KL

DK

Atassut: Naapertuilluarneq toqqarparput

Atassut naalakkersuisooqatigiinni naligiimmik ingerlasoqarnissaanik neriuuteqaraluarpoq, Nivi Olsenilli naalakkersuisutut issiaannarnissaatut isikkoqarnera pissutigalugu naalakkersuisooqataajunnaarput. Partiilli naalakkersuisooqataasup Inuit Ataqatigiit, Atassummiit isornartorsiuineq tusarnaarpaat.

Atassut naalakkersuisooqatigiinnit anigami Naalakkersuisuni ilaasortaatitaq ataaseq ataatsimiititalianilu siulittaasuuffinnik marluk annaasaqaatigai.
Hanna Hviid Hanna Hviid Tusagassiortoq
Arnaq Nielsen Arnaq Nielsen Tusagassiortoq
Saqqummersinneqarpoq

Atassutip ippassaq naalakkersuisooqataajunnaarnissaa tikillugu, siulittaasumut Aqqalu C. Jerimiassennimut ullut ilungersunartorsiorfiupput.

Naalakkersuisup Nivi Olsenip (D) tunuarnissaa pisinnaanngippat, Atassutip siulersuisuunerisa aalajangerpaat partii naalakkersuisooqataajunnaassasoq.

Nivi Olsen tunuarniarluni maanna nalunaarpoq, pissutsitilli allaanerusumik ingerlasimasinnaaneri Aqqalu C. Jerimiassenillu kissaatigigaluarpaa.

- Qujanassagaluarpoq piffissaq eqqorlugu taama pisoqaraluarpat. Taamaattoqanngilarli. Ippassaq oqaloqatigiinnitsinni tamanna ajornarpasivissorpoq. Taamaattumik tunuarpugut. Tunuareertugullu paasinarsivoq taanna aamma tunuartoq, oqarpoq.

Tunuaraluarpat, naalakkersuisooqataaginnassagaluarpisi?

- Naapertuilluarneq sulissutiginiarlutigu oqareernikuuvugut. Naapertuilluartumik, Inatsisartunilu ataatsimiititaliap suliaa Naalakkersuisunit ataqqineqassaaq. Qisuariarnerput ataqqineqanngilaq. Paasineqarumaarnissarput neriuutigaarput; assersuutigalugu Bentiaraq Ottosen taamaaliorpoq. Taanna maniguulluni taamani tunuarpoq. Maannali pisumut tunngatillugu aalajangiusimalluinnartoqarpoq, pakatsissutigeqaarpullu.

Atassut Naalakkersuisuni ataatsimik ilaasortaatitaqarlunilu ataatsimiititaliani marlunnik siulittaasuutitaqarpoq. Partiilli tamanna pilliutigissallugu piareersimavoq.

- Ataatsimiititaliami inatsisit ataqqineqanngillat, imaluunniit ataatsimiititaliami ilaasortaajuarnissarput pingaarnerutissavarput? Atassummiit naapertuilluarneq toqqarparput, Aqqalu C. Jerimiassen oqarpoq.

Partiip Naalakkersuisut akiniaaffiginianngikkai taassuma naqissuserpaa. Naalakkersuisooqatigiilersut ataqqineqarlutillu periarfissani suleqatigiumaneqarput.

Naak Inuit Ataqatigiit Atassullu naalakkersuisooqatigiikkunnaaraluarlutik siulittaasut marluk akornanni silaannaq suli kialaarpoq.

IA-p Atassut tusarnaaraa

Atassut naalakkersuisoqatigiinnik siullermeerluni naammagittaalliuteqanngilaq. Siunnersuutimik arlallit partiinit naalakkersuisooqataasunit allanit upernaakkut ataatsimiinnermi itigartinneqarnerani juunimimi aamma periarfissaminnik allanik eqqarsalersitsipput.

Atassut naalakkersuisoqatigiinni partiini Atassut pitsaasumik akulerusimatitaasimanersoq Inuit Ataqatigiit siulittaasuata Múte B. Egedep akiuminaatsippaa.

- Atassutip qanoq misiginera tusaavara. Uagulli Inuit Ataqatigiinni naalakkersuisooqatigiikkaangatta naalakkersuisooqatigiit taamaattut allalluunniit pineqaraangata, inissaqartitsisarlutalu periarfissanik ujartuisarpugut. Periarfissarsiorneq uagutsinni qitiuvoq. Atassutilli qanoq misiginera tusaavara, tamannalu ataqqissavara.

Allatut iliuuseqarsimasinnaagaluarpisi?

- Allatut iliuuseqarsimasinnaagaluarnerput eqqartorsinnaavarput, Atassutilli taama aalajangernerata ataqqineqarnissaa pingaaruteqarpoq, Múte B. Egede oqarpoq.

Taanna naapertorlugu Kalaallit atugarissaarnerulernissaannik sulissutiginninnermik ingerlatitseqqiinissaq pingaaruteqarpoq, tamannalu Demokraatit peqatigalugit ingerlatiinnassavaat.

- Suleqataajumavugut. Suliassat imminnut suliassiissutigisavut naammassiumallugit immitsinnut pisussaaffilerpugut. Inuit Ataqatigiinni tamanna ilumoorluta ingerlateqqissavarput. Pigaarnerpaaq tassaassaaq nuna inuiaqatigiillu.

inuiaqatigiit nivi olsen inuit ataqatigiit naalakkersuisooqatigiit atassut aqqalu c. jerimiassen

Atorfiit tamaasa takukkit

PODCASTI

Powered by Labrador CMS