Arnap savimmik kapineqarnini toqqutigigaa

Arnaq 55-inik ukiulik Tasiilami savimmik kapineqarluni toqusimasoq Kalaallit Nunaanni Politiit tallimanngornermi ullaakkut nalunaarutigaat.

Tasiilami arnaq savimmik kapineqarsimasoq politiit sisamanngornermi unnukkut nal. 22.46 nalunaarfigineqarput.

- Arnaq napparsimmaviliaanneqapallakkaluarpoq inuunerali annaanneqarsinnaanani. Nalunaaqutarlu 23.20 toqusutut nalunaarutigineqarpoq, politiit pisortaata tullia Malik Sandgreen tusagassiuutinut nalunaarummi allappoq.

Nalunaaruteqartoqarnerata kinguninngua arnaq 25-nik ukiulik savimmik kapisisimasutut pasineqartoq politiit nal. 22.50 tigusaraat.

Politiit misissuineq suli ingerlammat sukumiinerusumik oqaaseqarusunnatik politiit pisortaata tullia nangilluni allappoq.

Arnap toqusup ilaqutai ilisimatinneqareerput.