Timmisartoq pingasunngornermi unnukkut Nuummi ajornartoornermi mittoq

Pingasunngornermi nalunaaqutaq 18.45 missaani politiit, qatserisartut ambulancellu timmisartoqarfiup tungaanut ornigutipallapput, timmisartoq Canadameersoq minnissamut piareersarnerata nalaani.

Timmisartoq mikisoq Nuummi minnissaminik pilersaaruteqarsimanngikkaluartoq, nalunaaquttap-akunnerini pingasuni timmisartoreerluni Nuummi mittarfimmut ajornartoorluni kalerrisaarisimavoq.

- Uppernarsarsinnaavara politiit qatserisartullu mittarfimmiittut, pisumi ajutoortoqanngilaq aamma inunnik ajoqusertoqarani, Kalaallit Nunaanni Politiini pigaartut pisortaat Thomas Jeppesen oqarpoq.

"Pisoq" sumut tunnganersoq pigaartut pisortaata ilisimatitsissutigisinnaanngilaa, Greenland Airportsimulli innersuussilluni.

Timmisartup iluata naqitsinera ajoquteqartoq

Greenland Airportsimi attaveqaqatigiinnermut pisortaq pisumut tunngatillugu ersarinnerusumik nassuiaasinnaavoq:

- Timmisartoq ajornartoorluni Nuummut mittariaqalersimavoq. Taamaattoqartillugulu upalungaarsimasunut tamanut kalerrisaarisarpugut, tamannalu Nuummi ullumi aamma iliuuseraarput, Stine Buur Hvistendahl Sermitsiamut oqaluttuarpoq.

- Timmisartup iluani silaannaap naqitsineranik ajornartorsiortoqalersimavoq. Timmisartoq maanna isumannaatsumik mereerpoq, timmisartorlu aallaqqinnginnerani misissorneqaqqaartussanngorluni, taanna oqarpoq.

Attaveqaqatigiinnermut pisortaq ilisimatitsivoq naak upalungaarsimasut ornigutipiloornerat pissanganarpasissinnaagaluartoq, taamaattoq mittarfimmi pisut eqqissisimasumik isumannaatsumillu ingerlasimasut.