Arfernik illersuiniaq Paul Watson politikkikkut qimarngusutut Frankrigimut nuunnissaminik qinnuteqarpoq
Paul Watson, Kalaallit Nunaanni tigummigallagaasoq, præsident Macronimut politikkikkut qimaasutut nuukkumalluni qinnuteqarpoq.
Maanna 73-inik ukiulik arfernik illersuiniaq Paul Watson, amerikamiutut canadamiutullu innuttaassusilik, Frankrigimi præsidentimut politikkikkut qimarngusutut qinnuteqarpoq.
Assi: Leiff Josefsen
Avatangiisinik illersuiniartartoq Paul Watson Frankrigip præsidentianut, Emmanuel Macronimut, qinnuteqarpoq politikkikkut qimarngusutut nuunnissaminik akuerineqaqqulluni.
Watson maannakkut Kalaallit Nunaanni pineqaatissinneqarsimasunut inissiisarfimmiitinneqarpoq, tassanilernikuuvorlu juulimi tigusarineqarnerminut atatillugu.
Tamanna pivoq Japanimiit tigusarineqarnissaanik piumasaqartoqarninikuunerata kingunerisaanik.
Qimarngusutut innuttaalerumalluni qinnuteqaat Macronimut nassiunneqarpoq ullualuit matuma siorna, franskit nutaarsiassaqartitsiviat AFP-p allaaserinniippoq.
Tamanna allakkatigut apuussinikkut pivoq, Lamya Essemlali, Sea Shepherd France-mi siulittaasuusoq oqarpoq.
Paul Watson siornatigut kattuffimmi tassani ilaasortaasimavoq.
73-nik ukiulik Watsonip tigusarineqarnera pivoq tigusarineqarnissaanik Japanimiit piumaqartoqarneratigut, piumasarineqarmat Japanimut tunniunneqarnissaa Sikuiuitsoq Kujallermi 2010-mi pisumi eqqartuussissutigut malersorneqarnissaa kissaatigineqarmat.
Japanip oqartussaasui naapertorlugit taassuma Japanimiut arfanniat suliassaminnik isumaginninniartut akornusersornikuuai, umiarsuaq arfanniut Japanimeersoq saassukkamiuk, umiarsuaq arfanniarnerminik ingerlatsisoq akornusersorlugu.
Japanip oqartussaasui isumaqarput taanna suliaminnik ingerlatsisunut akornusersuilluni inuttaasup ataatsip peqqissutsimigut akornuserneqarneranik kinguneqartumik.
Watson ukiorpassuarni arfanniartarnermut akerliulluni suliniaqataavoq, - ilaatigut Sea Shepherd suleqatigalugu.
Oktoberip aappaani Kalaallit Nunaanni Eqqartuussiviup pineqaatissinneqarsimasunut isertitsivimmiitinneqarnera sivitsorpaa oktoberip 23-ata tungaanut pisussanngorlugu.
Inatsisit atuutsinneqarnerannut ministeriaqarfik, justitsministeria Danmarkimiittoq aalajangiisussaavoq Watson Japanimut tunniunneqassanersoq.
Tamatuma saniatigut Watson Procesbevillingsnævnetimit akuerineqarnikuuvoq isertitsivimmiitinneqarnini Højesteretimi misilinneqarsinnaanngorlugu.
Suli ulluliunneqanngilaq qaqugu tamanna pissanersoq.
