Aningaasanut inatsisissaq pillugu oqaloqatigiinnerni partiit tamarmik suli peqataapput
Danmarkimi aningaasanut inatsisissamut isumaqatigiissut piareerpoq, taamaattorli nunatsinni maani Naalakkersuisut suli partiit peqatigalugit isumaqatigiinniarput. Aningaasaqarnermut akileraartarnermullu naalakkersuisoq, Múte Bourup Egede (IA), oqarpoq partiit tamarmik suli oqaloqatigiinnerni peqataasut, oqaloqatigiinnerillu tunngavigalugit aappassaaneerinninnerup pingajussaaneerinninnerullu akornanni isumaqatigiinniartoqassasoq.
- Maannamut partiit tamaasa marloriarluta oqaloqatigereerpagut, tassani aamma partiit kissaatinik tusarnaarluta. Aningaasaqarnermut Naalakkersuisutut nalilerpara, maannamut Inatsisartuni partiit tamaasa oqaloqatigineri pitsaasumik ingerlasimasut, aningaasaqarnermut naalakkersuisoq, Múte Bourup Egede (IA), oqarpoq.
Assiliisoq: Jensine Berthelsen
2026-mi nunap aningaasaqarnera qanoq isikkoqassava? Aningaasanut inatsisissaq siammasissumik tunngavilimmik akuerineqassava? Danmarkip naalakkersuisuinut isumaqatigiissut nunap aningaasaqarneranut sunniuteqassava? Tassaapput apeqqutit arlallit Sermitsiamit aningaasaqarnermut akileraartarnermullu naalakkersuisumut, Múte Bourup Egedemut akissutissarsiffiginiakkatta ilaat.
- Maannamut partiit tamaasa marloriarluta oqaloqatigereerpavut, aamma partiit kissaatinik tusarnaarluta. Naalakkersuisutut aningaasaqarnermut akisussaasutut nalilerpara, Inatsisartuni partiit tamaasa maannamut oqaloqatigineri pitsaasumik ingerlasimasut.
- Aappassaaneernerup pingajussaaneernerullu akornanni partiit ataatsimiigiaqquneqarumaarput isumaqatigiinniarnerit siunertaralugit.
Tassa imaappa partiit tamarmik suli peqataanerat isumaqartoq, partiit tamarmik aappaagumut aningaasanut inatsisissamut akuerseqataallutik taasissasut naatsorsuutigineqarsinnaanngortoq?
- Siusippallaarpoq inerniliinissaq, kisianni aappassaaneerinninnerup pingajussaaneerinninerullu akornanni ataatsimiinnerit aalajangiisuussapput qanoq annertutigisumik isumaqatigiissuteqarsinnaanersugut, kisianni oqaatigeqqissavara, maannamut oqaloqatigiinnerit pitsaasumik ingerlammata. Kisianni eqqaamaneqassaaq suli oqaluuserisassagut amerlammata.
Aappassaaneerinnittoqannginnerani allannguutissatut siunnersuutit arlallit
Naalakkersuisut aningaasanut inatsisissatut siunnersuutertik saqqummiutereeraangassuk, aningaasanut inatsisissap inaarutaasumik akuersissutigineqarnissaata tungaanut allannguuteqartoqartarpoq, tamatumalu kingunerisaanik aamma sinneqartoorutissatut amigartoorutissatulluunniit missingersuutit allanngorarsinnaasartut.
Múte Bourup Egede erseqqissaavoq, aningaasatigut unammilligassat annertuut suli atuummata, aamma danskit naalakkersuisuisa 1,6 milliardit koruuninik isumaqatigiissuteqarfigineqaraluartoq.
- Kisianni naalagaaffimmit aningaasat nunatta karsianut isertinneqarsimatinnagit isertitatut naatsorsuutigineqarsinnaanngimmata, danskit aningaasanut inatsisissaat akuersissutigineqareertinnagu, taamaammat suli unammilligassaqarpugut, partiit kissaatigisaat tusarnaarpagut, aammalu pitsaanerpaamik sulissutigissavarput aningaasanut inatsisissaq, sapinngisamik partiit tamarmik ataatsimoorfigisinnaasaat naammassiniarlugu, Múte Bourup Egede Sermitsiamut oqarpoq.
Danskit naalakkersuisuisa isumaqatigiissutaat nunatta karsiata aningaasaqarneranut nukittorsaataava?
- Erseqqissaqqissavara, aningaasat isertinneqarsimatinnagit isertitatut isigineqarsinnaanngimmata, danskit aningaasanut inatsisissaat akuersissutigineqareertinnagu, tamatumalu saniatigut eqqaamassavarput, isumaqatigiissummi pilersaarutit aalajangersimasut aamma pineqarmata, taakkulu aatsaat aallartinneqarsinnaapput danskit aningaasanut inatsisissaat naammassippat.
- Taamaattumik aamma Naalakkersuisunit pilersaarutigaarput pisinnaatitsissutinik Inatsisartunut piniassalluta, aningaasat nunatsinnut apuunneqareerpata atorneqarnissaalernissaat eqqarsaatigalugu, taamaalilluta pilersaarutit isumaqatigiissut naapertorlugu aallartinneqarsinnaassapput.
- Kisianni erseqqissassavara, sanaartugassat angisuut marluk, tassa Ittoqqortoormiini mittarfissaq aammalu Qaqortumi immami itisuumi umiarsualivissaq aatsaat aallartinneqarsinnaasut, aningaasat naalagaaffimmit nunatta karsianut apuutereerpata. Suliniutillu annertuut taakku sanaartorneqalertinnagit pilersaarusiornerit suliariumannittussarsiuussinerit piareeersaataasumillu suliat ingerlanneqareerpata sanaartornertaannut aatsaat killissinnaalissagatta, taamaattumik pingaaruteqarpoq Inatsisartutit akuersissummik pissarsinissarput.
Allannguutissatut siunnersuutit tigussaasut arlallit
Danmarkimimut isumaqatigiissutip saniatigut Naalakkersuisut aningaasanut inatsisissatut siunnersuutip aappassaaneerneqarnissaanut tigussaasunik allannguutissatut siunnersuuteqarput. Tassani pineqarput namminersorlutik Oqartussat kommuninit oqartussaffinnik angerlaasseqqittoqarnissaanut tunngassuteqartut:
Aaqqissuussinerit pineqartut 1. januar 2026 aallarnerfigalugu kommuniniit namminersorlutik oqartussanut nuunneqassapput.
Aaqqissuussinerit taakku namminersorlutik oqartussanut nuunneqarnissaasa saniatigut, Neqi A/S-ip iluarsartuussinissaanut kiffartuussinissamut isumaqatigiissummut atugassarititaasut aningaasaliissutillu allannguuteqartinneqassapput kiisalu nunanut allanut tunngasunut aningaasaliissutit amerlineqassapput.
Aningaasanut inatsisissatut siunnersuut aappassaaneerneqassaaq ataasinngornermi oktoobarip 27-iani.
