Angut imigassartorsimalluni umiatsiarsimasutut unnerluutigineqartoq
Uummannami umiatsiamik sapaatip ullaavani angalaneq ajorluinnartumik kinguneqarsinnaagaluarpoq. Sumiiffimmi ujaasisoqareersoq angut Uummannamiittoq imigassartorsimalluni umiatsiamik angalasimasutut unnerluutigineqarpoq. Imigassartorsimallutik umiatsiamik angalasoqaqqunagu Politiit kajumissaarutigaat, tamannami alianartumik kinguneqarsinnaammat.
Angut imigassartorsimalluni umiatsiaararsimasutut unnerluutigineqarpoq. Angutip umiatsiaa inuttaqanngitsoq nassaarineqarpoq, angulli kingusinnerusukkut Uummannap kangerluani sikumi nassaarineqarluni.
Toqqorsivimmit assilisaq: Leiff Josefsen
Angutip umiatsiaa Uummannap kangerluani inuttaqanngitsoq nassaarineqareersorlu angut imigassartorsimalluni umiatsiamik angalasimasutut politiinit unnerluutigineqarpoq. Angut umiatsiarnermini imaanut nakkarnermi kingorna nammineerluni sikumut qaqisimavoq.
- Umiatsiaq sukkasuumik ingerlaartoq iluliamut aporsimasoq sapaammi ullaakkut nalunaarfigineqarpugut. Nalunaarut nalunaaqutaq 07.42 tiguarput. Aalisartoq sumiiffimmi tassani angalasoq umiatsiamit sukkasuumik ingerlasumit aporneqangajassimavoq, Kalaallit Nunaanni Politiini pigaartut pisortaat Carl Sværd Sermitsiamut oqarpoq.
Aalisartup umiatsiap takulluarnerani paasivaa angallat inuttaqarani kaavilluni ingerlasoq.
- Aalisartup kinguninngua nipituumik aporpallak tusarpaa, sumiiffimmikaramilu paasivaa umiatsiaq iluliamut aporsimasoq. Pisoq politiinut nalunaarutigineqarpoq, pigaartut pisortaa oqarpoq.
SAR-imik annaassiniarneq aallartinneqartoq
Nalunaarutiginninnerup kinguninngua politiit ujarlerlutik aallartipput. Qulimiguulik Uummannap tungaanut ingerlavoq, Issittumilu Sakkutooqarfiup umiarsuaa alapernaarsuut aamma aallartinneqarluni.
Umiatsiap aportup inuttaa ujaaralugu politiit aallartippaat.
- Qujanartumik aalisartut arlallit sumiiffimmi ujaasilerput, Aasiaat Radioalu aqqutigalugu ujaasineq aallartinneqarluni. Nalunaaqutaq 09.15 umiatsiaaqqamik piginnittoq sikumiittoq nassaarineqarpoq. Taanna imaanut nakkarsimavoq, sikumullu nammineq qaqisimalluni.
- Angutip timaa nillortingaatsiarsimavoq, ajunngilarli. Kingorna Uummanniaanneqarpoq napparsimmaviliaanneqarlunilu, Carl Sværd oqarpoq.
Angut umiatsiamik ingerlatsinermini imigassartorpallaarsimasoq misissuinerup takutimmagu taanna imigassartorsimalluni umiatsiarsimasunut unnerluutigineqartoq Politiit ilisimatitsipput.
- Angalasut imigassartorsimallutik angalasaqqunagit kajumissaarusuppagut. Avatangiisinut ulorianartuuinnarani aamma imigassartorsimallutik angalasut inuunerminnik annaasaqartarput, Carl Sværd oqarpoq.
