Anngiortumik ikiaroornartulerineq aningaasarsiornerlu akiorniarlugit iliuutsit nutaat

- Ikiaroornartut Kalaallit Nunaannut eqqussuunneqartarnerat annertusiartuaarpoq. Pilersuineq Danmarkimit pinerusarpoq, ikiaroornartunillu niuernermi aningaasarpassuit kaaviaartinneqarnerannik kinguneqartarpoq. Aningaasat taakku amerlanertigut malunnarunnaarsarneqartarput. Tamanna Kalaallit Nunaanni Danmarkimilu akileraartarnermut oqartussat suleqatigiinnerisigut suliniutinik aalajangersimasunik arfinilinnik maanna unitsinniarneqalerpoq, Akileraartarnermut Aningaasaqarnermullu Naalakkersuisup Erik Jensenip aamma Danmarkimi akileraartarnermut ministerip Jeppe Bruusip ataatsimut tusagassiuutinut nalunaarutaanni tamanna ilisimatitsissutigineqarpoq.

2020-miit 2023-mut hashi 276 kg aningaasallu 12,5 millionit koruunit arsaarinnissutigineqarput. Aanngajaarniutit sakkortuut soorlu kokain, amfetamin aamma heroin Kalaallit Nunaannut eqqunneqartartut amerliartuinnarnerat oqartussat maluginiarpaat.

Akileraartarnermut ministeri Jeppe Bruus ulluni makkunani Nuummiippoq, ilaatigut Erik Jensen ataatsimeeqatigalugu, tassungalu atatillugu suliniutit nutaat saqqummiunneqarput.

Ikiaroornartunik eqqussuisarneq akiorniarlugu pingasunik iliuuseqartoqarnissaa isumaqatigiissutigineqarpoq:

1. Killeqarfiit akimorlugit suleqatigiinneruneq

Inuiaqatigiinnik illersuiniarluni nakkutilliineq, ilaatigut ikiaroornartunik killeqarfik aqqutigalugu eqqussisoqarsinnaaneranik pinaveersaartitsinerusoq, nukittorsarniarlugu killeqarfiit akimorlugit qaninnerusumik suleqatigiinneq qulakkeerneqassaaq.

2. Ilisimasat misilittakkallu pillugit avitseqatigiittarneq

Ilisimasat misilittakkallu ingerlateqqinneqartarnerat annertusineqassaaq, taamaalilluni nioqqutissanik eqqussukkanik, avammut nioqqutigineqartunik imaluunniit ingerlateqqitassanik nakkutilliinermi misilittakkanik oqartussat avitseqatigiittarsinnaassapput. Anngiartumik eqqussuinermik, ilaatigut ikiaroornartunik, akiuiniarnermi oqartussaasut nukittunerulernissaat qulakkeerneqassaaq.

3. Sungiusarnermi ilinniartitsinermilu suleqatigiinnerulerneq

Sulisut sungiusartinneqarneranni ilinniartinneqarnerannilu suleqatigiinneq taavalu qimminik sungiusaaneq amerlanerusunillu peqalernissaq anguniarneqassaaq. Taamaaliornikkut qimmit aningaasanik ujaasisinnaasut aamma pigineqalissallutik. Taakkua saniatigut kalaallit akitsuuserisut Danmarkimi suliffimmik misiliisinissamik periarfissaqalissapput, aamma killormut, tassa qallunaat aamma nunatsinni misiliisinnaanngussallutik.

Peqquserlulluni aningaasarsiorneq akiorniarneqassaaq

Peqquserlunnikkut aningaasarsiornerup akiorniarnerani iliuusissat uku isumaqatigiissutigineqarput:

1. Paasissutissat atorluarnerulernerat

Aningaasanik nuussinerit, suliffeqarfiit inuillu ataasiakkaat peqquserlullutik aningaasarsiorneranni paasissutissat Kalaallit Nunaanni pitsanngorsarneqassapput. Pisortanit ikiorsiissutinik pisartagalinnut paasissutissat ilaatigut pineqarput, taamaaliornikkut peqquserlunnerit pinaveersaartinniarneqarlutik.

2. Ilisimasat misilittakkallu avitseqatigiissutigineqarnerussasut

Ilisimasanik misilittakkanillu paarlaasseqatigiinnerit annertusineqassapput. Ilaatigut peqquserlulluni aningaasarsiornermi periutsit akiorniarnerani aamma suliffeqarfiit nunanit allaneersut Kalaallit Nunaanni ingerlatsisut nakkutigineqarnerisigut taamatullu suliffeqarfiillu nunanit allaneersunit sulisullit nakkutigineqarnerisigut. Suliniutit peqquserlulluni aningaasarsiornerit aamma aningaasarsianik annikinaarilluni sulisoqarnerit pinaveersaartissavaat. Tamatuma saniatigut Danmarkimi Akileraartarnermut Aqutsisoqarfimmit Kalaallit Nunaanni Akileraartarnermut Aqutsisoqarfimmi sulisunik atuisinnaanerup nukittorsarneqarsinnaanera misissorneqassaaq.

3. Teknikkikkut suleqatigiinneq

Kalaallit Nunaanni akileraarutinut tunngaviusumik qulakkeerinnittussanik teknologiikkut aaqqiissutissanik nutaanik periarfissaqarneq Kalaallit Nunaanni teknikkikkut attaveqaatit digitalikkullu periarfissat nalilersorneqassaaq.

- Ikiaroornartunik eqqussuineq peqquserlullunilu aningaasarsiornerit akiorniarlugit Akileraartarnermut Ministereqarfimmik suleqateqarluarnerput nuannaarutigaarput. Ikiaroornartunik eqqussuineq nunarsuaq tamakkerlugu pivoq, taamaattumillu tamanna akiorniarlugu Danmarkimik suleqateqarneq uagutsinnut pissusissamisuuginnarpoq, Erik Jensen oqarpoq.

Pissutsit akuerineqarsinnaanngitsut

Danmarkimi akileraarnermut ministeri Jeppe Bruus ima oqarpoq:

- Ikiaroornartut inuunermik aseruisarput inuiaqatigiinnullu ajoqutaasarlutik. Aammattaaq peqquserlulluni aningaasarsiornerit isertuussat amerlasuut ikiaroornartunik anngiortumik eqqussuinermut niuernermullu attuumassuteqarput. Tamanna akuerineqarsinnaanngilluinnarpoq, sapinngisatsinnillu iliuuseqartariaqarpugut pinerlunniat peqquserluttut, Kalaallit Nunaannut ikiaroornartunik eqqussisut, unitsinnissaannut.

Kalaallit Nunaata ungasinnera pissutigalugu pinerlunniat Danmarkimi ikiaroornartunik pisinermikkut Kalaallit Nunaannilu akisunerusumik tuniniarneranni iluanaaruteqarujussuartarput. Taamaattumik tamanna inuiaqatigiinnut kalaallinut inuiaqatigiinnut peqqissutsimullu annertuumik kingunerlutsitsisarpoq, ministerit marluk oqarput.