Arfanniartartuusimasoq: Watsonip illersuiniartui inuunermik navianartorsiortitsisimapput
Paul Watson Japanimi unnerluutigineqarnermini pisuunnginnerarpoq, Kalaallit Nunaannilu tigummigallarneqarnera pillugu sisamanngornermi eqqartuussisoqassaaq.
Avatangiisinik illersuiniartoq 73-inik ukiulik Paul Watson Nuummi tigummigallarneqarpoq, Japanimi 2010-mi pisimasoq pillugu tunniunneqarnissaanik Japan kissaateqarmat.
Assiliisoq: Gerard Julien/AFP/Ritzau Scanpix
Qujanartumik 2010-mi Sikuiuitsumi kujallermi Japanimi arfanniutip Sea Shepherdillu, Paul Watsonip peqatigiiffigisimasaata, aporneranni toqusoqanngilaq.
Japanimiu arfanniartartuusimasoq franskit nutaarsiassaqartitsivianni AFP-mi apersorneqarnermini taama oqarpoq.
Avatangiisinik illersuiniartoq 73-inik ukiulik Paul Watson Kalaallit Nunaanni tigummigallarneqarpoq, Japanimi 2010-mi pisimasoq pissutigalugu tunniunneqarnissaanik Japan kissaateqarmat.
Watson arfanniummik ajoqusiisimasutut inummillu allamik ajoquserneqarneranut peqataasimasutut unnerluutigineqarpoq, taakkuali marluk ilumuunnginnerarpai.
- Toqusoqanngilaq, toqusoqalersorigaluarparali
Taassuma Kalaallit Nunaanni tigummigallarneqarnera pillugu pingasunngornermi nalunaaqutaq qulingiluanut eqqartuussisoqassaaq.
- Sea Shepherdip umiarsuaata arfanniut „Shonan Maru 2“ aporpaa kivisillugulu. Toqusoqanngilaq, toqusoqalersorigaluarparali, arfanniartartuusimasoq 54-inik ukiulik Shintaro Takeda AFP-mut oqarpoq.
Ullumikkut Japanimi arfanniartarfimmi Kyodo Senpaku-mi taanna sulisarpoq.
Sea Shepherd-ip umiarsuaatai Japanimiunit arlaleriarlutik aporneqarsimasut, Sea Shepherd-ip oqaatigaa.
Japanimi naalakkersuisut Watsonimut tunngatillugu oqaaseqangaarnikuunngillat, Paul Watsonilli tunniunneqarnissaa nunap kissaatigigaa tamannalu Danmarkip aalajangiiffigisassarigaa uppernarsarpaat.
Paul Watsonip inummut allamut ajoqusiisimanera pillugu unnerluutip ilumuunnginneranik uppernarsaataasunik eqqartuussissuserisui videomik peqarlutik oqarnikuupput.
Taakku tassaapput aallakaatitassiamit „Whale Wars“-imit, 2010-mi aggustimi Animal Planet-imi aallakaatinneqartumeersut.
Peqataasimasutut unnerluutigisaasoq
2010-mi februaarimi New Zealandimiup illersuiniartup Pete Bethunep gummibådimit Japanip arfanniutaanut qaartartumik tippassaasumik milorujussivoq. Watson gummibådimiinngilaq, peqataasimasutulli unnerluutigisaavoq.
Tamatuma kingorna Japanimi Pete Bethune tigusarineqarpoq eqqartuunneqarporlu, Watsonillu unnerluutigineqarneratut unnerluutigineqarluni.
Qaartartoq tippassaasoq milorujunneqarmat inuttat ilaat umiarsuup arfanniarfiusup qaavaniissimasoq Pete Bethunemut suliami Japanimi eqqartuussiviup paasivaa. Tamatumunnga atatillugu syremik eqqorneqarpoq kiinnamigullu uulluni, Julie Stage, Watsonip illersuisuisa ilaat, oqarsimavoq.
- Qaartartumik tippassaasumik milorujussinerup videoliarineqarnera nassaaraarput.
- Umiarsuup “qaavani” inoqanngitsoq videoliami takuneqarsinnaavoq, soorlu eqqartuussisut taama tunngavilersuisut, Julie Stage oqarpoq.
Aggustip 15-ianni Watsonip tigummigallarneqarnissaa pillugu eqqartuussinermi illersuisut videoliamik takutitsinissamut akuerineqarsimanngillat.
Paul Watson Sea Shepherdimut ilaasortaajunnaarnikuuvoq, maannali peqatigiiffimmik, Captain Paul Watson Foundationimik, peqarpoq.
/ritzau/
