Biilinik ajutoorneq alianartoq arnap 19-inik ukiullip Qeqqata Eqqartuussisoqarfiaini mianersuaalliorluni toqutsisimasutut pisuutinneqarneranik kinguneqarpoq. Eqqartuussineq septembarip aappaani aalajangiiffigineqarpoq, tassanilu arnaq pinerluuteqaqqissagaluaruni pineqaatissinneqarsimasunut inissiisarfimmiittussaanngortinneqarluni.
Arnap Sisimiuni Aqqusinersuarmi nalunaaquttap akunneranut 40 kilometerit missaannik sukkassuseqarluni 2024-mi decembarip pingajuani biilernerani ajutoortoqarpoq. Tassani arnaq alla pisuinnaat ikaartarfiatigoortoq piaarinani aporpaa.
Biilinik ajutoorneq alianartoq arnap 19-inik ukiullip Qeqqata Eqqartuussisoqarfiaini mianersuaalliorluni toqutsisimasutut pisuutinneqarneranik kinguneqarpoq. Eqqartuussineq septembarip aappaani aalajangiiffigineqarpoq, tassanilu arnaq pinerluuteqaqqissagaluaruni pineqaatissinneqarsimasunut inissiisarfimmiittussaanngortinneqarluni.
Arnap Sisimiuni Aqqusinersuarmi nalunaaquttap akunneranut 40 kilometerit missaannik sukkassuseqarluni 2024-mi decembarip pingajuani biilernerani ajutoortoqarpoq. Tassani arnaq alla pisuinnaat ikaartarfiatigoortoq piaarinani aporpaa.
Arnap aporneqartup aqqunartiternini ullut marluk qaangiummata toqqutigai, taamaattumillu arnaq 19-inik ukiulik miarnersugaalliorluni toqutitsisimasutut unnerluutigineqarluni.
Arnaq mianersuaalliorluni toqutsisimasutut aqqusinertigullu angallannermi inatsimmik unioqqutitsisimasutut eqqartuussivimmi pinngitsuunerarpoq, eqqartuussisulli arnap pisuinnaat ikaartarfii mianersorfigalugillu silap taarnera eqqarsaatigalugu biilit sukkassusaat nalimmassartussaagai isumaqarput.
Taamaattumik arnaq pinerluttulerinermut inatsit aqqusinertigullu angallannermi inatsit malillugit pisuutinneqarpoq.
Pinerluuteqaqqissagaluarluni pineqaatissinneqarsimasunut inissiisarfimmiittussanngortinneqarpoq. Arnap pinerluttulerinermut inatsimmik unioqqutitseqqinnginnissaanut taamatut aalajangiineq naammattutut isigineqarpoq.
Eqqartuussut akuerigaa
Arnaq pinerluuteqaqqissagaluaruni biilersinnaanermut allagartaminik arsaarneqartussatut aamma aalajangiiffigineqarpoq.
Assersuutigalugu aalakoorluni biilernermi (1,2 promille sinnerlugu imigassartorsimalluni) imaluunniit piaaraluni apuisoqarpat biilersinnaanermut allagartaq ingerlaannaq annaaneqarsinnaavoq. Arnarli Sisimiuni biilernermini taamaaliunngilaq. Taamaammat aqqusinertigut angallannermi inatsimmik unioqqutitseqqinngikkuni suli biilernermik allagartaqarsinnaavoq.
Pinerluuteqaqqissagaluaruni pineqaatissiissutit atuutiilersinneqarnissaasa saniatigut 2.000 koruuninik akiligassinneqarpoq. Aammattaaq toqusup ilaqutai taarsiivigineqarnissamik piumasaqarsinnaapput, taamaaliorsimanersulli Sermitsiap paasissutissani pissarsiaani allassimanngilaq.
Arnap inuusuttup eqqartuussut akueraa, suliarlu eqqartuussivimmi naammassineqarpoq.
Qeqqata Eqqartuussisoqarfiani eqqartuussineq septembarip aappaani pivoq, Sermitsiamili tamanna aatsaat kingusinnerusukkut paasineqarpoq. Nutaarsiassaq tamanut soqutiginarnera isumaqaratta kingusinaaraluarluta saqqummiupparput.
