Angut pinngitsaaliisimasutut pasineqartoq tigusarineqarpoq

Angut Sermersuup Eqqartuussiviani tigummigallarneqarnissaa ataasinngornermi aalajangerneqartoq pigaartut pisortaata Aputsiaq Hansenip Sermitsiamut ilisimatitsissutigaa.

Pigaartut pisortaat suliaq pillugu maannakkut itinerusumik oqaaseqarsinnaanngilaq, angutilli pinngitsaaliilluni atoqateqarsimasutut kannguttaatsuliorsimasutullu unnerluutigineqartoq pinerlunnerlu Nuummi pisimasoq oqaatigaa.

Politiit ullormi kingullermi allanik arlalinnik aamma suliaqarsimapput.

Sisimiuni qamuteralannik marlunnik tillinniartoqarneranik politiinut nalunaarutiginnittoqarsimavoq.

Aserorterinerit, angerlarsimaffinni eqqissiviilliornerit, inunnik kissaatiginngisanik peersitsinerit, nakuusernerit aqqusinermilu eqqissiviilliornerit aamma nalunaarutigineqarsimapput.

Aamma Nuummi Brugseni Nuukullammut tillinniartoqarsimasoq nalunaarutigineqarpoq. Tillinniartoqarneranik kalerrisaarineq marlunngornerup unnuaani nal. 01.40 aallartippoq. Politiit pisoq suli misissuiffigaat.