Angutit marluk hashimik 11 kilo sinnerlugu oqimaassusilimmik eqqusseriaraluarsimasutut eqqartuunneqartussanngorput
Angutit marluk hashimik 11,8 kilomik Danmarkimit Kalaallit Nunaannut eqqusseriaraluarsimasutut containerinullu toqqorterisimasutut unnerluutigineqarlutik eqqartuunneqassapput. Angutit marluk taakkua aappaa ukiumi ataatsimi qaammatinilu arfinilinni aappaalu ukiuni tallimani qaammatinilu arfinilinni pineqaatissinneqarsimasunut inissiisarfimmiittussanngortinneqassasut, unnerluussisussaatitaasut piumasarivaat.
Angutit marluk 44-nik 50-inillu ukiullit hashimik 12 kilongajammik eqqusseriaraluarsimasutut unnerluutigineqarput, taakkulu Sermersuup Eqqartuussiviani tallimanngornermi juulip aqqaneq-aappaanni eqqartuunneqartussanngorput.
Assi: Leiff Josefsen
Angut 44-nik ukiulik aamma angut 50-inik ukiulik hashimik Danmarkimit eqqusseriaraluarsimasutut unnerluutigineqarlutik tallimanngorpat juulip aqqaneq-aappaanni Sermersuup Eqqartuussiviani eqqartuunneqassapput.
Unnerluussissutigineqartut naapertorlugit angutit taakku marluk upernaaq ataatsimoorlutik hashi katillugit 11 kilomik 796,2 grammimillu oqimaassusilik nassiuppaat. Marloriarlutik nassiussisimapput.
Unnerluussissut naapertorlugu angut 50-inik ukiulik 2024-mi marsip 18-iani hashimik 6 kilomik 804,8 grammimillu Danmarkimit Kalaallit Nunaannut eqqussisimavoq, tassanilu Danmarkimit nassiussinissamik Kalaallit Nunaannilu tiguneqarnissaanik pilersaarusiorsimalluni. Nassiussineq suliami unnerluutigineqartut aappaata pinerluuteqartullu arlallit maannakkut ilisarineqanngitsut peqatigalugit aaqqissuunneqarsimavoq, allassimavoq.
Millionilikkuutaanik isertitsissutaasinnaasimasut
Apriilip sisamaani nassiussat aappaat nassiunneqarsimavoq. Tassani allassimavoq angutip aappaata „hashi 4 kilo 991,4 grammilu Danmarkimit Kalaallit Nunaannut eqqussimagaa,... Kalaallit Nunaanni containeri hashimik imalik Danmarkimit tigusussaagaluarlugu tigusinnaasimanngilaa, politiimmi eqqussineq paasigamikku hashi arsaarinnissutigisimavaat“.
Unnerluussissutigineqartut naapertorlugit nassiussat taakku 2.495.500 koruunit ataannagit isertitsissutaasinnaasimapput.
Angut 44-nik ukiulik ukiumi ataatsimi qaammatinilu arfinilinni 50-inillu ukiulik ukiuni tallimani qaammatinilu arfinilinni pineqaatissinneqarsimasunut inissiisarfimmiittussanngortinneqassasut unnerluussisut piumasaraat. Suliap aningaasartuutaanik unnerluutigineqartut namminneq akiliinissaat aamma piumasarineqarpoq.
