Jens-Frederik Nielsen: - Atassummit periarfissinneqanngilanga

- Atassutip naalakkersuisooqatigiinniit tunuarnera soorunami uggoraara, isumaqarlungalu tamanna oqaloqatigiissutigisimasinnaagaluarlugu, taamalli pisoqanngilaq. Politikkilu taamaattarpoq.

Atassutip naalakkersuisooqatigiinnit tunuarneranit ulloq ataaseq qaangiutiinnartoq Naalakkersuisut Siulittaasuat Jens-Frederik Nielsen (D) taama oqarpoq.

Nivi Olsen (D) Ilinniartitaanermut, Kultureqarnermut, Timersornermut Ilageeqarnermullu Naalakkersuisutut tunuartinneqanngippat naalakkersuisoqatigiinniik tunuassallutik, Atassutip siulersuisuuneri aalajangerput. Jens-Frederik Nielsen aalajangiineq pillugu sioqqutsisumik ilisimatinneqanngilaq.

Aamma atuaruk

Nivi Olsen: Naalakkersuisutut tunuarpunga

- Taamatut pisoqarnerani qisuariarnissannut Atassummit periarfissinneqanngilanga. Atassutip siulersuisuuneri tunuarniarlutik aalajangeereersullu ulloq ataaseq qaangiummat aatsaat paasitinneqarpunga.

- Pissutsit attatiinnarneqarsinnaanngilluinnarput. Iluamillu attaveqatigiittoqarsimannginnera uggornaqaaq, iliuuseqariarnissamut piffissaqanngimmat periarfissaqaranilu. Atassutip aalajangrpaa, uagulli isumarput qanorlu iliortoqarsinnaanera soqutigineqanngilaq, oqarpoq.

Atassutip naalakkersuisooqatigiinnit tunuarnera kissaatigineqartutut sunniuteqarsimasutut isikkoqarpoq. Nivi Olsen naalakkersuisutut tunuarpoq. Tunuarnerminut pissutaasumik erseqqissumik nassuiaateqanngilaq, tamannali KNQK-mut aningaasaliissutit pillugit illuatungiliuttut Atassutillu sakkortuumik isornartorsiuinerisa kingorna pivoq.

Naalakkersuisunut ilaasortat nutaat

Naalakkersuisut nalunaaquttap akunneri arlallit ingerlaneranni ilaasortanik marlunnik annaasaqarput. Isumaginninnermut, Suliffeqarnermut, Ilaqutariinnut Nunamullu Namminermut Naalakkersuisoq Maritha Broberg (A) partiini peqatigalugu tunuarpoq. Akisussaaffiit Naalakkersuisut akornanni allanut tunniunneqartut Naalakkersuisut Siulittaasoqarfiata ullumikkut siusinnerusukkut nalunaarutigaa. Tamannali utaqqiisaagallartumik aaqqiissutaasoq Siulittaasup oqaatigaa.

- Sulinerput ingerlatiinnassavarput. Akisussaaffiillu inuttalerneqartussat ulluni tulliuttuni inuttalerneqassapput.

- Soorunami sapinngisamik tamanna piaarnerpaamik pisinnaassasoq neriuutigaara. Piffissamik aalajangersimasumik oqaatigisaqarsinnaanngilanga, naalakkersuisoqarfiilli maanna allanit utaqqiisaasumik isumagineqartut inuttalersorniarlugit sulivugut.

Aamma atuaruk

Atassut suleqatigiinnit tunuarpoq - Jens-Frederik Nielsen pakatsippoq

Naalakkersuisunut ilaasortat nutaat ivertinneqassappata Inatsisartunit akuersissutigineqaqqaassapput.

Qanoq pisoqarsimanera ugguaralugu Jens-Frederik Nielseni oqarpoq. Atassutip naalakkersuisooqatigiinniit tunuarnera Nivi Olsenillu Naalakkersuisutut tunuarnera ataatsimut isigalugit.

- Kalaallit Nunaat pillugu suliaq ingerlaannarnissaa qulakkeerniarlugu Nivi aalajangiivoq, aalajangiinera ataqqisariaqarpara, soorunami politikerip Naalakkersuisullu pikkorissup Naalakkersuisuuffinnit tunuarnera annertuumik ugguaatigaara.

Qinersisoqassanngilaq

Partiit sisamat – Demokraatit, Inuit Ataqatigiit, Siumut aamma Atassut – Ukiup aappaata affaa matuma siorna Inatsisartunut qinersisoqareersoq naalakkersuisooqatigiinnik pilersitsinissamut ataatsimoorlutik suleqatigiilerput. Taakunannga marluk maanna kiserngorupput.

Naalakkersuisooqatigiit qanoq patajaatsigippat?

- Naalakkersuisooqatigiinni kiserngoruttut sulinerminni ataasiinnarmik anguniagaqarput, tassalu kalaallit innuttaasuinut Kalaallit Nunaannullu pitsaanerpaamik suliaqarnissaq. Partiit marluk suli suleqatigiinnissamut isumaqatigiissuteqarput, inatsisartunilu amerlanerussuteqarput. Tamanna tunngavigalugu sulivugut, Jens-Frederik Nielsen oqarpoq, taassumalu aamma naalakkersuisooqatigiinnik nutaanik pilersitsiniarneq oqallisaanngitsoq oqarpoq.

Atassut Naalakkersuisunut uterteqqinniarpiuk?

- Naalakkersuisoqarfiit marluk inuttalerneqarnissaat maannakkut suliassaraarput. Naalakkersuisooqatigiinnermut Naalakkersuisuutitaqarnermullu peqataarusuttunik akisussaaffimmillu tigusiumasunik ilaasortaqarfiusumik ingerlatsinissaq anguniagaraarput. Partiit marluk akisussaaffimmik maannakkut tigusiumapput. Tamanna akisussaaffiuvoq annertooq pingaaruteqartorlu, tamannalu tigummissallugu piareersimavugut.

Nuummi innuttaasut aqqusinermukarlutik Inatsisartunut nutaamik qinersisoqarnissaa piumasaralugu akunnerup naanerani akerliussutsiminnik takutitsipput. Tamannaali pinavianngitsoq Naalakkersuisut siulittaasuat oqarpoq.

- Qinerseqqittoqassanngilaq. Naalakkersuisut ataatsimoorlutik anguniakkatik suli sulissutigaat. Oqaluttuarisaanermi ajornartoornermi annerpaamik aqqusaagaqarpugut. Maanna piffissaq periarfissarlu atorlugit Kalaallit innuttaasut sullinnissaat anguniassavarput.

- Suliaq tamanna aatsaat aallartippoq.

Inatsisartuni Demokraatit IA-llu ataatsimoorlutik 18-inik ilaasortaatitaqarput. Saniatigut attaviitsumit Kim Kielsenimit tapersersorneqarput. Taamaattumik amerlanerussuteqarput.