Danmarkimi naalakkersuisut Det Konservative Folkepartillu 2026-miit 2029-mut aningaasanut inatsisissaq ukioq manna pisarnermut siusinnerusukkut isumaqatigiissutigaat.
Aningaasanut inatsit Kalaallit Nunaannut aatsaat taamak amerlatigisunik aningaasaliissuteqarfiuvoq. Ukiunut sisamanut aningaasaaliissutit 1,6 milliardit koruuniusut sinaakkutissatut isumaqatigiissummi sumut atorneqassanersut naalakkersuisut akornanni isumaqatigiissutigineqassapput.
Danmarkimi naalakkersuisut Det Konservative Folkepartillu 2026-miit 2029-mut aningaasanut inatsisissaq ukioq manna pisarnermut siusinnerusukkut isumaqatigiissutigaat.
Aningaasanut inatsit Kalaallit Nunaannut aatsaat taamak amerlatigisunik aningaasaliissuteqarfiuvoq. Ukiunut sisamanut aningaasaaliissutit 1,6 milliardit koruuniusut sinaakkutissatut isumaqatigiissummi sumut atorneqassanersut naalakkersuisut akornanni isumaqatigiissutigineqassapput.
Attaveqaasersuutit peqqissutsimullu tunngasut
Danmarkimut sinaakkutissatut isumaqatigiissummi Ittoqqortoormiini nunap immikkoortuani mittarfiliornissaq aamma Qaqortumi umiarsualivimmik nutaamik sanaartornissaq aningaasaliiffigineqatoq nalunaarutigineqareernikuuvoq. Tamatuma saniatigut kalaallit napparsimasut Danmarkimi napparsimavinni katsorsarneqartarnerannut aningaasartuutit, ullumikkut ukiumut 140 millionit koruunit missaanniittut, Danmarkip nammineq akilertalissagai isumaqatigiissutigineqareerpoq.
Eqqartuussivinnut tunngasut tarnillu pissusaanik ilinniarfiusinnaasoq
1,6 milliardit koruunit saniatigut 65 millionit koruunit missaat Atlantikup Avannaani aningaasaliissutinut immikkoortinneqarput, tassani Atlantikup Avannaani ilaasortaasut tamarmik immikkut suliniutinut assigiinngitsunut 30-35 millionit koruunit immikkoortippaat.
Angajoqqaat kalaallinit kingoqqisut meeraannik arsaarinninnissamik suliani tapersersortinut, aamma Ilisimatusarfimmi tarnip pissusaanik ilinniarfiusinnaasumut aningaasaliisoqarnissaa Naleqqamit Folketingimut ilaasortap Elvira Kuitsep piumasaraa.
Assi: Trine Juncher Jørgensen
Kalaallit Nunaanniit nunanut allanut toqqaannartumik avammut niuernerup misissornissaanut 1,5 millionit koruunit aamma angajoqqaanut kalaallinit kingoqqisunit meeraannik angerlarsimaffiup avataanut inissiiniarnermut suliani tapersersuinissamut 4 millionit koruunit Naleqqamit immikkoortinneqarput.
Aamma Ilisimatusarfimmi tarnip pissusaanik ilinniarfittaarsinnaanermut 4,9 millionit koruunit immikkoortinneqarput. Kiisalu eqqartuussiveqarfinnut tunngasunut 19,6 mio. koruunit aningaasaliissutigineqarnissaat Naleqqamiit pingaarnersiorneqarput.
Majuartaat assammillu arsarneq
Inuit Ataqatigiit sinnerlugit Folketingimut ilaasortap Aaja Chemnitzip suliniutit 13-it, Vestnordenfondenimut 7 millionit koruuninik naleqartut, pingaarnerpaatut toqqarpai.
Tamatuma saniatigut Kommuneqarfik Sermersuumi tupersuarmut pullattagartaarnissamut ingerlanneqarnissaanullu 4 mio. koruunit, Sisimiuni ukioq kaajallallugu atorneqarsinnaasumut majuartaammut 3 mio. koruunit, Tasiilami Polar Academymut 3 mio. koruunit aamma Unicefimut 2,5 mio. koruunit. Inuit Circumpolar Councilimut 2 mio. koruunit aamma immikkoortinneqarput, Sipineq+-imut 1,5 mio. koruunit, Kalaallit Nunaanni assammik arsartarnermut nukittorsaanissamut tapiissutinut 3 mio. koruunit aallarnisaanermullu suliniuteqarfiusumut Mind Your Own Businessimut 1 mio. koruunit.
Aamma Arctic Mayors Forumimut 1 million koruunit, Ullorissat aqqutigalugu Danmarkimi kalaallit naalagiartarnerannut oqaluffimmilu pisunut tapersersuinermut 0,5 millionit koruunit, Danmarkimi kalaallinut kulturikkut aaqqissuussisartunut peqatigiiffimmut Tikiussamut 0,5 millionit koruunit kiisalu Kalaallit Nunaat pillugu kulturikkut suliniutinut 1 millionit koruunit immikkoortinneqarput.
– Aningaasanut inatsisissamut anguniagaqarluarluta isumaqatiginninniarpugut, Aaja Chemnitz (IA) oqarpoq.
Assi: Trine Juncher Jørgensen
Aningaasanut inatsit angusaqarfigilluarniarneqartoq
Aaja Chemnitzip oqarnera naapertorlugu Sjomaq, Naalagaaffeqatigiinni inuusuttunut suliniut 20 millionit koruuninik aningaasaliiffigineqarpoq. Anna Falkenberg Savalimmiuni Sambandsflokkurinimeersoq peqatigalugu aningaasat immikkoortinneqarput.
– Aningaasanut inatsisissamut anguniagaqarluarluta isumaqatiginninniarpugut. Aammali aningaasanut inatsisip atuutilernerata kingorna piffissaq sivisooq ingerlareersoq Kalaallit Nunaat sinnerlugu isumaqatiginninniartuartariaqarpugut. Assersuutigalugu illersornissamut isumaqatigiissutip immikkoortuata aappaata naammassineqarnissaanut aamma isumaqatigiissutip immikkoortuata pingajuata maanna isumaqatiginninniutiginerani. Danmarkip Kalaallit Nunaannut aningaasaliissuteqarnerunissaanut periarfissarpassuaqarpoq, ilaatigut inuussutissarsiornermik ineriartortitsineq eqqarsaatigalugu, tassani issittumi aningaasaliinermut aningaasaateqarfiup pilersinnissaa qitiulluinnarpoq, Aaja Chemnitz oqarpoq.
Aningaasanut inatsisip saniatigut Illersornissaqarfiup Issittoq Atlantikullu Avannaa pillugit isumaqatigiissutaata immikkoortua aappaani 27,4 milliardit koruunit immikkoortinneqarput. Piffissamilu aggersumi ilisimatusarnermut aningaasaliinissamut inissititerisoqassaaq, tassanilu issittumi ilisimatusarnermut 83 millionit koruunit atorneqarsinnaassagunarlutik.
