Vera
Hansen, Paamiuni inunngorlunilu Aasianni Nuummilu peroriartortoq, 30-it
sinnerlugit ukioqarluni Danmarkimut nuuppoq.
Taanna Nuummi Niuernermik
Ilinniarfimmi allaffissornermik ilinniagaqarpoq, taamaammallu Danmarkimi
suliffittaarnissaminut atorsinnaallugu naatsorsuuteqarpoq.
Vera
Hansen, Paamiuni inunngorlunilu Aasianni Nuummilu peroriartortoq, 30-it
sinnerlugit ukioqarluni Danmarkimut nuuppoq.
Taanna Nuummi Niuernermik
Ilinniarfimmi allaffissornermik ilinniagaqarpoq, taamaammallu Danmarkimi
suliffittaarnissaminut atorsinnaallugu naatsorsuuteqarpoq.
Ajornakusoortorli
paasivaa.
– Ilinniakkagut Danmarkimi atorneqarsinnaanngillat, tassungalu
ilanngullugu kalaallit pillugit pigiuliutanik isumaqartorpassuaqarpoq. Danmark
nunarujussuulluni suliffissarpassuaqartoq isumaqarsimagaluarpunga, suliffinnulli
60-init amerlanerusunut qinnuteqaraluarlunga oqaloqatiginninngilangaluunniit, oqaluttuarpoq.
Assigiinngisitsineq
Vera Hansen taamaammat ilinniaqqinniarluni aalajangerpoq. Aalborgimi
niuernermik ilinniarfimmi ilinnialerpoq, ilinniarfilli takorluugaaniit allaanerummat
malinnaaniarneq ajornakusoortippaa.
– Niuernermik ilinniarfimmi assigiinngisitsineq misigaara.
Assersuutigalugu oqarfigisarpaannga: ”Kumoorn kalaaleq, ullumikkut
tallimanngornermi imerniartarfiliassamaarpit?” Tallimanngornermi imerniartarfik
sunaasorluunniit naluara. Ilinniarunnaaginnarpunga. Taarsiullugu
isumaginninnermi peqqissaanermilu ikiortitut tunngaviusumik ilinniakkamut
qinnuteqarpunga. Ajoraluartumik misiliiffissattut suliffissarsinngilanga. Kingorna
perorsaasunngorniarnermi tunngaviusumik ilinniakkamut qinnuteqarpunga,
tassungali aamma misiliiffissattut suliffissarsinngilanga.
Kommunemiit tapersersorneqarneq
Vera Hansen ullumikkut eqqiaasutut sulisarpoq. – Ukiuni kingullerni aqqaneq-marlunni assigiinngitsorpassuarnik
suliffeqarnikuuvunga. Allaffimmi, meeqqerivimmi atuartitsinermilu
sulinikuuvunga. Isumassuinermi ikiortitut, isumaginninnermi peqqissaanermilu
ikiortitut aamma sulinikuullungalu maanna eqqiaasuuvunga.
Vera Hansen suliffissarsinissaminut kommunemiit ikiorneqarusussimagaluarpoq, taamaammallu
kalaallinut Danmarkimiittunut suliffeqanngitsunut aningaasaliissutinik 3 mio.
koruuninik immikkoortitsisoqarsimanera tusarlugu naammagisimaarinnippoq. Aningaasaliissutinut kommunet qinnuteqarsinnaapput, taakkulu 2024-mi decembarip
aallaqqaataaniit atorsinnaalissapput. Aningaasat ilaatigut
danskisoorsinnaanerup pitsanngorsarnissaanut, naleqquttunik
pikkorissarnissanut, pikkorissarnerit aningaasalersornissaannut, suliffeqarfiit
Danmarkimiittut ileqquinik paasinninnissap annertusarnissaanut Kalaallit
Nunaannilu inuussutissarsiornermi misilittakkat Danmarkimi suliffeqarfiit
paasisinnaasaannut nutsernissaannut ikiorneqarnermut atorneqarsinnaapput.
– Danskit inuiaqatigiivini inissilluarnissatsinnut kommunet ikiuunnissaat
pingaartuusoq isumaqarpunga. Sulisoqarfik Kalaallit Nunaanni sulisoqarfimmiit
allaanerulluinnarpoq, Vera Hansen oqarpoq.
