Aqqalu soqutigisanut attuumassuteqarsinnaanermik apeqqusiivoq
Naalakkersuisut suliffeqarfinnik pisortatigoortumik avammut niuernermut siuarsaaniartunut peqataatitsinissamik toqqaagaangamik suna tunngavigisarneraat Atassummi politikerip Aqqalu C. Jerimiassenip erseqqissaavigeqquaa.
Vivian Motzfeldt Greenland Water Bankimi siulersuisuni ilaasortaasimavoq, suliffeqarfik taanna Washington DC-mi ilassinninnermi tunisassiaminik nittarsaassivoq.
Leiff Josefsen
Aqqalu C. Jerimiassenip paragraf 37 naapertorlugu apeqquteqarnerminut aviisimi AG-mi allaaserisaq tunngavigaa. Tassani allaaserineqarpoq Washington DC-mi ilassinninnermi 250-inik peqataaffigineqartumi kalaallit tunisassiaat marluk sassaalliutissatut toqqarneqarsimasut.
Tunisassiat tassaasut Royal Greenlandimeersut assagiarsuit taavalu Greenland Water Bankimit puilasumit imeq.
Ingerlatseqatigiiffik Greenland Water Bank ApS Svend Hardenbergimit Jørgen Wæver Johansenimillu piginneqataaffigineqarpoq, taakku tamarmik piginneqataanerup affaanik peqarlutik. Jørgen Wæver Johansen Vivian Motzfeldtip uigaa, taamaattumillu pineqartut qanigisariinnerat pissutigalugu apeqquserneqarsinnaalluni Greenland Water Bank immikkut isiginiarneqarsimanersoq.
- Nunatsinniit imermik avammut
nioqquteqalernissaq tapersernaraluartoq, siunissami toqqaasarneq apeqqusernartoqassappat
soqutigisanullu attuumassuteqarnermut tunngasinnaasoqarsinnaammat qaqipparput, Aqqalu C. Jerimiassen oqarpoq.
Vivian Motzfeldt siulersuisunut ilaasortaq
Suliffeqarfiit nalunaarsorsimaffiat naapertorlugu Vivian Motzfeldt Greenland Water Bank ApS-imi siulersuisuni ilaasortaasimavoq, decembarip 15-ianili 2018-imi siulersuisunit tunuarluni.
Nunanut allanut tunngasunut nalunaarusiami Vivian Motzfeldtip upernaaq saqqummiussaani allassimavoq Greenland Water Bankip tunisassiaanik karsit tallimat Washington DC-mut nassiussineq akisusimasoq.
- Ingerlatseqatigiiffik Greenland Water Bank pisumut atatillugu imermik puilasumeersumik karsinik tallimanik tunissuteqarpoq, Nunatsinni tunisassiarineqartumik, taakkulu ilassinninnermi peqataasunit 250-iusunit ilassilluarneqaqalutik. Karsit imermik puilasumeersumik imallit tallimat Nuummit Reykjavik aqqusaarlugu Royal Arctic Line aamma Eimskip aqqutigalugit nassiunneqarsimapput. Nassiussinerulli akia paasinarsilluni katillugit 75 kg, 11.088 koruuneqartoq imaluunniit puiaasamut ataatsimut 0,5 literimut 111 koruuneqarluni, nalunaarusiami allassimavoq.
Sulisoqanngitsoq
2023-mi sinneqartoorutit 53.000 koruunit sinnerlugit amerlassuseqartut akileraarutillu ilanngaatigereerlugit 92.000 koruuningajannik amigartooruteqartoq Greenland Water Bankip 2023-mut naatsorsuutaani juunip 21-ani saqqummiunneqartumi atuarneqarsinnaavoq. Taamaalilluni nammineq aningaasaatit 305.466 koruuninut appariarlutik. Suliffeqarfimmi sulisoqanngitsoq naatsorsuummi aamma atuarneqarsinnaavoq.
Imermik pilersuinermik sanaartorneq ingerlatsinerlu, imermik tunisassiornermik ineriartortitsineq siulersuisullu aalajangiinerat naapertorlugu tamatumunnga attuumassuteqartunik allanik suliaqarneq suliffeqarfiup siunertaraa.
