Sarfannguani timersortarfeeraq ammartoq
Sarfannguani timersortarfeeqqamik suliaqarneq sivisooq naammassivoq. Timersortarfeeraq juunip aappaani atoqqaartinneqarpoq. Nunaqarfimmiut timersornikkut periarfissarissaarnerulernerat borgmesteriata naammagisimaarpaa.
Illorsuaq 2017-imi aningaasaliiffigineqartoq ukiut qulingiluat qaangiummata atoqqaartinneqarpoq.
Assi: Qeqqata Kommunia
Sarfannguarmiut timersortarfeerartaarput. Illorsuaq marlunngornermi juunip aappaani nunaqqatigiinnut atoqqaartinneqarpoq. Qeqqata Kommuniani borgmesteri, Malik Berthelsen (S), Sarfannguani ulloq taanna najuuppoq. Taassuma meeqqat timersuutinik arlalinnik maanna atuisinnaalernerat pitsaasutut, oqalugiarnermini nalilerpaa.
- Sarfannguani meerartasi arctic sportip saniatigut timersuutinik allanik, soorlu futsalimik, sulorarnermik, assammik arsarnermilluunniit aallutaqarnissaminnut periarfissaqalerput, Malik Berthelsen oqarpoq.
Meeqqat atorluaaqqugai
Nunaqarfimmiut meerartaat timersornikkut unammiuaarnerni takussaanerulissasut borgmesterip neriuutigaa.
- Sarfannguarmiuaqqat nunatsinni pissartanngorniunnernut allanut aamma peqataatitaqartalernissarsi periarfissanngortussaavoq, borgmesteri oqarpoq.
- Angajoqqaassi ukiorpassuarni periarfissarisimanngisaat ilissinnut ullumikkut periarfissiissutigineqarpoq, neriuppunga peqqinnartumik peroriartornissassinnut illorsuaq atorluarumaarissi, Malik Berthelsen oqarpoq.
Suliaq sivisuumik suliaasoq
Qeqqata Kommuniani 2017-imi qinikkat Sarfannguani timersortarfeeraqalissasoq taamani aalajangerput. Suliassaq maajimi 2020-imi tamanut suliariumannittussarsiuunneqarsimasoq, kommunip paasissutissaataani takuneqarsinnaavoq. Taamanikkut suliariumannittussarsiuussinermi suliap 2022-imi aasaanerani naammassineqarnissaa ilimagineqarluni pilersaarutaaqqaaraluarpoq.
Sanaartortulli suliffeqarfiutaa akiliisinnaajunnaarmat suliaq uninngammersorpoq. Illorsuaq 2024-imi maajip qulingani nappaanersiorneqarpoq, taamanikkut pilersaarutaasut naapertorlugit timersortarfeeraq 2024-imi aggustip aallaqqaataanni atulertussaagaluarpoq.
Timersortarfeeqqap suliarineqarnera sivisusoq borgmesterip aamma nassuerutigaa.
- Piviusunngortinniarnera ima sivisutigaaq, taamanikkut aningaasaliisoqaqqaarneraniilli meeraasimasut qularnanngitsumik ullumikkut kiisa inersimasunngorsimassapput. Ilaalu immaqa kiisa qeersaalersimallutik ima anniaateqakujulertigipput immaqaluunniit kiisa arsarsinnaajunnaarsimassapput, Malik Berthelsen oqarpoq.
Sarfannguani innuttaasut 90-it missaannik amerlassusseqarput. Timersortarfeerartaavat 294 kvadratmeterisut annertussuseqarpoq taassumalu saniatigut atisalersortafia 59 kvadratmeterisut annertutigaaq.
Qeqqata Kommuniani kommunalbestyrelsi 2017-imi aalajangerpoq kommunimi nunaqarfiit minnerit pingasut timersortarfittaarnissaat piareersarneqarlunilu suliniutigineqassasoq. Maannalu anguniakkat ilaat anguneqartoq, kommuni allappoq.
