Naligiinnginnerujussuaq ilinniartitaanermut malunniusimanersaasoq
Nunap immikkoortuini assigiinngitsuni ilinniarnissamut periarfissat angusarineqartartullu assigiinngitsorujussuusut, Kalaallit Nunaanni Ilinniartitaanermut Siunnersuisoqatigiit nalunaarusiaanni nutaami allassimavoq.
Meeqqat illoqarfinni anginerusuni, soorlu Nuummi (assimiittoq) najugallit, meeqqanit illoqarfinni mikinerusuni najugalinnit, ilinniakkamik naammassinnissinnaanissaat ilimanarnerujussuusarpoq.
Assi: Oscar Scott Carl
Inuusuttut tamarmik, nunami sumiluunniit najugaqarnertik apeqqutaatinnagu, ilinniagaqarsinnaanissamut assigiimmik periarfissaqarnissaat, Naalakkersuisut anguniagaraat.
Ilinniartitaanermut periusissiami anguniagaq tamanna allassimavoq, taamaattorli unammillernartoqartorujussuusoq, Kalaallit Nunaanni Ilinniartitaanermut Siunnersuisoqatigiit nalunaarusiaanni atuarneqarsinnaavoq.
Nunap immikkoortuini assigiinngitsuni siamaseqaluni najugaqartoqarnera nunallu isorartunerujussua pissutigalugit, inuusuttut ilinniagaqarnissamut periarfissaat unammillernartoqartorujussuusut, Ilinniartitaanermut Siunnersuisoqatigiit tikkuarpaat:
"Najugaqarfippassuit mikinerusut mikisunik atuarfeqarput, ilinniarsimasunik ilinniartitsisoqarnissaminnut killeqarlutik atuartullu amerlasuut 13-inik 14-inillluunniit ukioqaleraangamik atuarnertik ingerlateqqikkumallugu angerlarsimaffimminnit nuuttariaqartarlutik. Tamatuma kingunerisarpaa inuuniarnikkut nalinginnaasumillu allanik aporfeqalertarneq, ilinniakkamik naammassinninnissamut kajumissuseqarnermut sunniuteqartartumik," Siunnersuisoqatigiit nalunaarusiaminni allapput.
Ilinniakkamik naammassinnissinnaanissaq inoqarfinni mikinerusuni ilimanannginnerujussuusartoq
Ajornartorsiut tamanna erseqqissarniarlugu Ilinniartitaanermut Siunnersuisoqatigiit sumi najugaqarneq apeqqutaatillugu ilinniakkamik naammassinninnissamut periarfissanik takussutissiorput:
Takussutissaq: Kalaallit Nunaanni Ilinniartitaanermut siunnersuisooqatigiit
Soorlu takuneqarsinnaasutut, najugaqarfik mikineruleriartortillugu ilinniagaqarsinnaaneq ilimanannginnerujartuinnartarpoq.
"Najugaqarfinni mikinerusuni appasinnerpaajusoq takuneqarsinnaavoq, ilimanaatit -91 %-imik appariaateqarmata", Siunnersuisoqatigiit tikkuaapput imalu inerniliillutik:
“Ataatsimut isigalugu ilinniartitaanermi periarfissat naammassisartullu nunap immikkoortuini naligiinnginnerujussuat takussutissap takutippaa. Illoqarfinni anginerusuni iluatsinnissamut periarfissat anginerupput inoqarfinnilu mikinerusuni annikinneralaarsuullutik. Ilinniakkatigut naammassisaqarnissamut nunap suatungaaniinnerluni sulli apeqqutaasorujussuuvoq.”
Nunaqarfinni atuarfinnik aamma ingerlalluartoqartoq
Nunaqarfiit ilaanni aamma ingerlalluartunik angusaqarluartunillu aamma atuarfeqartoq Ilinniartitaanermut Siunnersuisoqatigiit erseqqissarpaat, taakkualu najukkami najugallit piumassuseqarluartut ilinniartitsisullu tunniusimasut ilisarnaatigisarpaat.
Nalunaarusiami tassani siunnersuisoqatigiit nunagisaq qimannagu ilinniagaqarnissamut periarfissat ilinniakkamillu taamaatitsiinnartarnerit misissuiffigaat. Inerniliullugu oqaatigineqarpoq, ilinniagaqarnissamut periarfissat amerlanerulersimasut – angusarineqartartulli assigiilersinniarnerat suli piviusunngortinneqarsimanngitsoq.
Periusissiami takuneqarsinnaavoq ungasianiit atuartitsinerup digitaliserinngimillu atuinerup annertusineqarnerisigut, aammalu ilinniagaqarfinnik, kommuninik inuussutissarsiutilinnillu qanimut suleqateqarnikkut tamanna piviusunngortinneqarsinnaasoq.”
Siunnersuisoqatigiit inassutigisimavaat naligiimmik ilinniagaqarnissamut periarfissaqarnissaq anguniarlugu ”qarasaasiakkut ilinniarnissamut periarfissat ineriartortinneqartariaqartut, tamatumalu saniatigut pitsaassutsimut, ilitsersuinermut atuaqqissaarnermilu avatangiisinut piujuartitsisunut aningaasaliisoqartariaqartoq”.
Ilinniartitaanermut nalunaarusiaq tamaat Naalakkersuisut nittartagaanni atuarneqarsinnaavoq.
