Kielsen Ilulissani mittarfittaaq pillugu: Pilersaarut naqqup ataani suliaraarput

Ilulissani mittarfittaarnermut atatillugu illoqarfiup timersortarfiani, sisamanngornermi unnukkut persuarsiorpalaartumik nerersuaaqatigiittoqarpoq. Unnummi oqalugiartussaaleqisoqanngilaq. Taakkununnga Inatsisartut Siulittaasuat, Kim Kielsen (ATT) ilaavoq. 

- Kalaallit Nunaat pilluarit. Isaavik nutaaq nunatsinnut ammarpoq, Kim Kielsen oqarpoq.

Taassuma Nuummi, Ilulissani Qaqortumilu mittarfiliornissat pillugit inatsit, Naalakkersuisunut 2018-imi siulittaasuulluni siuttuuffigaa. Inatsit 2018-imi novembarip 15-ani taamani naalakkersuisoqatigiinnit, Siumumit, Nunatta Qitornaanit, Atassummit kiisalu naalakkersuisoqatigiinnut ikorfartortaasunit, Demokraatinit Inatsisartuni akuerineqarpoq. Inuit Ataqatigiinnit amerlanerussutillit, Suleqatigiissitsisut Nalerarlu taamani akuersinngillat. Inuit Ataqatigiinnit ilaasortat marluk taaseqataanngillat.

AAMMA ATUARUK

Jens-Frederik Nielsen: Nunarsuarmut aqqut nutaaq pilersinneqarpoq

- Amerlanerussuteqartut siunissarput upperigamikku aalajangerpaat. Qujanaqaaq! Kielsen nerersuaaqatigiittunut oqarpoq.

Kielsen: Thomsen pilersaarusioqatigaara

Kim Kielsenip Ilulissani mittarfiliornissaq illoqarfiup akunnittarfiisa ilaanni pilersaarusiorneqarsimasoq oqalugiarnermini oqaluttuaraa. 

- Ikinngutiga ataaseq aatsaaginnaq aamma eqqaaneqarpoq. Maaniinngitsoq. Niisi. Niels Thomsen.

- Niels Thomsenilu (Demokraatit taamani siulittaasuat, aaqq.) mittarfissuit pillugit pilersaarut Hotel Arctic-imi suliaraarput. Naqqup ataani issiaqatigiippugut. Avannaata qanoq ineriartortinneqarnissaa pillugu takorluuinerput oqaloqatigiissutigaarput, Kim Kielsen oqalugiarnermini eqqaamasalersaarpoq.

Inuusuttut kaasimaaginnaqqunngikkai

Kim Kielsen minutsit arfineq-marluk missaanni sivisussusilimmik oqalugiarpoq. Oqalugiaammi sivisunerpaartaani inuusuttut siunissarlu pillugit oqaaseqartaqattaarpoq. Mittarfik nutaaq atorluarneqassasoq nunaqavissunillu siuttuuffigineqassasoq kissaatigaa.

AAMMA ATUARUK

Aningaasaqarnermut ministeri: Mittarfik immitsinnut qaninnerulersitsivoq

- Qinikkatut angajoqqaatullu sakkussassinnik tunivatsigit. Ineriartortitsinermi atorluartariaqarpasi aamma siuttuuffigisariaqarpasi. Uagutsitut inissisimassanngilasi, isiginnaartuinnartut ilaatigut inissittarnikuugatta. Taamaassanngilaq. Ilissi pisussaaffeqarpusi kivitsissallusi.

- Kaasimaaginnartoqarsinnaanngilaq. Atsipaagut tagiartorlugit suleqataasariaqarpugut.

Inatsisartut Siulittaasuata kikkunik ineriartornermi kikkunnik tamanik inissaqartitsinissaq takorusuppaa. Imminulli pisuuteqattaarnissaq ineriartornermi takorusunngilaa. Naak nunaqavissut siuttuunissaannik oqariartuuteqaraluarluni suleqateqartariaqarneq avaqqunneqarsinnaanngisoq aamma oqaatigaa.

- Ammip qalipaataa eqqarsaatiginagu, maani nunaqqatigiittut pisussaaffipput naapertorlugu kivitseqatigiissaagut aamma ikorfartueqataassuugut. Nukiit imminnut aporaatsinnissaannut piffissaanngilaq. Maani kisiartaalluta inissisimasinnaanngilagut, suleqatigiilluta nukittorsaasariaqarpugut, Kim Kielsen oqarpoq.