Assi takukkit: Julie angallammik atsiivoq
Maliina Ittuk nunatsinni imaatigut ulluinnarlugu angallassisartuni annersaavoq.
Tallimanngornermi ualikkut Disko Linep umiarsuaa nutaaq - 38 meterinik takissusilik hybridiusorlu Maliina Ittuk, 113-nik ilaasoqarsinnaasoq - Faaborgimi atserneqarpoq.
Julie Berthelsen atsiisuuvoq, oqalugiarnerminilu Maliina Aningaarlu pillugit oqaluttuaq oqaluttuaraa, kingornalu umiarsuaq Fynip kujataanit æblecider atorlugu atserlugu.
- Pissanganaqaaq, siullerpaamik taamaaliorpunga, maannalu neriuutigaara iluatsissasoq, Julie oqarpoq, puiaasarlu umiarsuup saavanut arsatut igeriullugu. Siullermeeraluarluni puiaasaq aserormagu, peqataasut nuannaarput.
Atsiisoq aamma eqqumiitsuliortoq
Julie Berthelsenip umiarsuarmut nutaamut kuisisuunera nalaatsornerinnaanngilaq. Umiarsuummi iluani eqqumiitsuliat kusassaataasut, tassa Maliina aamma Aningaaq pillugu oqaluttuaq malillugu qalipakka, Julie Berthelsenip qalipatarai.
Umiarsuaq nutaaq hybridimik taaneqartartoq dieselimik innaallagissamillu ingerlasinnaavoq. Aallaqqaammut innaallagiamik atuineq umiarsualivimmi angalanermi aamma iluliarsuit arferillu akornanni takornarianut angallassinermi atorneqartassaaq, Kalaallit Nunaannili erngup nukinganik nukissiorfik allilerneqarpat dieselimik motoori peerneqarsinnaavoq umiarsuarlu innaallagiaannarmit ingerlatinneqalerluni.
Teknikki ilungersortitsisimavoq
Maliina Ittuup sananeqarnera sivisusimavoq. Suliaq 2019-imi pilersaarusiorneq aallartippoq, coronali aqqusaaqqaarneqaqqaarsimavoq – kingorna hybridteknikki aamma ilungersortitsisimavoq. Tamatuma kingunerisaanik siorna umiarsualiorneq Assenimi Stålskibsværftimiit Faaborg Værftimut nuunneqarpoq, taannalu aamma tallimanngormat Disko Line peqatigalugu atserneqarnermut qaaqqusisuuvoq.
- Disko Line 2021-mi Kujataani Qeqertarsuup Tunuanilu ilaasunik angallassineq pillugu Naalakkersuisunik ukiuni qulini kiffartuussinissamik isumaqatigiissuteqarpoq. Umiarsuarmut taama angitigisumut aningaasaliisinnaagatta piffissaq sivisooq isumaqatigiissutigineqarsimasoq tunngaviuvoq, umiarsuaatileqatigiiffiup pisortaanera Michael Højgaard oqaluttuarpoq.
Disko Linep umiarsuaa maannamut annersaasoq tassaavoq Najaaraq Ittuk, 1999-imi sanaaq, 60-inik ilaasoqarsinnaasoq.
Maliina Ittuk 113-inik ilaasoqarsinnaalluni nunatsinnii ulluinnarlugu angallassisartut annersarissavaat, marlunnillu ataatsimoortarfeqarluni, ilaasut ilorrisimaarnartunik aamma issiavissaqassallutik. Maliina Ittuk ullut 14-it qaangiuppata naammassivissaaq, Qaqortumullu ingerlaqqissalluni Disko Linep ilaasuinik angallassisarneranut juulimi ilaatinneqalissaaq.
