Arctic Hub nutaamik pisortartaalersoq

Arctic Hub-ip Avijâja Rosing-Olsen allattoqarfimmi pisortatut atorfinitsippaa.

Tusagassiuutitigut nalunaarumminni taama allapput.

Avijâja Rosing-Olsen Pinngortitamut Avatangiisinullu Naalakkersuisoqarfimmi siunnersortitut atorfimmeersuuvoq, tassanilu Nunatsinni silap pissusianut periusissiamik siullermik suliaqarnermut akisussaasuusimalluni.

- Tatigineqarnera tulluusimaarutigaara, suliassallu siunertaqarluartup tamatuma suliarilernissaanut qilanaarpunga. Ilisimatusarneq ilisimatusarfigisanillu ingerlatitseqqinneq inuiaqatigiinnik ineriartortitsinermut annertuumik sunniuteqarsinnaalluarput – aalajangiiniarnerni toqqammavissatut atorutsigik, assigiinngitsunik pullaveqarluta ajornartorsiutinik erseqqissaanermi sakkugigutsigik aamma innuttaasut, aalajangiisartut ilisimatusartullu ataqatigiilluarnerulersinnerisigut, Avijâja Rosing-Olsen tusagassiuutinut nalunaarummi taama issuaaffigineqarpoq.

Arctic Hubip Nuummi allattoqarfiani pisortatut allaffimmi sulisunik aqutsineq Arctic Hub-illu siulersuisuinut attaveqarneq akisussaaffigissavai.

Ilisimatusarneq innuttaasunut iluaqutaassasoq

Arctic Hubip ilisimatusarnerup inuiaqatigiillu akornanni attaveqarnermik pilersitsinissaq siunertaraa, taamaattumillu Arctic Hub ilisimatusartunut katersuuffiullunilu ilisimasanik nutaanik innuttaasunut saqqummiussuiffiuvoq – ilaatigut ilisimatusarnermik unammisitsineq Paasisavut aqqutigalugu.

Arctic Hub-imi pisortatut Avijâja Rosing-Olsenip Nunatsinni ilisimatusarnerup ineriartortinnissaanut sunniuteqaqataanissamullu peqataanissani qilanaaraa.

- Nunatsinni ilisimatusarnerup innuttaasunut inuiaqatigiinnullu iluaqutaanissaanik tapersersuinissara suliassattut pingaarnertut isigaara. Najukkami innuttaasut peqatigalugit pilersitseqataanikkut, kulturinik naleqartitanillu eqqarsaatiginneqqissaarnikkut, innuttaasullu naapittarnerisigut isumassarsianillu paarlaasseqatigiittarnikkut Nunatsinni ilisimatusarnerpassuit nukittorsarneqarsinnaapput.

- Arctic Hub-ip ataqatigiissaarisutut inissisimanissaa pingaaruteqarpoq, minnerunngitsumik meeqqat inuusuttuaqqallu alapernaannerulersinnissaannut ilisimatusarnermillu soqutiginnilersinnissaannut.

Neriuuteqarfigineqarluartoq

Arctic Hub-imi siulersuisuni siulittaasup Mininnguaq Kleistip, suleqatigiinnissaq qilanaaraa allattoqarfimmilu pisortanngortussaq isumalluarfigilluarlugu:

- Siulersuisut isumaqatigiillutik Avijâja Rosing-Olsen Arctic Hub-imi siuttuusussatut toqqarpaat. Avijâjap inuiaqatigiit ineriartortinnissaat pingaartippaa, ilisimatusarnermilu ineriartortitseqataanissaa nuannaarutigeqaarput.

- Periaatsinik aqutsinermik misilittagaqarpoq, Nunatsinni Danmarkimilu politikikkut aaqqissuussinerit pillugit ilisimasaqarluarluni aamma silap pissusianut tunngasunik suliaqarnermigut ilisimatusarnermut attuumassuteqartunik ilisimasaqarluarluni, tamannalu Arctic Hub-imi allattoqarfimmi pisortatut atorfittaamini iluaqutigissavaa, oqarpoq.

Avijâja Rosing-Olsen oktobarip aallaqqaataanni 2025-mi atorfinissaaq.