmik angerlarsimaffimmini arlaleriarluni pinngitsaaliisimasutut unnerluutigineqarpoq.

Angut 61-inik ukiulik niviarsiaqqamut qulingiluanik ukiulimmut pinngitsaaliillugu arneriffiginninniarsimasutut kanngunartuliorfiginnissimasullu aamma unnerluutigineqarpoq.

Pinngitsaaliinerit ukiuni 2020-miit 2022-mut pipput, Kalaallit Nunaannilu Politiinut maajip ulluisa 23-ani siorna unnerluutigineqarlutik.

Angut maajip ulluisa 24-anili 2023-imi tigummigallarneqalerpoq.

Eqqarsartaatsikkut misissuineq

Angut maanna 61-inik ukiulik tarnikkut eqqarsartaasaa misissorneqarpoq, misissuinerillu inerneri tunngavigalugit eqqartuussinermi nakorsat siunnersuisooqatigiivi isumaliutissiissummik oqaaseqaateqarput. 

Eqqartuussinermi tarnikkut misissuinermi nakorsat siunnersuisooqatigiivisa oqaaseqaataat unnerluussisussaatitaasut eqqartuussivimmi tigummigallarneqarnissaanik piumasaqarnerannut pissutaaqataavoq.

61-inik ukiulik pinngitsaaliisimasutut, pinngitsaaleeriarsimasutut kannguttaatsuliorsimasutullu pisuutinneqarpoq.

- Suliaq pingaaruteqarluinnarpoq, tassani niviarsiaraq qulingiluanik ukiulik inersimasuniit sakkortuumik pineqartarsimavoq. Tamanna Kalaallit Nunaanniit pingaaruteqarluinnartutut isigivarput. 

- Politiit peqqissaartumik suliaminnillu ilisimasaqarluarlutik misissuisimapput, tamannalu pissutigalugu angut 61-inik ukiulik ullumikkut pinngitsaaliisimasutut eqqartuunneqarpoq, unnerluussisoq immikkut ilisimasalik, Gutti Harryson eqqartuussivimmi suliamik ingerlatsisoq oqarpoq.

Killiligaanngitsumik

Eqqratuussiviuk unnerluussisussatitaasut saqqummiussinerat uppernartutut isigaat, taamaattumillu angut killiligaanngitsumik tigummigallarneqartussatut eqqartuunneqarluni, tamanna Gutti Harrysonip iluarisimaarpaa:

- Qulingiluanik ukiulimmut pinngitsaaliisimanerup saniatigut eqqartuunneqartoq assingusumik pineqaatissinneqartareerpoq. Taamaattumik isumaqarpunga angut inuiaqatigiinnut ulorianartuusoq, tamannalu eqqartuussiviup isumaqatigaa.

Eqqartuussineq naammassimmat pineqaatissinneqartoq eqqartuunneqarnini suliassanngorteqqissanerlugu eqqarsaatigeqqaarumavaa.

Eqqartuussivik aalajangerpoq pineqaatissinneqartoq suliassanngortitseratarsinnaanerata tungaanut tigummigallarneqassasoq.

qaasuitsup kredsret politi inuiaqatigiit samfund voldtægt

ATORFIIT Se alle jobs

Powered by Labrador CMS