Aningaasat politikkimut qanoq sunniuteqartarnersut innuttaasut paasisinnaatitaavaat

Politikkikkut suliniuteqarnermut namminersortumit tapiissutinik tigusineq pillugu paasissutissiinissamut pisussaaffiup sukateriffiginissaanik siunnersuut, kinaassutsikkut isertuussisumik nunanillu allaneersunit tapiissutinik tigusineq inerteqqutigineqartoq kiisalu politikkikkut partiit naatsorsuutaannik saqqummiussineq pillugu inatsisartut inatsisaanni tapiissutit qanoq annertutiginissaannut killiliineq Inatsisartuni marlunngornermi suliarigasuarneqarpoq. Inatsisissatut siunnersuut Inatsisartut siulittaasuannit tusarniaassutigineqanngikkaluarluni saqqummiukkasuarneqarpoq.

- Siullermik inatsisissatut siunnersuut tusarniaassutigineqarsimanngimmat Transparency International Greenlandip ajuusaarutigaa. Inatsisissatut siunnersuutip pisariaqarnera paasilluarsinnaavarput, isumaqarpugummi inatsisitigut nunatsinni sukaterisoqartariaqartoq, Transparency International Greenlandip siulersuisui Sermitsiamut oqarput.

Inatsisissatut siunnersuut pitsaasuusoq siulersuisut isumaqarput, ingammik nunanit allanit kinaassutsiminnik isertuussillutik tunissuteqarsinnaanerup unitsinneqarnera pissutigalugu, aamma innuttaasut aningaasat politikkimut qanoq sunniuteqartarnerat pillugu ilisimasaqartariaqarmata.

Innuttaasut tunissuteqarnerup pinerani ingerlaannaq ilisimatinneqartariaqarput

Tunissutilli tiguneqarnerannit naatsorsuutit kukkunersiukkat saqqummiunneqarnerisa tungaannut piffissarujussuaq ingerlasarpoq, Transparency International Greenland isumaqarpoq.

- Inatsit politikkikkut aningaasanik atuinermut tunngasunik paasissutissanik piffissami pisumi - piaarnerpaamillu saqqummiussinissamut periarfissiisoq Transparency International Greenlandip amigaatigaa. Qineqqusaarnermi sunniuteqarsinnaanera innuttaasut nalilersinnaasariaqarpaat, siulersuisut oqarput, tikkuarlugulu Kalaallit Nunaata FN-ip peqquserlunnermut akiuiniarnermut isumaqatigiissutaa suli akuersissutiginngikkaa. Taamaalilluni Kalaallit Nunaat qinigaasunut qineqqusaarnermi aningaasanik atuinermut tunngasunik, aamma naleqquppat politikkikkut partiinut aningaasanik atuinermut tunngasunik, ersarissumik paasissutissiinissamik annertusaanissamut pisussaaffeqanngilaq.

Kalaallit Nunaanni peqquserlunneq akiorniarlugu periusissiaqanngitsoq

Innarligassaannginnermut misissuineq 2020-meersoq Inatsimmut siunnersuutip oqaaseqaataani innersuussutigineqarpoq, tassanilu ima allassimavoq:

"Nalunaarusiap matuma takutippaa iluanaarniarnissaq pillugu oqartussaaffimmik atornerluinermut eqqaanartut qanoq iliornerit pillugit tusatsiakkat pasitsaassinerillu arlalissuusut aamma ersarinnerulersitsineq aamma innarligassaannginnermik sakkut nukittorsarneqartariaqartut. Innersuussutigineqarpoq iluanaarniarnissaq pillugu oqartussaaffimmik atornerluinermut suliniutit nukittunerusut siunissami qaninnerusumi iluanaarniarnissaq pillugu oqartussaaffimmik atornerluineq pillugu periusissiami tassungalu atasuni iliuuseqarnissamut pilersaarutini tunngavissinneqarsinnaasut, soqutigisaqaqatigiit attuumassuteqartut ilanngutitinnerisigut siunissamilu ungasinnerusumi iluanaarniarnissaq pillugu oqartussaaffimmik atornerluineq pillugu inatsimmi aamma pitsaaliuisutut immikkoortortami."

Naalakkersuisut peqquserlunnerup akiorniarnissaanut ataatsimut periusissiornissaannik peqquneqassasut Inatsisartut 2023-mi upernaakkut ataatsimiinnermi oqaluuserisassami 36-mi aalajangerpaat, tassanilu peqquserlunnerup akiorniarnissaanut iliuusissatut suut iliuuserineqarsinnaanersut sammineqassapput.

- Siusinnerusukkut oqaatigineqartutut inatsisissatut siunnersuut akerlerinngilarput, kisianni peqquserlunnerup akiorniarnerata aaqqissuulluagaanerusumik ingerlanneqarnissaa amigaatigaarput, peqquserlunnerup akiorniarnerani periusissiaq akuerineqaraluarpat pitsaanerussagaluarpoq, Transparency International Greenlandip siulersuisui oqarput.