Aningaasaqarnermut ataatsimiititaliaq arlalinnik Naalakkersuisunut kaammattuuteqarpoq
Inatsisartut Akileraartarnermut Aningaasaqarnermullu Ataatsimiititaliaata ilassutitut aningaasaliissutinut inatsimmut isumaliutissiissumminnut atatillugu Naalakkersuisut avoqqaarai, taannalu maajip aappaani aappassaaneerneqassaaq.
Toqqorsivimmit assilisaq: Leiff Josefsen
2023-p ingerlanerani ilassutitut aningaasaliissutinut qinnuteqaatit 45-pput. Akileraartarnermut Aningaasaqarnermullu Ataatsimiititaliaq isumaqarpoq amerlavallaartut, Covid-19-illu nunarsuarmi tuniluunnerata siornatut amerlatigilernissaat kissaatigalugu, taakkulu 2019-imi 34-iusimapput.
Kaammattuutit taakku pingasut
Kaammattuutit pingasut Naalakkersuisunit eqquutsinneqallaqusat ataatsimiitialiap isumaliutissiissutimini allappai:
- Ilassutitut aningaasaliissuteqarnissamik qinnuteqaatit aningaasaliissutit nutaat allanngortitalluunniit ukiumi aningaasanut inatsiseqarfiusumi 1. januarimit 31. decembarimut iliuutsinut nunatta karsianut aningaasartuuteqarfiusunut taamaallaat tunngasinnaanerannik aningaasaliisarnermi tunngavimmut eqquutsitsinerunissaat Naalakkersuisunit sulissutigineqassasoq.
- Ukiup aningaasanut inatsiseqarfiusup ingerlanerani aningaasaliissuteqarnissamik qinnuteqaatit nutaat allanngortitallu, ilaatigut ilassutitut aningaasaliissuteqarnissamik qinnuteqaatit aningaasartuutinut naatsorsuutigineqarsinnaasimanngitsunut aammalu sillimmasiussanik atugassanngortitsinernut tunngasuunissaasa eqquutsinneqarneratigut, sapinngisamik ikilisinneqarnissaasa Naalakkersuisunit sulissutigineqarnerunissaa ataatsimiititaliamit ilanngullugu kaammattuutigineqarpoq.
- Ilassutitut aningaasaliissuteqarnissamik qinnuteqaatit, tassungalu ilanngullugu minnerunngitsumik missingersuutinut ilanngussat oqaasertaliussallu ilaasut, pitsaassusiannik qulakkeerinnittarnerup nukittorsarnerunissaata Naalakkersuisunit sulissutigineqarnissaa ataatsimiititaliamit kaammattuutigineqarpoq.
Ilassutitut aningaasaliissutinut inatsit aningaasaliissutinik ilassuteqarnermut inatsisaavoq, Inatsisartullu Aningaasaqarnermut Ataatsimiititaliaata siusinnerusukkut aalajangiinerinut aamma Naalakkersuisut oqaaseqaatinik tunngavilinnik aalajangiinerinut tunngaviusoq.
Suliat 44-t missingersuutinut sunniuteqanngillat
- Sulianit katillugit 45-nit akuersissutigineqartunit suliat 44-t missingersuutinut sunniuteqanngillat, suliallu 6-it Inatsisartut Suleriaasiannut Ataatsimiititaliamit akuerineqartut IST-p inerneranut 250.000 kr.-nik ajorteriartitsipput. IST-p inerneranut annikitsumik ajorteriarneq 2023-mut aningaasartuutissatut killigititaq, 2023-mi missingersuutinut inatsit aalajangersakkat naapertorlugit aalajangerneqartoq, malinneqarpoq. 2023-mut aningaasanut inatsit missingersuutaasutut IST-mi 16,1 mio. kr.-inik sinneqartoorfiuvoq. Ilassutitut aningaasaliissutinut inatsisissatut siunnersuut taamaalilluni ukiumi Aningaasanut inatsiseqarfiusumut 2023-mut IST-mi 15,8 mio. kr.-nik sinneqartoorfiuvoq, isumaliutissiissutimini ataatsimiititaliaq allappoq, “ ukiakkullu ataatsimiinnermi kingusinnerpaamik saqqummiunneqartussami angusassatut missingersuutit inaarutaasumillu naatsorsuutitigut angusat assigiinnginnerat” erseqqissaatigalugu.
Ilassutitut inatsisissatut Naalakkersuisut siunnersuutaat kaammattuutit peqatigitillugit Inatsisartunit akuerineqarnissaanut Akileraartarnermut Aningaasaqarnermullu Ataatsimiititaliaq innersuussivoq.
