Nivi Olsen tunuarnini pillugu: Allamik toqqagassaqarsimanngilanga

Nivi Olsen ippassaq tassaavoq Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, atorfilli taanna ullumikkumiit atuuffigiunnaarpaa. Naalakkersuisutut tunuartoq Inatsisartoqarfimmi ullumi naapikkatsinni malunnartumik attortisimavoq.

- Ajunnginnerunikuuvunga, immaqa taamannak oqaasertaleraanni. Sakkortuvoq ulloq, aamma ippassaq sakkortuvoq. Ullut kingulliit taamaapput, Nivi Olsen oqarpoq. 

Taanna sapaatip-akunnera kingullerli arlalitsigut tatineqalerpoq. KNQK-p nunatta karsianit aningaasaliissutit 500.000 koruuninit sinneqartut atorfissarinngisaanut atortarsimavai.

Nunatta karsiata 2025-mi naatsorsuutai Inatsisartuni sapaatip-akunnera kingulleq oqallisigineqarmata marloriarluni tatiginnikkunnaarnermik taasititsinerit anigoraluarpai, isornartorsiuisulli piumasaqartullu suli imaaginnavipput.

Atassut, Nivi Olsenip tunuarnissaanik piumasaqarsimagaluartoq, tunuanngimmat naalakkersuisoqatigiinnit anilluni ippassaq nalunaarpoq. Naallu Atassutikkut naalakkersuisoqatigiinnit anigaluartut Nivi Olsen naalakkersuisutut tunuarpoq. 

- Itisilerujussuanngikkaluarlugu, piumasaqaateqartoqarmat taamaattoqassasoq tunuarpunga. Kisianni erseqqissassuara tunuliaqutininngaanniit 150 procentimik tapersersorneqarama uanga. 

Oqarputit piumasaqaateqartoqarmat, kikkunukua piumasaqaateqartut?

- Suleqatigiit iluanni politikki atorneqarpoq tassani. Taamaammat suleqatigiit iluanninngaanniit, allamik toqqagassaqarsimanngilanga, allatut iliornissannut. 

Peqqissiminngilaq  

Nivi Olsenip nassuiaateqarnera naapertorlugu naalakkersuisoqatigiit partiivi, tassalu Demokraatit Inuit Ataqatigiillu tunuartariaqarneranik piumasaqarput. 

Taassuma tunuartariaqalerneranut peqqutaavoq, KNQK-p ukiuni kingullerni aningaasatigut inissisimanera ilungersunartumiikkaluartoq, aammalu naatsorsuutinik ilaatigut tunniussisarsimanngikkaluartoq, aningaasaliiffigisimagamiuk. 

Tamannalu peqqissimissutiginngilaa.

- Unitsissimassagaluarukkit tuniseqqissinnaajunnaarsimassagaluarpunga aningaasanik Avannaata Qimussersuanut, taamaalilluni 2026-mi Avannaata Qimussersua piviusunngunngitsoorsimasussaagaluarpoq. 2026-mi pisoq tunniukkakku aningaasaliissut, 2025-mi pisimasut misissorlugit. Inatsisitigut unioqqutitsinerunnginnami oqartoqarnanilu misissuinerup nalaani tunniussisoqaqqusaanngitsoq. 

Aningaasaliissutillu tunniunneqarnissaat ima piaartigisimavoq, Avannaata Qimussersuani sukkaniuttussat Qasigiannguani ukioq manna katersuutilereersut tapiissutinik tunniussisariaqarsimagami. 

- Bilagerpassuarnik katersigatta, taavalu Avannaata Qimussersua aallartussanngorluni. Qasigiannguani katersuutereertut piareerlutik. Qimussertartorpassuit ukioq sinnerlugu sungiusarnikut, nerukkaatissanut qass tuusintinik atuinikut, uanga tassani aalajangerpunga imaattumut kulturimut taama angitigisumut unitsitsinissara kiinnerfiginiarnagu. Taannaavorlu massakkut suliarineqartoq, aammalu naalakkersuisumik akeqartinneqartoq. 

Inatsisartunut ilaasortaaginnassaaq

Nivi Olsen ukioq ataaseq affarlu naalakkersuisutut atuuffimmineereerluni Inatsisartunut ilaasortaanermini inissaq uterfigeqqissallugu aalajangiutereerpaa. 

- Massakkut itisuumik anersaartulaariarlunga Inatsisartunukarpunga ingerlaannaq, naalakkersuisut issiavianinngaanniit Inatsisartut issiaviannut ingippunga. Suliassaqarlunga nalunngilara, aamma inersuarmi atorfissaqartinneqarlunga nalunngilara.

Naalakkersuisutut atuuffigiunnaakkani naassaanngitsumik atuuffigisinnaanagu ilisimagaluarlugu ukioq ataaseq affarlu angusani assigiinngitsut tulluusimaarutigalugit oqaluttuarpoq. 

- Ajuusaarnaraluartoq ippassaq angerlarama eqqarsarpunga: Suliatit tulluusimaarutigisinnaavatit, aamma qimerluualaarpakka suut aallartissimasakka naammassisimasullu. Assorujorujuk tanngassimaarpunga, Nivi Olsen taama naggasiivoq.