UJAASINEQ
Ataataq ernerlu ajunaarsimasut nassaarineqarput – pania annassimavoq
Inuit pingasut - ataataq meeqqallu marluk - ataasinngornermi ujaarineqalerput. Ataataq ernerlu ajunaarsimasut nassaarineqarput, paniali annassimasoq nassaarineqarluni, politiit nalunaarput.
Pingasut maqaasineqartut Narsamiit (assimi) Qassimiunut umiatsiamik angalapput. Ulluni kingullerni sumiiffik silarlunneranik nalaataqarpoq.
Assi: Poul Hard
Kujataani alianartumik pisoqarpoq, tassa ataasinngornermi nal. 23.20 inuit pingasut maqaasineqartut nalunaarutigineqarmata.
Ataataasoq 35-nik ukiulik meeqqanilu marluk umiatsiaaqqamik Narsamiit Qassimiunut aallarsimapput, apuuffissaminnulli apuutinngitsoorlutik.
Ujaasineq Kalaallit Nunaata Politiivinit Arktisk Kommandomiillu marlunngornermi aallartinneqarpoq, ataataasorlu erneralu arfinilinnik ukiulik toqungasut nassaarineqarput, kingusinnerusukkullu toqusimasutut nalunaarutigineqarlutik.
Paniusoq qulingiluanik ukiulik annassimasoq nassaarineqarpoq, napparsimmavimmullu unitsinneqarpoq ajoqusernini pissutigalugu nakorsarneqassalluni.
Politiit pingasunngornermi ullup-qeqqata missaani tusagassiuutinut nalunaarummi taama allapput.
Umiarsuit, timmisartut qulimiguulillu atorlugit ujaasisoqartoq
Politiit nalunaarummi oqaluttuaraat innuttaasut kajumissutsiminnik ujaasineq marlunngornerup unnuaanili aallartissimagaat, sumiiffilli pujormat ujaasineq ajornakusoorsimasoq.
- Pujoqarunnaarmat marlunngornermi ullaakkut ujaasineq annaassiniarnerlu oqartussanit aamma aallartinneqarpoq, Kalaallit Nunaanni Politiit angallammik sukkasuumik Arktisk Kommandollu umiarsuaanik alapernaarsummik Ejnar Mikkelsenimik ujaasisoqarluni.
- Arktisk Kommando qulimiguulimmik Seahawkimik timmisartumillu Challengerimik aamma Air Greenlandip qulimiguutaanik ujaasinermini atuivoq, Kalaallit Nunaanni Politiit allapput.
Politiit naapertorlugit inuit pingasut taakku marlunngornermi ullup ingerlanerani nassaarineqarput. Niviarsiaraq qulingiluanik ukiulik annassimasoq nassaarineqarpoq, ajoqusersimammalli napparsimmavimmut ingerlaannartumik oqqunneqarsimalluni.
Politiit kajumissutsiminnik ikiuuttut Arktisk Kommandolu suleqataanerat pillugit qutsavigaat.
