KL

DK

Aningaaserivik aatsaat taama angusaqartoq: 5 mia. koruunit sinnerlugit taarsigassarsititsisoq

Grønlandsbanken ukiup affaani siullermi 120,1 millionit koruuninik angusaqarpoq, aningaaseriviullu siullermeerluni 5 milliardit koruunit sinnerlugit taarsigassarsititsivoq.

- Aatsaat taama taarsigassiinermi angusaqartigaagut, aatsaallu siullerpaamik 5 mia.-it sinnerlugit, aningaaseriviup pisortaa Martin Kviesgaard oqarpoq.
Thomas Munk Veirum
Journalisti
Saqqummersinneqarpoq

Grønlandsbankenip 2024-mi ukiup affaani siullermi aningaasaqarnikkut angusarissaarnera aningaaseriviup nuannaarutigisinnaavaa.

Ukiup affaani siullermi akileraarutit suli ilanngaatiginagit 120 millionit koruuninik sinneqartooruteqarluni aningaaserivik tusagassiuutinut nalunaarummi ilisimatitsivoq. Tamanna 2023-mut sanilliullugu siuariarneruvoq, piffissami tassani aningaaserivik 103 millionit koruuninik sinneqartooruteqarmat.

Aningaaseriviup taarsigassarsisitsisarnera 284 millionit koruuninik amerleriarluni 5.097 millionit koruuninut qaffariarpoq. Aningaaserivik siullermeerluni 5 mia. koruunit sinnerlugit taarsigassarsititsivoq.

- Kisitsisit kusanarluinnarput

Aningaaserivimmi pisortap Martin Kviesgaardip inernerit nuannaarutigai:

- Ukiup affaani siullermi kisitsisit kusanarluinnarput. Ineriartorneq pitsaasoq naatsorsuutiginikuuarput, peqatigitilluguli 2024-mi aningaaseriviup taarsigassarsiarititaasa annikinnerusumik siuariartornissaat naatsorsuutigisimallugu.

- Taarsigassarsiarititat qaffariarnerat taamaasilluni aamma naatsorsuutigisamit annertuneruvoq, kisianni soorunami nuannaarutaalluni, kiisalu inernerusut siuariartornerannut tunngaviulluinnartut ilagaat, Martin Kviesgaard oqarpoq.

Naatsorsuutit 2024-mi ukiup affaani siullermi ilanngaateqareerluni ernianit aamma akiliutinit isertitat 38,4 millionit koruuniusut takutippaat, 2023-mi piffissami tassani 242,4 millionit koruuninut sanilliullugit.

Naatsorsuutigineqarpoq: Renterujussuarnissamut periarfissaq

Aningaaseriviup pisortaa naapertorlugu ukioq manna sammisat appasinnerulaarput, tamannali naatsorsuutaareerpoq, ilaatigut erniat qaffasinnerunerat aamma nukissiuutit akiisa qaffannerat pissutigalugu. Martin Kviesgaardili siunissamut isumalluarpoq:

- Ukioq 2024 ilaqutariit aamma suliffeqarfiit aningaasaliisarnerannut atatillugu pauserfiulaassaaq, nalilerparpulli, ukiuni aggersuni tamanna annertuseqqikkumaartoq, taanna oqarpoq.

Aningaaseriviniup naliliinera pisortap isumalluaatigaa tassa kvartalini aggersuni erniat appariarnissaannut periarfissaqarluartoq, aalisarnermullu inatsisip nutaap periarfissiinerata kiisalu qaammatini tulliuttuni Nuummi mittarfiup sananeqarnerata inaarneqarnerata nassatarissavaa 2025-mi tamatumalu kingorna ukiuni aggersuni aningaasaliinerit nutaat.

Ukiuni aggersuni pingaartumik takornariaqarnerup ineriartornissaa Grønlandsbankenip nalilerpaa.

Grønlandsbanken 2023-mi akileraarutit suli ilanngaatiginagit aatsaat taamak sinneqartooruteqartigaluni 244,6 millionit koruuninik sinneqartooruteqarpoq.

investeringer økonomi finansielle resultater grønlandsbanken inuiaqatigiit aningaasaliinerit aningaasaqarneq banksektoren erhverv

ATORFIIT Se alle jobs

Powered by Labrador CMS