Aningaasanik millionilikkaanik peqqinnissaqarfimmut ikiortarialimmut danskit naalakkersuisui tunniussaqarniarput
Kalaallit Nunaannut peqqinnissamut aningaasaliissutinut nutaanut 2025-mit 2028-mut katillugit 140 millionit koruunit immikkoortinneqassasut, danskit naalakkersuisuisa siunnersuutigaat.
- - Kalaallit Nunaanni peqqinnissaqarfik ilungersunartumik inissisimaffeqarlunilu ukiuni aggersuni allannguerujussuartussaavoq. Taamaattumik naalakkersuisunit kalaallit aningaasaqarnikkut ikiorserusuppavut, peqqinnissamut ministeri Sophie Løhde, Venstre, oqarpoq.
Assi: Folketinget
Ukiup aappaa avillugu matuma siorna – marsimi 2023-mi – peqqissutsimut naalakkersuisuusimasoq Mimi Karlsen (IA) peqqinnissaqarfimmut, namminersorlutik oqartussanit aqunneqaraluartumut, aningaasatigut ikiorserneqarnissamik danskit naalakkersuisuinut saaffiginnittoq Sermitsiami allaaserineqarpoq.
Maanna peqqissutsimut ministerip Sofie Løhdep (V) Mimi Karlsenip ikioqqunera akivaa.
Kalaallit Nunaannut immikkut ittumik peqqinnissamut aningaasaliissutit nutaat katillugit 140 millionit koruuninik amerlassuseqartut piffissami 2025-mit 2028-mut immikkoortinneqassasut Danmarkimi naalakkersuisut siunnersuutigigaat, Peqqissutsimut ministeri tusagassiuutinut nalunaarummi ilisimatitsivoq.
Nunamut namminermut peqqissutsimullu ministeri Sophie Løhde suliaq pillugu ima oqarpoq:
- Kalaallit Nunaanni peqqinnissaqarfik ilungersunartumik inissisimaffeqarlunilu ukiuni aggersuni allannguerujussuartussaavoq. Taamaattumik naalakkersuisunit kalaallit aningaasaqarnikkut ikiorserusuppavut.
-Kalaallit Nunaanni peqqinnissaqarfiup aningaasartuutaanut, assersuutigalugu kræftertunut uummatikkullu nappaatilinnut Danmarkimi napparsimmavinnut katsorsartinnissamut nassiunneqartunut peqqinnissamut aningaasaateqarfik atorneqarsinnaasoq danskit tungaannit takorluuivugut, maannalu atuinissaq isummerfiginiarlugu Kalaallit Nunaanni peqqissutsimut naalakkersuisoqarfik ataatsimeeqatigissavarput, peqqissutsimut ministeri oqarpoq.
Siunnersuut tamanna danskit naalakkersuisuisa 2025-mut aningaasanut inatsisissatut siunnersuutaannut ilaavoq.
Peqqinnissamut aningaasaateqarfiup nutaap, 2025-mi atuutilernissaanik naatsorsuutigineqartup, sinaakkutissai aalajangersimasut Nunamut Namminermut Peqqissutsimullu Ministereqarfiup aamma Kalaallit Nunaanni Peqqissutsimut Naalakkersuisoqarfiup ataatsimoorlutik suliarissagaat, ministeri nangilluni ilisimatitsivoq.
Danskit naalakkersuisuisa siunnersuutaat akuerineqarpat ukiuni sisamani tulliuttuni ukiumut 35 millionit koruuninik ikiuisoqassaaq.
Aningaasanut inatsisissatut siunnersuumminni Naalakkersuisut naatsorsuutigaat 2025-mi peqqinnissamut 1,7 milliardit koruunit sinnerlugit atussallugit.
