KL

DK

Anorersuarmit illut qaliaat teqqaasut

Marlunngornermi anorersuarnera sumiiffinni arlalinni ajoqusiivoq.

Grønlands Politi
Thomas Munk Veirum
Tusagassiortoq
Saqqummersinneqarpoq

Marlunngornermi anorersuarnerani illut arlallit ajoquserneqarsimasut Kalaallit Nunaanni Politiit pigaartuisa pisortaat Jeppe Andsager pingasunngornermi ullaakkut nalunaarummi oqarpoq.

Nalunaarut siulleq nalunaaqutaq 13.29 pivoq, tassani nunaqarfimmi Kapisilinni Nuup eqqaaniittumi tanki uppissimasoq politiit nalunaarfigineqarmata.

Paasiniaanermi nunaqarfiup imermut tankia pineqartoq paasineqarpoq. Imermik tanki uppissimanngilaq qalialiuna tingitaasimasoq pigaartut pisortaat oqarpoq.

Politiit ilisimasaat naapertorlugit nunaqarfik suli imermik pilersorneqarpoq, pisullu nalaani inunnik ulorianartorsiortoqarani.

Nunaqarfiup eqqaani umiatsiat kinngusimasut pillugit aamma Politiit nalunaarfigineqarput. Pigaartut pisortaata pisoq pillugu allamik paasissutissaateqanngilat politiilli pingasunngornermi misissuinissartik naatsorsuutigaat.

Nalunaruutigineqartup ilungersunartup tullia nalunaaqutaq 17.19 pivoq. Qasigiannguani illup qalia tingitaasimavoq, inunnillu ajoqusertoqarsimaneranik aamma nalunaaruteqartorani.

Royal Greenlandip Nuummi qullersaqarfiata qaliaa anorimut tingitaasoq nalunaaqutaq 20.25 nalunaarutigineqarpoq.

Politiit qatserisartullu sumiiffimmukaramik qaliata ilaa imaanut teqqaasut takugamikku aqqusinermik matusipput.

Sivitsunngitsoq qatserisartut pisortaata qalianit oqimaatsunik teqqaasoqarunnaartoq takusinnaagamik aqqusinermik assersuineq nalunaaqutaq 21.42 atorunnaarsinneqarpoq.

Innuttaasut qullersaqarfiup eqqaani umiatsiallit qaliap teqqarneranik ajoqusertoqarsimanersoq angallatiminnik takuniaaqqullugit pigaartut pisortaata kajumissaarpai.

Unnuap qeqqata kingorna anorersuaq qaangiummat eqqissisimasoqaleqqittoq pigaartut pisortaat oqarpoq.

Tunumi pingasunngornermi tullinnguulluni anorersuartussaavoq. Tasiilamilu politeeqarfik ullumi matoqqammat ornigulluni saaffiginnittoqarsinnaanngilaq oqarasuaatikkulli saaffiginninnerit suli ammapput.

samfund storm kapisillit jeppe andsager inuiaqatigiit grønlands politi nuuk

ATORFIIT Se alle jobs

Powered by Labrador CMS