Meerarsiap feeriaqataanissaanut angajoqqaarsiat pisortalluunniit akiliisassanersut Inatsisartuni oqaluuserineqartoq

Meerarsiat angajoqqaarsiatik ilagalugit feeriarnissaminnik nuna tamakkerlugu assigiimmik periarfissaqalernissaat anguniarlugu Pipaluk Olsenip (D) Naalakkersuisunut apeqquteqaataa aallaavigalugu pingasunngornermi maajip 13-ni 2026 Inatsisartut oqaluuserinnipput.

Inatsisartunilu oqallinneq nuannaarutigalugu Pipaluk Olsen Sermitsiamut oqarpoq.

- Naammagisimaartorujussuuara pissutigalu partiit tamarmik peqataagamik isummersorlutillu, tassa taanna uanni pingaaruteqarnerpaaq uannullu naleqarnerpaaq, Pipaluk Olsen oqarpoq.

Kikkut akiliissanersut isumaqatigiinngissutaasoq

AAMMA ATUARUK

Meerarsiat atugaat pitsanngorsarneqarusuttut

Angajoqqaarsiat meerarsiartik ilagalugu angalallutik feeriassagunik nammineq aningaasanik katersisariaqartut, Inuit Ataqatigiit isumaqarpoq.

- Neriuppunga angajoqqaarsianngortut akisussaaffik tigusartik ima pingaartitsigissagaat pisortanik isumalluuteqaratik imminut nammineq napatissinnaassallutik. Meerannguaq allamut inisseqattaarnagu, angajoqqaarsiat aningaasanik katersillutik ukiumiit ukiumut pilersaarusiorsinnaasariaqarput. Meeqqat ilaannai feeriaqatiginagit, meerarli taanna (meerarsiartik, aaqq.) aamma feeriaqatigisinnaassagaat, Pipaluk Lynge (IA) oqarpoq.

Angajoqqaarsiat ukioq kaajallallugu inuiaqatigiinnut oqilisaassisimasut ajunngitsorsiassaqartariaqartut oqallisissiamik siunnersuuteqartoq Pipaluk Olsen isumaqarpoq.

- Angajoqqaarsiatut akisussaaffik annertoreertigisoq sooq pisariaqarfiani saniatigut katersitissavagut? Pipaluk Olsen, inatsisartuni oqallisereernerup kingorna Sermitsiamit apersorneqarnermini oqarpoq.

Angajoqqaarsianut atugassarititaasut ataatsimut isigalugit pitsanngorsarneqarnissaat oqaluuserineqartariaqartoq ilanngullugu IA-meersoq Pipaluk Lynge oqarpoq.

- Angajoqqaarsiat pillugit ukiunut qulinut pilersaarusiornissamut isumaqatigiissuteqartoqarnissaa anguniarlugu Mariane Paviasen Jensen, Meeqqanut, Inuusuttunut, Inatsisit Atuutsinneqarnerannut Naligiissitaanermullu Naalakkersuisoq Inatsisartuni partiinik aggersaasinnaavoq isumaqatiginninniarlunilu, Pipaluk Lynge isumaqarpoq.

Oqallisissiami kommunini meerarsiat angajoqqaarsiallu assigiimmik feeriaqatigiittalernissaminnut periarfissaqalernissaat pillugu oqallisissiamik saqqummiussilluni, Pipaluk Olsen tikkuaavoq.

- Aaqqitassat pillugit siammasissumik eqqartuerusunnartorujussuuvoq. Angajoqqaarsianut tunngasut ukiorpassuarni tusartakkavut allanngortariaqarmata qulequtaq taanna qulequtaritillugu ineriartortitsinissamik tunngaveqarlunga angajoqqaarsianut tunngasumik qaqitsivunga, Pipaluk Olsen oqarpoq.

Naalakkersuisoq pitsanngorsaanissamut ammasoq

Nunatsinni angajoqqaarsianut atugassarititaasut pitsanngorsarniarlugit kommunit oqaloqatigissallugit aggersaassalluni, naalakkersuisoq Mariane Paviasen Jensen oqarpoq.

Tamannalu Pipaluk Olsenip nuannaarutigaa.

- Naalakkersuisup suleqataarusussuseqarnera ersarimmat assorujorujussuaq qujamasuppunga, Pipaluk Olsen oqarpoq.

Inatsisissamik siunnersuuteqarnissaq

Meeqqat angerlarsimaffiup avataanut inissinneqarsimasut angajoqqaarsiatik ilagalugit feeriarsinnaanissaannut periarfissaqalernissaannik oqallinneq siunnersuuteqartup ineriartortitassatut isumaqarfigaa.

- Immaqa siammasinnerulaanngorlugu immaqaluunniit taamaatsiinnarlugu ukiaru Inatsisartut ataaminiinnissaannut inatsisissatut siunnersuummik qaqitsisinnaanissara takorloorpara, Pipaluk Olsen naggasiivoq.

Inatsisartuni oqallinneq aalajangiiffiunani naammassivoq.