Aningaaseriviup atissaanut siunnersuutit 3000-init amerlanerusut

BankNordik Savalimmiuni Føroya Bankimik atserneqareerpoq, aningaaseriviullu Kalaallit Nunaanni immikkoortortaqarfia qanoq atserneqassanersoq unammisitsissutaasoq aggustimi saqqummiunneqarpoq.

- Unammisitsinermi peqataasut 10.000 koruuninillu eqquinissamik soqutiginninneq annertusoq aningaaserivik nalunaaruteqarpoq.

Atit 3000-init amerlanerusut siunnersuutigineqarput, pilersaarutillu malillugit ukioq naatinnagu atissaa nutaaq saqqummiunneqassaaq:

- Kalaallit Nunaanni atertaarnissatsinnut suleqatiginnikkumasut taama amerlatigisimanerat assorsuaq tupaallaatigalugulu nuannaarutigaarput.

- Inuppassuit taamatut tunniusimatiginerat assorsuaq pingaartipparput, akisussaaffimmillu tigusilluarluta suliassarput tamanna passunniarparput, sullitavut inuiaqatigiillumi tamaasa sullilluarlugit, BankNordikimi pisortaaneq Turið F. Arge tusagassiutinut nalunaarummi allappoq.

Ukiup sisamararterutaasa pingajuani angusat naammagisimaarnartut

Atissaanut unammisitsinerup soqutigineqarluarnera saniatigut ukiup sisamararterutaasa pingajuani akileraarutit suli ilanngaatiginagit 119 millionit koruuninik angusaqarsimalluni aningaaserivik nalunaarpoq, taakkunannga Kalaallit Nunaanni ingerlatsineq 32 millionit koruuninik inerneqarluni.

2024-mi akileraarutit ilanngaatigereerlugit 275 millionit koruunit 300 millionillu koruunit akornanni sinneqartooruteqarnissaq aqutsisut naatsorsuutigaat.

Pisortaanerup erniat appartinneqarnerisigut atuisut aningaasaqarniarnerannut iluaqutaassasoq aamma naatsorsuutigaa:

- Erniat inissisimanerat appariartorpoq piffissamilu aggersumi suli ernianik appartitsisoqaqqinnissaa niuerfimmi naatsorsuutigineqarluni.

- Tamanna ilaqutariinnut ukiuni kingullerni erniat qaffattarsimanerannit aningaasaqarnikkut ilungersortarsimasunut oqilisaataassaaq. Ataatsimulli isigalugu sullitavut ingerlalluarput, tamannalu aamma ukiup sisamararterutaani pineqartumi appartitsinernik utertitsinermi takuneqarsinnaavoq, Turið F. Arge oqarpoq.