Angut tillinniarsimasoq tigusarineqartoq - avannaanilu annaassiniartoqartoq

Ulloq unnuarlu kingulleq Kalaallit Nunaanni Politiit annertunerusunik suliassaqarsimanngitsut, pigaartut pisortaat Aqqaluk Petersen oqarpoq.

Oqaluttuarisinnaavaali Nuummi sisamanngornerup unnuaani tillinniartoqarsimasoq, tamatumunngalu atatillugu tillinniartoq politiinit tigusarineqartoq.

Angut tigummigallarneqarnissaq siunertaralugu eqqartuussivimmi sassartinneqassanersoq oqartussat ullaap tungaani nalilersorpaat, kisiannili politiit pigaartuisa pisortaata suliaq pillugu maanna annertunerusumik oqaaseqarfigisinnaanngilaa, paasiniaaneq suli ingerlammat.

Qaanaap avannaani annaassiniartoqartoq

Politiit Issittumi Sakkutooqarfik suleqatigalugu Qaanaap avannaani sapaatip akunnerani matumani marlunngornermi unnukkut annaassiniarput.

- Umiatsiat marluk katillugit tallimanik ilaasoqartut InReach atorlugu ikioqqupput, ilaasoq ataaseq aqqunartitersimammat, Issittumi Sakkutooqarfik Facebookimi allappoq.

Timmisartoq Challenger annaassiniutinik ikiueqqaarnermullu atortunik nassataqarluni ajutoorsimasut ornippai.

Tamatuma kingorna Air Greenlandip qulimiguua sikumut mippoq aqqunartitersimasorlu taamaasilluni angallanneqarsinnaasimalluni.

Annaassiniarnermit assit Issittumi Sakkutooqarfiup quppernerani takuneqarsinnaapput: