Naalakkersuisoq nakorsat kigutillu nakorsaat pillugit suliniuteqartoq
Peqqissutsimut Inunnullu Innarluutilinnut Naalakkersuisoq, Anna Wangenheim (D), Inatsisartunut ilaasortanit pingasunngornermi apeqqarissaarfigineqarpoq. Qaqortumi Sisimiunilu ernisarfiit tamakkiisumik ammaqqinnissaat suli inissinngilaq. Naartorineqartut pillugit inatsiseqalernissaq Naalakkersuisut maanna misissorpaat. Nakorsat kigutit nakorsaallu amerlanerulernissaat aamma sulissutigineqarpoq.
- Naalakkersuisoqatigiinni misissuleruttorparput ilaatigut naartup pisinnaatitaaffeqalernissaani inatsiseqalernissarput, Naalakkersuisoq oqarpoq.
Assi: Oscar Scott Carl
Kalaallit Nunaanni peqqinnissaqarfiit amerlanerpaartaat naammattunik nakorsaqanngillat. Sumiiffiit amerlasuut ilaatigut nakorsanik sulisoqanngillat. Isorliunerusuni nakorsassaaleqineq annertummat tamanna immikkut ittumik maanna aningaasaliiffigineqarpoq. Peqqissutsimut Naalakkersuisoq Inatsisartunut pingasunngornermi oqarpoq.
- Aningaasat pisariaqartinneqassagamik atorfinititsinissamut. Taamaattumik ukioq manna immikkut ittumik, 30 millionit koruuninit ikinnerunngitsunik, sinerissami nunap immikkoortuini ilaatigut nakorsaqarnikkut ukioq manna aningaasaleeqqippugut, pisariaqartimmassuk, Anna Wangenheim (D) oqarpoq.
Naalakkersuisoq nunap immikkoortuini nakorsanit sullinneqartarneq pitsanngorsarniarlugu Inatsisartut Aningaasaqarnermut Akileraartarnermullu Ataatsimiititaliaannut 30 millionit koruuninik qaammat kingulleq qinnuteqarpoq, tamannalu ataatsimiititalimut ilaasortat amerlanerussutillit akueraat.
Kigutit nakorsassaaleqerujussuartut
Nakorsat kisimik amigaataaqqajanngillat. Kigutilli nakorsaat aamma amigaataaqaat, sulilersinniartarnerallu pitsaanani. Naalakkersuisummi oqarnera naapertorlugu kigutit nakorsaannik atorfinitsitsiniarneq ima ilungersunartigaaq allaat piffissap ilaani aningaasaliissutit atunngitsoorneqartarlutik. Tamanna ilaatigut peqqutaalluni nunanit allaneersunik kigutit nakorsaqarsinnaalernissaq maanna sulissutaavoq.
- Kigutit nakorsaannik atorfinitsitsiniartarnerup ilungersunartumi inissisimanera eqqarsaatigalugu nunanit allaninngaanneersunik kigutilerisoqalernissatsinnut aqqutit, suminngaanneertussallu ilaatigut suliarisatsinnut ilaapput, Anna Wangenheim oqarpoq.
Nunatsinni kigutit nakorsaannut atorfiit tamarmik inuttaqaraluarpata kigutit nakorsaat 30-it sinneqartussaapput. Taakkuali tamarmik inuttaqaqqajanngillat piffissamilu aalajangersimasumi suliartortunik inuttalerneqartartut amerlallutik.
Peqqinnissaqarfiup sulisussarsiortarfiani allassimasut naapertorlugit illoqarfinni arfineq-pingasuni kigutit nakorsatut atorfiit qulit maanna allagarsiunneqarsimapput.
Suli inunngunngitsunut inatsit
Meeqqat naartorisat anaanaminnit suli inunngunngitsut illersugaanerulissasut Naalakkersuisut aamma isumaqarput. Taamaattumik inatsisiliortoqarnissaanik maanna sulissuteqarput.
- Naalakkersuisoqatigiinni misissuleruttorparput ilaatigut naartup pisinnaatitaaffeqalernissaani inatsiseqalernissarput. Taamaalilluta aamma suliassaqarfiit akimorlugit paaseqatigiinneq annertunerusoq pilersikkumallugu.
- Massakkut siusinaartumik iliuuseqarnermik suliaqarnermi takusinnaagatsigu assigiinngitsorpassuartigut sammivilimmik passunneqartartut. Taamaattumik naartup pisinnaatitaaffia aamma siunissami meeqqat peqqinnerullutik inunngortarnissaannut ilaatigut qulakkeerinnissaaq, Anna Wangenheim oqarpoq.
Sisimiuni Qaqortumilu ernisarfiit
Sisimiuni Qaqortumilu ernisarfiit tamakkiisumik ukiuni kingullerni ammanngillat. Tamanna illoqarfinni taakkunani naliginnaasumik ernisoqartannginneranik kinguneqarpoq. Illoqarfinni taakkunaneersut erniartussagunik Nuummukakkajupput. Tamannalumi suli taamaaginnassaaq.
- Ernisussiortut nakorsallu iluminni suut sinaakkutaassanerat pillugu isumaqatigiinngittarnerat pillugu siorna decembarimi isumasioqatigiisitsivugut. Taassuma kingorna aningaasatigut qulaajaanerit suli pisariaqarput, Peqqissutsimut Inunnullu Innarluutilinnut Naalakkersuisoq oqarpoq.
