Angutit imminut tatigisut nukittuullu Qeqertaliup ineriartortikkusuppai

Kalaallit Nunaanni Naatsorsueqqissaartarfiup kisitsisaatai naapertorlugit Kommune Qeqertalimmi angutit  2.100-it sinnilaarlugit amerlassusillit sulisinnaasutut isumalluutigineqarsinnaapput. Taakkunannga 1.346-it (2022-mi kingullermik naatsorsuineq) qaammammut agguaqatigiissillugu suliffeqarput.

Kisitsisit takutippaat amerlasuut sulisinnaasut suliffissarsiorlutik sulilersinneqarsinnaasut, tassami aamma Kommune Qeqertalik sulisussaaleqiffittut eqqugaaqqavoq.

- Kisianni angutit suliffeqarnermut ilanngunnissaat kisimi pineqanngilaq, aammali angutit ikiorneqarnissaat pingaaruteqarpoq, tassami nalaataminnik kingunerlutsitsisimasut imaluunniit allatigut ajornartorsiutiminnik aniguiniarsinnaanissaminnut sakkussaminnik tunineqarnissaat eqqanaarniarlugu sulissutiginnippugut, borgmesteri Ane Hansen (IA) oqaluttuarpoq.

Qaammaavimmik iluatsitsineq

Ane Hansen oqaluttuarpoq, Kommuni Qeqertalimmi suliniutigineqartoq innuttaasut tarnikkut imaluunniit katsorsartinnissamik pisariaqartitsisut, tarneq pillugu ilisimasalinnit terapeutinilluunniit ikiorneqarnissaat qulakkeerneqassasoq.

Tamanna pivoq Qaammaavimmik taallugu aaqqissuussinikkut, taannalu tassaavoq ataatsimut attaveqarfik, tassani neqeroorutigineqarput assigiinngitsut pingaarutillit ataatsimoortut - ilanngullugit katsorsaaneq, atuarfinnik suleqateqarneq ilinniartitsinermut tunngasunik suliassaqarfinnillu, oqaloqatigiinnerit, ilaqutariinnut siunnersuineq kiisalu tarnip pissusaanik ilisimasalinnik katsorsaasartunillu neqeroorutit.

- Assersuutigiinnarlugu maanna sulissutigaarput tarnip pissusaanik ilisimasallit aqutaannik teamsikkut (internetikkut) katsorsaaneq, taamaalilluni nunaqarfinni illoqarfinnilu innuttaasut neqeroorfigineqartut katsorsaasinnaanngorlugit nunagisaminnit aallartinngikkaluarlugit. Taannalu neqeroorut innuttaasunit nuannaarutigineqarpoq, Ane Hansen oqaluttuarpoq.

Suliniut Angutivik

Angutit misigissutsit pillugit tunuarsimaarnerusarmata ikiorneqarnissamik qinnuteqarnissaat ajornakusoornerusartoq nassuerutigalugu, angutit nalaataminnit inuunerminni anniaateqartut anguniarlugit Kommune Qeqertalimmi allatut iliuuseqarput.

- Suliniut siorna aallartipparput, angutit nukittuut aammalu anguteqatiminnut maligassiuisinnaasutut inissisimasut katersuutsillugit. Angutit taakku nunaqarfinni illoqarfinnilu angalapput anguteqatitillu naligisutut oqaloqatigalugit. Angutit taakku nukittuut maligassiuisinnaasutullu inissisimasut nalaattakkatik pillugit isertuaratik oqaluttuartarput, taakkulu aqqusaarsimasatik pillugit oqaluttuarnerminni aamma ersersippaat nalaatatik pillugit nanertisimasinnaasarlutik, taamaattorli taamatut nalaataqaraangamik qaangiiniarnissaminnik sakkussaqalersimallutik, tamannalu angutinit assut tigulluarneqarpoq, tassa angutitatta nukittorsarnissaminni sakkussaminnik pisariaqartitsisut suliniut assut tigulluarpaat.

Tassunga atatillugu Ane Hansen oqaluttuarpoq, niviarsiaqqat nukappiaqqallu "aaqqissuussaanermiit sumiiffeerunneqartartut" agguataarnerat takuinnarneqarsinnaasoq, tassa ilinniakkamik ingerlatsinngitsut suliffeqarnermillu ingerlataqanngitsut kiisalu pisortanit aningaasatigut ikiorserneqanngitsut kisitsisisaasa takutippaat nukappissat angutillu inersimasut tassaakkajuttartut inuiaqatigiit isumaginninnikkut periarfissarititaannit anillassimasartut.

Pinerluttuliornermut aarlerinartorsiorfik annertooq

- Kisianni angutit suliffeqarnermit ilinniarnermillu tammaannartanngillat, tassami pinerluttulerinermik kisitsisit ersersippaat, angutit inuusuttut inersimasullu pinerluttulerinermut saannissaminnut aarlerinartorsiornerusartut, tamatumalu saniatigut ilinniagaqalernissamik toqqaasarnermi angutit ikinnerussuteqartartut paarlattuanillu amerlanerussuteqartartut assersuutigiinnarlugu hashpsykosimik eqqugaasimasuni, borgmesteri oqaluttuarpoq nangillunilu:

- Taamaattumik kommunitsinni angutinut immikkut suliniuteqarpugut. Misigaarput suliniuterput Angutivik angutit kingunerlutsitsinerannut aliasunnerannullu pissutaasartunut ammaasimasoq, taakkua pitsaasumik misilittagaqalersimapput misigissutsitik nukittorsarlugit, amerlasuullu angutit oqaaseqarsinnaalersimapput inuuneq annernarpallaaleraangat sooq kamannermut matoqqasunngornermullu saattarnerlutik.

Ane Hansen oqaluttuarpoq, suliniut aallarteqqammertoq angutinik eqimattanngortitsillutik katersuiniarlutik misiliisarsimagaluarlutik, kisianni angutit tamanna soqutiginngilaat orniginartinnalugulu. Tamatuma kingorna Qaammaavimmit tarneq pillugu ilisimasallit terapeutillu oqaloqatiginninnermik katsorsaanermillu ingerlataqartinneqarnerisigut paasinarsivoq, tassaasoq angutit qajannartumik inissisimasut pisariaqartissimasaat, juunimilu internettikkut katsorsaavik Qasigiannguani ammarneqarpoq, tassanilu avataarsualiartartoq Andreas Mogensen peqataavoq, ilaatigut taanna oqaluttuarpoq sulinermini isumannaallisaanermi misigissutsikkut unammilligassat qanoq ittuusinnaasut.

- Misigaanga angutit amerlasuut qajannartumik inissisimasut, qallikkullu manngertisimasunngorsimasut, suliniummi peqataanerminnik annertuumik qujamasuttartut, taakku unnersiortarput annertusiartuinnartumik inuunerissaalersimallutik aammalu nukiit pissarsiatik najukkami suliniutitsinnut aammalumi inuiaqatigiinni nammatassatsinnut peqataarusussertik utersimasoq Kommune Qeqertalimmi borgmesteri, Ane Hansen (IA) oqaluttuarpoq.

Suliniut Angutivimmi peqataasut ilaasa oqaluttuarnerat uani paasisaqarfigisinnaavat.