Arctic Sport Ikerasak MIO-p nersornaasiuttagaanik nersornaaserneqarpoq
Meeqqat Pisinnaatitaaffii pillugit sullissiviup nersornaasiuttagaa Avannaani timersoqatigiiffimmut unammilligassaqaraluarluni angusarissaartumut Arctic Sport Ikerasammut tunniunneqarpoq.
Arctic Sport Ikerasak MIO-p nersornaasiuttagaanik, Naalagaaffiit Peqatigiit Meeqqat pillugit isumaqatigiissutaata novembarip 20-ani malunnartinneqarnerani tunniunneqartartumik, nersornaaserneqarpoq.
MIO/Arctic Sport Ikerasak
Meeqqat pisinnaatitaaffii pillugit sullissivik MIO ukiumoortumik nersornaasiivoq. Ukioq manna nersornaaserneqartoq tassaavoq Arctic Sport Uummannap nunaqarfiani Ikerasammeersoq.
- Peqatigiiffimmi kulturi timersornerlu aqqutigalugit meeqqat pinnguarfigisinnaasaannik, ilinniarfigisinnaasaannik ineriartorfigisinnaasaannillu toqqissisimanartumik sinaakkusiisoqarsimavoq, tassanilu kulturikkut kingornussat sinaakkutillu ataqqeqqissaarlugit ingerlatsisoqarluni. Naak atortussat annikikkaluartut, sungiusarfissallu unammillernartortaqartaraluartut Arctic Sport Ikerasak sumiiffimmi meeqqanut annertuumik allannguipput, MIO-mit tunngavilersuutigineqarpoq.
Meeqqat Inuit Gamesimi peqataasarnermikkut ilaatigut imminnut tatiginerulertarnerat MIO-p erseqqissaatigaa. Arctic Sporti atortussatigut amigaateqaraluarlutik allanngueqataangaatsiarsimanera maluginiarneqarluni.
- MIO-mit Arctic Sport Ikerasak qujaffigerujussuarparput tunniusimalluarlutik sulisimanerannut aammalu meeqqat inuunerinnissaannut pisinnaatitaaffiinullu allanngueqataanerujussuannut. Najugarisaminni meeqqanut inuusuttunullu pitsaasumik suliniuteqarnerat pitsanngorsaaqataanerallu nuannaarutigeqaarput.
Nersornaasiunneqartoq 20.000 koruuninik Nuna-Fondenip aningaasaliiffigisaanik peqatigiiffiup sulineranut atorneqartussanik aningaasartaqarpoq.
