Arnat eqqugaasut marluk spiralilersuisimaneq pillugu utoqqatsernermi oqaaseqassasut
Naalakkersuisut spiralilersuisimaneq pillugu utoqqatsernerup sapaatip-akunnerata tulliani malunnartinnissaanut pilersaarutertik saqqummiuppaat.
Naja Lyberth, arnat 1992 sioqqullugu akuersinatik spiralilerneqarsimasut oqaaseqartartoraat. Taanna pingasunngornermi septembarip 24-ani Katuami aaqqissuussami oqalugiassaaq.
Assi: Oscar Scott Carl
Erinarsoqatigiinnerit, oqalugiarnerit assamminnerillu.
Tassaapput sapaatip-akunnerata tulliani spiralilersuisimaneq pillugu utoqqatsernerup malunnartinnissaanut pilersaarutaasut. Tamanna Naalakkersuisut nittartagaanni atuarneqarsinnaavoq.
Aaqqissuussaq Katuami septembarip 24-ani pissallunilu nalunaaqutaq 14.00 pisortatigoortumik aallartissaaq.
Naalakkersuisut siulittaasuata Jens-Frederik Nielsenip (D) oqalugiannginnerani tikilluaqqusisoqarlunilu, erinarsoqatigiittoqarlunilu nipilersortoqassaaq.
Taanna ministeriunermit Mette Frederiksenimit (Socialdemokratiet) tullerineqassaaq.
Taava arnat eqqugaasut marluk oqalugiassapput. Siullertut Naja Lyberth, arnat peqqinnissaqarfiup Kalaallit Nunaannut 1992-imi tunniunneqannginnerani akuersinatik spiralilerneqarsimasut oqaaseqartartuattut oqalugiassaaq.
Kingorna Emma Kuko, arnat 1992-ip kingorna akuersinatik spiralilerneqarsimasut oqaaseqartartuat, oqalugiassaaq.
Naggataatigut inuit eqqugaasimasut najuuttut assamminneqassapput. Erinarsoqatigiillu naggataarutaasumik erinarsussapput.
